Ua Siosiomia au i Aao o Lona Alofa
Ina ua faatoa tasi le tausaga o la’u tama tama lona tolu o Nolan, sa taia o ia i se ma’i [stroke] na mafua i se aafiaga o lona maeaalio. O lea ua 14 ona tausaga a o loo tauivi pea ma togafitiga, o luitau o le aoao, ona ua pe le isi itu o lona tino.
E ui i lona tauivi ma le gaoa o lona ala i le tuputupu a’e, ae ua pasia e Nolan nisi tulaga sili atu ma te lei manatunatu i ai. O soo se suiga lava o lona malosi e ausia, e faailoa mai ai lona tuputupu ae, ma aumaia ai le olioli ia i maua. Ua atiina ae foi e ia le onosai, ma se naunautaiga talafeagai ma lana tauiviga ia manumalo.
O lo’u toalua o Ryan, ma a’u, atoa ai ma le isi toalima o le ma fanau, ua faateleina le faaleagaga talu mai le mea na tupu ia Nolan, O nisi taimi e oo mai le lotovaivai ma le popole mo lona lumanai, ona toe manatunatu lea i o matou faamanuiaga, ma iloa le alofa ma le manatu mai o lo tatou Tama i le Lagi ma Lona Alo mo i tatou taitoatasi, ma manatua se tatalo na talia mai ina ua ono tausaga o Nolan.
I se tasi afiafi ina ua ma le mautonu i le ala e taulimaina ai luitau o loo feagai ma Nolan, na ma tootutuli ai ma tatalo mo lona ola manuia. A o ma talanoa atu i le Alii, sa ma ta’u atu lo ma popolega patino i uiga o Nolan e tusa ma ona lagona mo lona lava taua. Na ma tatalo atu ma le loto faamaoni ina ia lagona e Nolan le alofa o le Faaola ma iloa lona lava taua, o se atalii o le Atua.
O le taeao na sosoo ai na usu sao mai lava Nolan i le umukuka, a o ou kukaina le meaai o le taeao. A o lei faia meaai o le taeao e masani lava ona taaalo ma ona uso pe taooto foi i luga o le nofoa malolo. Na vaaia lona lotulotu mai ma a’e i se nofoa i le vaega e nonofo ma aai ai, ma tepa mai ia te au ma fai mai, “Sa fai sa’u miti anapo.”
Na ou lagona lona pulunaunau mai, ma sa ou naunau foi i lou fia iloa.
“E mo’i?” o la’u fesili lea. “O le a le mea na tupu i lau miti?”
“Sa i ai Iesu iina,” o le tali faigofie lea a Nolan, “ma sa na ia opoina atu a’u.”
E i ai lau molimau i le alofa o lo tatou Tama i le Lagi ia i tatou, ma e faafofoga ma tali mai ia tatou tatalo, ma o lo tatou Faaola, o le Fautua mo tatou i le Tama. La te silafia i tatou uma taitoatasi. La te silafia o tatou manaoga ma o tatou agavaa. La te silafia foi auala e tali mai ai i o tatou manaoga.
Ua ta’u mai e Moronae, “Afai tou te ole atu ma le loto faamaoni, ma le manatu tonu i ai, ma le faatuatua ia Keriso, na te faaalia le tonu ia te outou. Ma o le mana foi o le Agaga Paia tou te iloa ai le tonu i mea uma lava” (Moronae 10:4–5). Ua ou aoao o lenei mau e le gata ina faatatau i le maua o se molimau i le Tusi a Mamona, ae faapea foi i soo se fesili tatou te sailia ma le faamaoni sona tali. A tatou feagai ma lu’itau po o le lototiga ma tofotofoga faigata, e tinou ma le faamaoni o tatou loto, ma le matua naunauta’i.
Ou te matua lagona le lotofaafetai i le avea ai ma se tasi o le Ekalesia a le Faaola, lea ua ou aoaoina ai le tele o mea e uiga i Lana talalelei e ala i le suesue, auauna atu, ma le Agaga Paia. Ou te matua faafetai lava i lou iloa e fesoasoani, faalototele ma taitaiina i tatou taitoatasi e lo tatou Faaola. Ou te iloa o le a na Ia opoina atu i tatou, “i aao o [Lona] alofa (MFF 6:20) a o tatou o mai ia te Ia.