SAVALI A LE AU PERESITENE SILI
Tatou Te Molimau Atu ia Iesu Keriso
I le silia teisi atu ma le 2000 tausaga talu ai, na soifua mai ai le Togiola o tagata i Peteleema i Iutaia. A o tamameamea lava, sa aumaia o Ia i le malumalu i Ierusalema. O iina na faalogo ai Maria ma Iosefa i valoaga ofoofogia sa tautala i ai Simeona ma Ana e uiga i le pepe meamea o le a avea ma Faaola o le lalolagi.
Sa faaalu Lona soifua faatamaitiiti i Nasareta i Kalilaia, ma ina ua atoa le 12 o ona tausaga na toe aumai o Ia i le malumalu. Sa maua atu o Ia e Maria ma Iosefa o talanoa ma le au a’oa’o, “ma sa latou faalogologo ia te ia, ma tuufesili atu ia te ia”(Joseph Smith Translation, Luka 2:46).
Ua tupu Iesu ma avea o se taulealea ma “ua tupu le poto ma le tino, ma ua alofagia o ia e le Atua atoa ma tagata” (Luka 2:52). Na papatisoina o Ia e Ioane i le vaitafe o Ioritana “ina ia faataunuuina mea tonu uma” (Mataio 3:15). Sa anapogi o Ia mo le 40 aso ma po ma onosaia tofotofoga a Satani a o lei amataina Lana galuega lautele. Ona Ia femaliuai ai lea ma aoao atu, faamalolo, ma faamanuia.
O Ieova Le Silisili
O Iesu lava o le Ieova Silisili o le Feagaiga Tuai, o le na tuua le afioaga mamalu o Lona Tama i luga, ae ua finagalo malie e afio mai i le lalolagi, o se pepe e soifua mai i tulaga e aupito sili ona maualalo. I le tele o seneturi a o le’i oo mai, na valoia ai Lona soifua mai e Isaia, lea sa folafola maia faaperofeta, “Aua ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili ese, o le Faipule, o le Atua malosi, o le Tama o le faavavau, o le Alii o le Filemu” (Isaia 9:6).
O Iesu Keriso lenei ua tatou molimauina ma le paia, e pei ona tautino mai e Ioane le Talifaaaliga, “o le molimau faamaoni o le ulumatua o e ua oti, ma le pule i tupu o le lalolagi.” O Ia foi “na alofa mai ia te i tatou, na ia fufulu mai foi ia te i tatou i a tatou agasala i lona lava toto, na ia faia foi i tatou ma tupu ma faitaulaga i le Atua o lona lava Tama; ia ia te ia le viiga ma le malosi e faavavau faavavau lava” (Faaaliga 1:5–6).
O Le Faaola o le Lalolagi
O Ia o le Alo o le Silisiliese. Ua na o Ia lava le tagata atoatoa na soifua ai i le fogaeleele. Na Ia faamalolo i e mamai ma faasavavali i e pipili, faapupula i e tauaso, o e foi na tutuli ua toe faalogo. Na Ia toe faatu mai e ua oti. Ae na Ia tuuina atu Lona lava soifua ina ia faia ai le togiola, lea tatou te le gafatia ona malamalama ai i le uiga.
O loo tusia e Luka, o le tele naua o lona atu, “ua pei ai lona afu o ‘alu’alu toto ua pau ifo i le eleele” (Luka 22:44), o se faailoga vaaia lea o lona mafatia faaleagaga ua faamaonia foi e le Tusi a Mamona ma le Mataupu Faavae ma Feagaiga (tagai Mosaea 3:7; MFF 19:18). O le mafatiaga i Ketesemane ma luga o le satauro i Kalevario, lea e na o ni nai mita mai Ketesemane, sa aofia ai e le gata i la le tino ae faapea foi i la le agaga “o tofotofoga, … tigaina, … matelaina, fiainu, ma le lailoa, e sili i mea e mafai ona onosaia e le tagata,” na ta’ua ai e le Tupu o Peniamina, “vagana ona ua oo i le oti” (Mosaea 3:7).
Ina ua mavae Lona mafatiaga i Ketesemane, ona oo mai ai lea o le taimi na pue faapagotaina ai o Ia, o Lona faamasinoga, ma Lona tausalaga, ma iu atu ai i le tiga e le mafaamatalaina o Lona maliu i luga o le satauro, ma sosoo ai ma Lona tanuga i le tuugamau o Iosefa, ma le Toetu manumalo. O Ia lea, le pepe na soifua mai i se tulaga maualalo i Peteleema, o le na femaliuai i auala pefupefua o Palesitina i le lua meleniuma talu ai, ua avea nei ma Alii e Pule Aoao, o le Tupu o tupu, o Le na aumaia le faaolataga i tagata uma. E leai se tasi e mafai ona malamalama atoatoa i le maoae o Lona soifua, o le mamalu o Lona maliu, ma le laugatasia o tagata uma i Lana meaalofa. Tatou te taufai tautino atu ma le manino faatasi ma le taitai o le toaselau lea na fai mai i Lona maliu, “E moni, o le Alo o le Atua lenei tagata” (Mareko 15:39).
