Lototele e Fai Atu se Fesili

I le taumafanafana o le 1994 na ou malolo ai mai le aoga i Taipei, Taiwan, ma foi atu i lo’u nuu o Miao-li ou te malolo ai. A o ou i ai i lo’u aiga sa ou faigaluega ai i se faleoloa o fugalaau. E tumu lo’u loto i le agaga faafetai pe a ou toe mafaufau i le mea na sosoo ai.

A o o’u fuiina laau i se tasi aso, sa tu mai se alii e alu i le nofoa faataavalevale e alu i le afi e matamata i fugalaau. Sa ia teena ma le matamuli la’u valaaulia e susū mai i totonu o le faleoloa, ae na i ai se mea e uiga ia te ia na tuua ai se lagona loloto i lo’u mafaufau. Sa ma toe feiloai i ni nai taimi mulimuli ane i luga o le alatele, ma faafeiloai atu e le tasi le isi i se lue o le ulu ma se ataata faauo.

I se tasi aso vevela ao o’u nofonofo i totonu o se faleaiga ma mitimiti se ipu aisa vili, na pōpō mai e se tasi lo’u tauau. O le alii sa i lana nofoa faataavalevale. Sa laei lelei o ia ma se ataata tele i ona foliga. Sa fesili mai o ia ma le toa mo lo’u igoa ma le numera o la’u telefoni, ona alu ese loa lea.

O ni nai aso mulimuli ane, sa telefoni mai ai ma valaaulia au i se taumafataga i le afiafi a le Ekalesia. Sa uunaia au e se uo, ae sa ou alu ma le musua. Sa matagofie le taumafataga, ma o le faafeiloaiga na tuuina mai e tagata ia te au na ou lagona ai le taliaina mai lava i le taimi na ou ulufale atu ai. O se taimi mulimuli ane i lena afiafi, na fesili mai ai se isi tagata o le Ekalesia mo lo’u tuatusi ma le numera o la’u telefoni i Taipei ma auina atu ou faamatalaga i faifeautalai iina. O le mea lena na amata ai la’u sootaga e faavavau ma le Ekalesia a Iesu Keriso o le Au Paia o Aso e Gata Ai.

Na papatisoina ma faamauina au i le tautoulu o le 1994 ma sa ou auauna atu o se faifeautalai faamisiona i le 1997. E lua tausaga talu ona ou toe foi mai i le fale, na ou faaipoipo ai i se tamaitai ua maea lana misiona, ma amataina loa lo ma aiga.

O nei faamanuiaga uma na mafai ona oo mai ona sa i ai i se tagata o le Ekalesia le lototele e fai mai se fesili. O le taimi lena, o ia o se tagata e matuai o’u le masani ai lava, ae na iu ina fesoasoani o ia e taitaiina mai a’u i le talalelei a le Faaola. O ia ou te manatua ai se mau ua ou iloa i le Tusi a Mamona: “E leai se isi o’u faamoemoe, tau lava o le manuia faavavau o outou agaga” (2 Nifae 2:30).