Maʻu ha Mahino ki he Fatongia Fakalangi ʻo e Houʻeiki Fafiné

Suli B. Peki, palesiteni lahi ʻo e Fineʻofá: “ʻOku fakafou heʻeku fakalaulauloto mo ako e folofolá ʻeku maʻu ha fakamoʻoni ki he palani ʻo e fakamoʻuí ne foaki mai ʻe heʻetau Tamai Hēvaní. ʻOku ʻi ai ha konga ʻo e palani ko iá maʻa Hono ngaahi ʻofefiné. ʻOku ʻi ai ha tafaʻaki ke fakakakato ʻe he houʻeiki fafiné, pea kapau he ʻikai ke tau fai ia, he ʻikai ha toe taha te ne fai ia maʻatautolu. Naʻe tuku mai leva kiate kitautolu ha vaeua ʻo e palani ʻa ʻetau Tamaí ki hono fakatupu ha moʻuí, lehilehiʻi e ngaahi laumālié mo poupouʻi ʻa e tupulakí ʻa ia ʻokú ne takiekina ʻa e meʻa kotoa pē. He ʻikai lava ke tau vahe atu ia. He ʻikai lava ke tau ʻoatu ia ke fai ʻe ha taha kehe. ʻOku ʻatautolu ia. ʻE lava ke tau fakafisi mei ai, ʻe lava ke tau fakasītuaʻi ia, ka ʻe kei hoko pē ia ko hotau fatongia, pea ʻoku tau haʻisia ki ai. ʻE hokosia e ʻaho te tau manatuʻi ai e meʻa kotoa ne tau ʻiloʻi ki muʻa pea toki fāʻeleʻi kitautolú. Te tau manatuʻi ne tau kau ʻi ha fepaki lahi ke maʻu ʻa e faingamālie ko ʻení. Te tau fua fēfē ʻa e fatongia ko ʻení? ʻOku tau tuku fakaʻaho hotau iví ki he ngāue ko ia ʻoku ʻatautolu ʻataʻatā ke fakahokó.”

ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ko e tefitoʻi taumuʻa fakatokāteline ʻo hono Fakatupu ʻo e māmaní ke maʻu ai ʻe he fānau fakalaumālie ʻa e ʻOtuá ha faingamālie ke hokohoko atu ʻi he hakeakiʻí mo e moʻui taʻengatá. …

“… Neongo ʻoku ʻikai ha faʻahinga tokoni ʻe toe mahuʻinga ange te ke lava ʻo fakahoko maʻá e sosaietí, Siasí, pe ki he ikuʻanga taʻengata ʻo e fānau ʻa ʻetau Tamaí, ʻo laka hake ʻi he meʻa te ke fakahoko ʻi hoʻo hoko ko e faʻē pe tamaí, ka ʻoku ʻikai ko e tuʻunga fakaefaʻeé pē mo e tuʻunga fakaetamaí ʻoku fakafuofuaʻi mei ai ʻa e lelei pe tali ʻo ha taha ʻi he ʻao ʻo e ʻEikí. …

“Ko e fefine kotoa pē ʻi he Siasí ni kuó ne fai ha fuakava mo e ʻEikí, ʻoku ʻi ai haʻane ngāue fakalangi ke tokoni ʻi hono fakahaofi ʻo e ngaahi laumālié, ke taki ʻa e houʻeiki fafine ʻo e māmaní, ke fakamālohia ʻa e ngaahi ʻapi ʻo Saioné, pea mo langa ʻa e puleʻanga ʻo e ʻOtuá” (“Kau Fefine ʻo e Angatonú,” Liahona, Tīsema. 2002, 36, 39; Ensign, Apr. 2002, 68, 70).

ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá: “Fakatatau mo e palani faka-ʻOtuá, ʻoku fakataumuʻa ke fakalakalaka fakataha ʻa e tangatá mo e fefiné ki he haohaoá mo e nāunauʻia kakato. Koeʻuhí ko e mahino hona natulá mo e meʻa ʻokú na malavá, ʻoku ʻomi ai ʻe he tangata mo e fefine takitaha ki he nofo malí ha ngaahi fakakaukau mo ha ngaahi taukei makehe. Neongo ʻoku kehekehe pē e tokoni ʻa e tangatá mo e fefiné, ka ʻoku faitatau ʻena tokoni ki he maʻumaʻulutá mo e uouangatahá, ʻa ia he ʻikai lava ke aʻusia ʻi ha toe founga kehe” (“ʻOku Mahuʻinga ʻa e Malí ki Heʻene Palani Taʻengatá,” Liahona, Sune 2006, 51–52; Ensign, June 2006, 83–84).

Silivia H. ʻAlaleti, tokoni ʻuluaki ʻi he kau palesitenisī lahi ʻo e Fineʻofá: “Kuo faitāpuekina ʻe he ʻEikí ʻa e kakai fefiné ʻaki ʻa e ngaahi ʻulungāanga faka-ʻOtua ʻo e ʻofá, manavaʻofá, angaʻofá mo e ʻofa faka-Kalaisí. ʻI heʻetau ngaahi ʻaʻahi fakamāhina ko e kau faiako ʻaʻahí, ʻoku tau maʻu ai ʻa e mālohi ke faitāpuekina ʻa e fefine takitaha ʻi heʻetau fakaaʻu atu ʻetau ʻofá mo e angaʻofá pea foaki ʻa e ngaahi meʻafoaki ʻo e manavaʻofá mo e ʻofa faka-Kalaisí. Tatau ai pē pe ko e hā hotau ngaahi tūkunga fakafoʻituituí, ʻoku tau maʻu kotoa pē ha faingamālie ke langaki hake mo tokangaʻi ʻa e niʻihi kehé” (“Fafanga ʻEku Fanga Sipí,” Liahona mo e Ensign, Nōvema. 2007, 113).

Palesiteni Sipenisā W. Kimipolo(1895–1985): “Ko ha uiuiʻi fakaʻeiʻeiki makahe ke hoko ko ha fefine angamāʻoniʻoni lolotonga ʻa e ngaahi kuonga fakaʻosi ʻi he māmaní, ki muʻa pea hāʻele ʻangaua mai ʻa hotau Fakamoʻuí. ʻE lava ke liunga hongofulu ʻa e mālohi mo e ivi ʻo e fefine angamāʻoniʻoní he ʻahó ni ʻi hono mālohi mo e ivi ʻi he ngaahi taimi nonga angé” (“Privileges and Responsibilities of Sisters,” Ensign, Nov. 1978, 103).