O LE FAATUATUA O SE TAMAITIITI

Sa tonu ia te au o le a ou savali i le konafesi a le siteki, savavali mo se 30 poo 40 minute ma lou atalii, i le valu lena o ona tausaga. I le maea ai o le luasefulu minute na ou iloa ai ua ou le toe iloa poo fea le itu e tatau ona ma o agai i ai. O lou atalii, o Elson, o se tagata tautala tele, sa ia faamatalaina mai ia te au lea tala ma lea tala e uiga i mea na tutupu i le aoga poo le aiga foi. Sa ou fai atu ia te ia e filemu mo sina taimi, ma faamalamalama atu i ai o loo ou manao e mafaufau ona ua foliga mai ua ma se.

O iina na faaali mai ai e lou atalii ia te au lona faatuatua. Sa ia fautua mai ina ia faia sa ma tatalo. O au lenei, o loo i ai le faautauta atoatoa ma le malamalama o se tagata matua (ma amata ona leai se onosai ona ua agai atu le vae o le uati i le taimi e amata ai le sauniga), sa tali atu pe manao na te faia le tatalo, ina ia faia loa—ae peitai, sa sili lou manao ou te mafaufau. Sa ou faapea ifo ia te au, “E i ai mea e le manaomia ai ona tatou faalagolago i le Alii, o le sailiga o le auala i le falesa o le tasi lena o mea.”

E pei e foliga mai o loo ia faitauina ou lagona, sa tuuina mai e Elson se lesona e uiga i le loto maualalo, ma faapea mai, “Aisea e te taumafai ai pea e fai mea i le auala faigata?” Ina ua maea lena sa ia le toe gagana, ma na ou iloa o loo tatalo i lona loto ma lona mafaufau. I ni nai minute mulimuli ane sa ma taunuu i le falesa, ma sa ou iloa ua ia mauaina se tali i lana tatalo.

O le avea ma Au Paia o Aso E Gata Ai, ua faamanuiaina i tatou i le avea ma tagata o le Ekalesia a Iesu Keriso. O lau molimau i le moni o le talalelei toefuataiina na faateleina ina ua ou iloa o lou atalii, ao tamaitiiti o ia, na iloa ona faaaoga le mataupu faavae o le faatuatua ma le tatalo, ma avea ai o se faataitaiga ia te au i le ola ai i aoaoga a Iesu Keriso.