Taimi o Fetufaaiga

O Le Mana Ou Te Maua i Taimi Uma Ou Te Faitau Ai

SAUNIA E LINDA CHRISTENSEN

“Aua e fiafia lo’u agaga i tusi paia, ua mafaufau foi i ai lo’u loto, ma ua ou tusi ai mo le aoaoina ma le aoga i a’u fanau” (2 Nifae 4:15).

O Nifae, o se perofeta o le Tusi a Mamona, e fiafia tele i tusitusiga paia. Sa ia faaaluina le taimi e faitau ai, mafaufau i ai, ma aoao atu. Na iloa e Nifae o le a aumaia e tusitusiga paia le fiafia.

O Alema, o le isi perofeta o le Tusi a Mamona, na iloaina na le tausia e sa Sorama ia poloaiga. O le mea lenei na faanoanoa ai Alema. Sa fia fesoasoani atu o ia. Sa alu o ia i se misiona ma aoao atu ia i latou le talalelei. Ona o le mana o le afioga a le Atua, e toatele sa Sorama na salamo ma amata ona ola i poloaiga.

E pei lava o Nifae ma Alema, e mafai foi ona e maua le mana o le afioga a le Atua i aso taitasi e ala i le faitauina o tusitusiga paia.

Mana o tusi paia, ou te sao ai mai agasala.
Mana o tusi paia e manumalo ai.
Mana o tusi paia! Ou te moomia
Ou te maua pe a ou faitauina.

(“Mana o Tusitusiga Paia,” 2006 Otootoga mo le Taimi o Fetufaaiga ma le Polokalama a Tamaiti i le Sauniga Faamanatuga, 10–11)

Ua faamanuiaina oe i le mauaina o tusitusiga paia. Pe a e faitauina, o le a e iloa ai ia poloaiga ma le auala e tausia ai. O le a faamanatuina atu ia te oe o oe o se atalii o le Atua ma e alofa o Ia i a te oe.

Gaoioiga

Aveese le itulau U4, ma faapipii i se pepa malo. Oti ese ia faailoga tusi i luga o laina uliuli mafiafia. Gagau i luga o laina motumotu, ma kelu faatasi ia pito i tua o le faailoga tusi. Faaaoga le faailoga tusi e fesoasoani e iloa ai le vaega ua e oo i ai a o faitau au tusitusiga paia. Maka le siata i aso taitasi pe a e faitauina tusitusiga paia.

Manatu mo Taimi o Fetufaaiga

Ia faaali atu se api o talaaga, ma fesili atu i tamaiti po o le a lea mea. O se api o talaaga o se faamaumauga o manatu, lagona, ma mea na tutupu tatou te mananao e manatua pea. Faaali atu le Ata 122 o le Taga Ata o le Talalelei (o Iakopo o Loo Faamanuia Ona Atalii), ma ia faamatala otooto atu le tala ia Iakopo, e aofia ai igoa o ona atalii e 12. Fai atu i tamaiti e faalogo mo le lua o na igoa a o e faitauina le Esekielu 37:16. Faamalamalama atu i tamaiti o Iuta ma Iosefa ma a laua fanau na faatonuina e tausia ia faamaumauga o mea taua na tutupu. Faitau le Esekielu 37:15–17. Faaali atu le ata 326 o le Taga Ata o le Talalelei (O Le Tusi Paia ma le Tusi a Mamona: o Molimau e Lua), ma faamatala atu o le Tusi Paia o le laau lea a Iuta ae o le Tusi a Mamona o le laau a Iosefa. Fesoasoani i tamaiti e tauloto le Esekielu 37:17. Fai atu ia i latou e mafaufau i auala e mafai ona masani lelei ai i tusitusiga paia (makaina o mau, taulotoina o mau, faia o suesuega patino ma faaleaiga o tusitusiga paia, ma isi mea faapena). Molimau atu e uiga i faamanuiaga o le Tusi Paia ma le Tusi a Mamona “e fai ma laau e tasi” a o molimau atu [tusitusiga paia] e uiga ia Keriso (tagai foi 2 Nifae 3:12).
Ia saunia se gaoioiga o le faafetaui e faaaoga ai O Ou Tulaga Faatalalelei ma mau mai le Mataupu Faavae ma Feagaiga. (Faataitaiga: “O le a ou ava i o’u matua ma faia lo’u tiute e faamalosi lo’u aiga” ma le MFF 88:123; “O le a ou sailia uo lelei ma agalelei atu i isi ” ma le MFF 4:6.) Tusi upu Mataupu Faavae ma Feagaiga i luga o le laupapa, ma ia talanoaina le uiga o ia upu e lua. Sue atu i le itulau o le Faatomuaga Faamalamalama o le Mataupu Faavae ma Feagaiga, ma faitau faatasi le fuaiupu muamua. Talanoa e uiga i itu e tulaga ese ai le Mataupu Faavae ma Feagaiga (mo se faataitaiga, ua vaevaeina i vaega, ae le o mataupu, ma o loo i ai faaaliga ua tuuina mai i lenei tisipenisione). Tusi le mau mo le gaoioiga i luga o le laupapa, ma faaali atu O Ou Tulaga Faatalalelei. Tofi ni tamaiti e sue ia mau ma faafetaui i se tasi o tulaga. Ia valaaulia ni nai tamaiti e faitau se mau ma se tulaga latou te filifilia ma faasoa mai se faataitaiga o se auala e mafai ona latou ola ai i lena tulaga.