O Le Mana o Molimau e Lua
I se tasi aso a o ou matamata i tusi i totonu o le faleoloa o mea ua faaaoga o le Deseret Industries e lata i lo’u fale, na ou filifili ai e faatau se kopi o le Tusi a Mamona e avatu i se uo i le taeao o le Eseta. Na ou mauaina se kopi manaia ua faaaoga, ma tuu i totonu o la’u ato fai faatau, ma faaauau ona ou matamata solo. E le’i umi ae ou tau atu i se isi kopi na foliga manaia atu, o lea na ou suiina ai i le kopi na i totonu o la’u ato fai faatau ma ou alu atu loa i le kesia.
Ina ua ou taunuu atu i le fale, sa ou tuuina le Tusi a Mamona i totonu o la’u kesi e teu ai sei oo i le Eseta. Ina ua aulia le Eseta, na ou aumaia loa i fafo ma tonu ai e tusi ai i totonu la’u molimau.
Vaai i lo’u te’i ina ua ou susueina le tusi, ma ou vaaia ai se ata o lo’u aiga na pueina i le 25 tausaga ua te’a. I lalo ane o le ata na i ai se molimau na tusia e lo’u tama. E le’i leva ona maliu o ia, ma na maligi o’u loimata a o ou faitauina lana molimau ma lagonaina lona i ai iina.
Ou te manatuaina a o ou talavou, na luiina ai e Peresitene Ezra Taft Benson (1899–1994) ia aiga ina ia avea ni kopi o le Tusi a Mamona ma a latou meatotino e ala i le faapipiiina i ai o o latou ata ma molimau ona auina atu lea i le laumua o le Ekalesia e tufatufa ai i misiona i le lalolagi atoa. 1 Ina ua ou mauaina lenei kopi o le Tusi a Mamona, ua fia selau maila le mamao o le mea ua ou nofo ai mai le mea na nonofo muamua ai lo matou aiga i le taimi na i ai le tusi.
Ina ua uma ona faaopoopo atu la’u molimau i le molimau a lo’u tama, ona ou tuuina atu lea o le Tusi a Mamona i la’u uo. Ona ou faafetai atu lea i le Tama Faalelagi mo le faamanuiaga na tuuina mai e le galuega faatino muamua o le Tusi a Mamona ia te i maua ma la’u uo. Na faapitoa le faagaeetia o la’u uo i le molimau a lo’u tama ma le “aafiaga talafeagai tonu” faapitoa na tupu ai. Na iu ina maua lana ia lava molimau o le Tusi a Mamona ma alu ifo ai i le vai o le papatisoga.
Na faamalosia la’u molimau i lo’u ootia i musumusuga a Peresitene Benson faapea ma le faamanuiaga o le toe oo mai o lena Tusi a Mamona i o’u lima ina ua tuanai tausaga e 25.