Talanoa ma Tama

Faatoa uma lava le matou meaai o le afiafi i le fale o matua o lo’u tina, ma o la sa matou taaalo ma o’u tuagane laiti e toalima, ae savali mai loa lo’u tama i fafo ma valaau mai ia te au.

O le mea moni a valaau mai loa lo’u tama faapena, ua e fefe aua atonu ua i ai sou sasi. O lea na ou savalivali atu ai ma memumemu atu, “E a Tama?”

Sa ou te’i i le faapea mai, “E te manao ta te o e tietie pasika?” Ou te talitonu atonu na pūpū tetele o’u mata e pei o ni polo ta polo a’o ou tali vave atu, “Ioe, ou te fia alu.”

E lei leva ae muamua atu le pasika a lo’u tama ao ui atu a ma’ua pasika i se ala e taamilo atu i le vaomatua matagofie o loo siomia ai lo matou tama’i fale ma a’ea’e atu ai i le tumutumu o le mauga. A o fai le ma tietiega, sa ou matua fiafia lava ma sa tau le mafai ai ona faaalu lemu la’u pasika. Pe faatasi pe faalua na fai mai lo’u tama e faalemu.

Sa ave solo lo’u mafaufau a o ma tietie. Sa ou fiailoa pe aisea na fai ai lenei mea faapitoa mo au ae le o o’u tuagane. Ina ua ma taunuu i le tumutumu o le mauga, sa fai mai Tama, “E foliga mai o se nofoaga manaia lenei ta te malolo ai.” O lea na faatutu ai a ma pasika ae nofonofo i luga o papa ma vaavaai atu i le vaomatua. Sa ma gugu mo sina taimi, ma fiafia i le matagofie na siomia ai i ma’ua. Ina ua ou autilo atu i lo’u tama, sa ou matauina lona sioa loloto, ma sa ou iloa ai e i ai se mea o le a sosoo mai ai.

Ma te le talanoa tele lava. Ou te masalo ona e faigata tele ia te ia ona talanoa mai i se isi sei vagana ai lo’u tina. Ona ia faasalaveia lea o o’u mafaufauga ma faapea mai, “Kjersten, sa ma talanoa ma lou tina, ma ua tonu ai ua lava lou matua e te iloa ai nisi o faamatalaga e uiga i la ma’ua ulugalii ma le aiga.” Sa mafai ona ou iloa i upu sa ia faaaogaina, ma le ala na ia fai mai ai, ua leva ona ia fuafuaina lenei talanoaga.

Sa lemu lona leo a’o amata lana tala. “Sa ma faatoa feiloai ma lou tina i le faletineimu, lea sa avea ai au ma tagata aoao e fuimu, a o faigaluega o ia i le ofisa. Sa amata ona ma tafafao faamasani, ma sa ou iloaina ai e ese lava o ia mai isi tamaitai talavou sa matou tafafao faamasani muamua. O au o se alii talavou e le ano lava i se mea, ma sa ou ola a’e i se isi lotu. Peitai ou te le’i manatu tele lava i ni lotu.

“E matua itiiti naua lava ni tulaga po o sini sa ou faatauaina i lena taimi,” na ia faaauau ai, “ma sa ou matua le popole lava i ai.” Sa punou mai o ia ma faamatala loto mai ia te au. “Kjersten, sa faia e lou tina le faataitaiga aupito susulu o le ola amiotonu ua ou vaai i ai.” A o ia fai maia nei upu, sa oo mai se lagona mafanafana ia te au.

Sa ta’u mai e lo’u tama ni faamatalaga o la la’ua faaipoipoga, o lo’u fanau mai, ma lo matou aiga ou te lei faalogo muamua i ai. Sa ia faamatala mai le tala o lona liliu mai i le Ekalesia ma le mafuaaga na faatalitali ai mo se tausaga faatoa mafai ona faamauina i la’ua i le malumalu, ona sa faaipoipo muamua faalemalo. Sa ia faamatala mai foi nisi o mea fou na oo i ai ma lo’u tina i lena tausaga muamua o la la’ua faaipoipoga. O le taimi muamua lea, ua faatoa mafai ai ona ou malamalama i ni mea sa tuufesilisili ai pea lo’u mafaufau. Sa iu ina ou malamalama i le mafuaaga na eseese ai aso o le faaipoipoga a o’u matua ma aso na faamau ai, ma le mafuaaga la te faapea mai ai o le tausaga muamua o la la’ua faaipoipoga o le tausaga aupito sili lea ona faigata.

A o ia faamatala mai nei mea ia te au, o nisi taimi e emoemo faanoanoa ona mata, a o nisi taimi e maanumi ai i le ata. Ou te le manatua lelei po o le a le tele sa ou malamalama ai i lena taimi, ae ou te manatua lelei lava ia lagona o le ofo, fenumiai, ma le alofa na auaua’i mai ia te au.

O lenei mea na matua i ai se aafiaga moni ia te au. Sa ou iloa ai o ni vavega lava aiga, ma sa ou maua mai ai se malamalama sili atu i le fuafuaga a le Atua. Sa ou maua ai foi se faatuatua sili atu i le talalelei ma se agaga talisapaia mo aafiaga e mafai ona maua ai i olaga o tagata. E tele ni mea sa ma talanoaina i luga o lena mauga, peitai e tasi lava le mea o le a le mafai lava ona ou faagaloina. Ou te lei lagonaina lava muamua se talisapaia tele ma se faafetai i lo’u loto, e pei ona i ai ina ua ta’u mai e lo’u tama ia te au le malosi o lona alofa i le Atua, o le talalelei, ma lo’u tina, ma lo matou aiga. Sa ou iloaina ai le anoanoai o auala ua pai atu ai le talalelei i lona olaga faapea foi ma a’u.

Na oo ina matua vavalalata lava ma’ua ma lo’u tama i lena aso. O le taimi muamua lea, ua ou vaaia ai lona tagata moni lava, ma ona faalogoga ma lagona loloto ae le na o se tagata e faia ni tulafono, na te aumaia le faatagaga e fai ai mea ou te fiafia ai. Ua ou mafaufau foi, sa tele foi ni mea na aoaoina e lo’u tama e uiga ia te au. O le a le galo lava ia te au lena talanoaga faapitoa ma lo’u tama, ma faalogoga o le alofa ma le malamalama sa ma taufai maua.