O Lo Tatou Alii Soifua
O le molimau lena a le feagaiga o le Lalolagi Tuai, le Tusi Paia. Ma o loo i ai foi le isi siufofoga, o le molimau a le Lalolagi Fou, le Tusi a Mamona. O iina o loo faailoa mai ai e le Tama Lona Alo Toetu, ma tautino mai ai, “Faauta, o lo’u atalii pele, ou te fiafia ia te ia, ua ou faamamaluina lo’u igoa ia te ia” (3 Nifae 11:7). O lenei faafeiloaiga paia ua amata ai le tala o le galuega a lo tatou Faaola i ‘isi [o Ana] mamoe’ (Ioane 10:16) ina ua mavae Lona Afio A’e mai Ierusalema. O le savali a le Tusi a Mamona atoa, e faatatau i le paia o Iesu Keriso ma faamanuiaga faavavau e mafai ona maua e tagata uma o atalii ma afafine o le Atua, e ala mai i Lona alofa togiola. O upu a se tasi o perofeta o le Tusi a Mamona:
“Aua ua matou galulue ma le maelega ina ia tusitusi e faaoleole i a matou fanau, atoa ma o matou uso, ia talitonu ia Keriso, ma ia lelei ma le Atua, aua ua matou iloa e faaolaina i tatou i le alofa tunoa pe a uma ona faia mea uma tatou te mafaia… .
“Ua matou tautalatala ia Keriso, ua matou olioli ia Keriso, ua matou tala’i atu Keriso, ua matou vavalo atu foi ia Keriso, ua matou tusitusi e tusa ma a matou valoaga, ina ia iloa e a matou fanau le mea latou te faamoemoe ai mo le faamagaloina o a latou agasala” (2 Nifae 25:23, 26).
E faaopoopo atu i nei mea uma, le tautinoga a perofeta i ona po nei: “O lenei, ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, ma te faia ia te ia: O loo soifua o ia!” (MFF 76:22). I le Mataupu Faavae ma Feagaiga, o loo Ia tautino mai ai ma le manino Lana lava matafaioi paia: “O A’u o le Alefa ma le Omeka, o Keriso le Alii; ioe, o A’u lava o ia, o le amataga ma le gataaga, o le Togiola o le lalolagi” (MFF 19:1).
A tatou vaai atu ia te Ia, e le gata ina tatou iloa atu o Ia o lo tatou Matai ma le Leoleo Mamoe Lelei ae o lo tatou Faaaoao sili, lea ua ofo mai ia te i tatou, “Afai e te manao ia atoatoa, … ia e sau ma mulimuli mai ia te au” (Mataio 19:21).
O Le Maatulimanu
O Ia o le maatulimanu autu o le Ekalesia lea o loo tauaveina Lona suafa, O Le Ekalesia a Iesu Keriso o le Au Paia o Aso e Gata Ai. E leai lava se isi igoa ua foaiina mai i tagata e mafai ona faaolaina ai (tagai Galuega 4:12). O Ia o le Tupuga o lo tatou faaolataga, o Le aumaia le ola (tagai Eperu 5:9). E leai se tasi e tutusa ma Ia. E lei i ai lava. O le a leai lava. Faafetai i le Atua mo le meaalofa o Lona Alo Pele lea, o lē na foaiina mai Lona soifua ina ia tatou ola, ma o Ia foi o le maatulimanu autu e le maluelue o lo tatou faatuatua ma Lana Ekalesia.
O Le Tulimata’iga o Lo Tatou Faatuatua
Tatou te le o iloa mea uma o loo faatalitali mai. Ua tatou ola i se lalolagi o le le mautonu. O nisi, o le a latou ausia mea tetele. O nisi foi, o le a le fiafia. O nisi, o le tele lava o le fiafia ma le olioli, o le soifua maloloina, ma le olaga mamalu. O isi, atonu e feagai ma ma’i ma se fuataga o faanoanoaga. Tatou te le iloa. Peitai e tasi le mea ua tatou iloa. E faapei o le Fetu o le Pole i le lagi, tusa lava po o a mea o i le lumanai, o loo tu mai pea lava le Togiola o le lalolagi, o le Alo o le Atua, ua mautinoa ma iloatino o le taula o o tatou olaga i le tino ola pea. O Ia o le papa o lo tatou olataga, o lo tatou malosi, o lo tatou faamafanafanaga, o le taulaiga moni lava o lo tatou faatuatua.
I le susulu o le la faapea foi le pogisa, tatou te tepa taulai atu lava ia te Ia, ma o loo i ai o Ia iina e faamautinoa ma sisila alofa mai ia i tatou.
O Ia o le taula’iga autu o la tatou tapuaiga. O Ia o le Alo o le Atua soifua, o le Ulumatua a le Tama, o le Alo Pele e Toatasi i le tino. Ua “toe faatuina mai o Ia i e ua oti … ua avea ma faapolopolo o e ua momoe” (1 Korinito 15:20). O Ia o le Alii o le a toe afio mai “e nofotupu i lona nuu i le lalolagi” (MFF 76:63; tagai foi i le Mika 4:7; Faaaliga 11:15).
E leai lava se na matua maoae ua savalia le lalolagi. E leai se tasi ua faia se taulaga e faatusalia pe tuuina mai se faamanuiaga e faatusalia. O Ia lava o le Faaola ma le Togiola o le lalolagi. Ou te talitonu ia te Ia. Ou te tautino atu Lona paia e aunoa ma se faaletonu pe fetuutuunai. Ou te alofa ia te Ia. Ou te ta’uta’u le suafa o Iesu Keriso ma le migao ma le maofa. O Ia o lo tatou Tupu, o lo tatou Alii, o lo tatou Matai, o le Keriso soifua, o lē o loo afio i le itu taumatau o Lona Tama. O loo soifua o Ia! O loo soifua o Ia, ua mamalu ma matagofie, o le Alo soifua o le Atua soifua.