Ngaahi Fakakaukau Maʻá e Efiafi Fakafāmili ʻi ʻApí

ʻE lava ke fakaʻaongaʻi ʻa e ngaahi fokotuʻu fakafaiakó ni ʻi he loki akó pe ʻi ʻapi foki. Te ke lava pē ʻo liliu ke feʻunga ʻa e ngaahi fakakaukaú ni ki ho fāmilí pe kalasí.

“ʻOku ʻIkai Ke Faingofua,” p. 16: Fakaafeʻi e kau mēmipa ʻo e fāmilí ke hiki ʻi ha laʻipepa e ngaahi founga kuo tokoniʻi pe tāpuakiʻi ai kinautolu ʻe he ʻEikí. ʻAi ha foʻi hina ʻo e loto houngaʻiá pea faʻo ai e ʻū laʻipepá. Poupouʻi e kau mēmipa ʻo e fāmilí ke hokohoko atu pē ʻenau tānaki e ʻū laʻipepa ki he foʻi hiná (pe hiki ʻi heʻenau tohinoá) he taimi kotoa pē naʻe hoko ha meʻa pea tokoniʻi ai kinautolu ʻe he ʻEikí.

“Lavaʻi Lelei ʻEte Hoko ko ha Tokotaha Ului Foʻoú,” p. 22: Pe ko ha mēmipa foʻou koe pe ʻikai, ʻoku mahuʻinga ke tanumaki ʻa e anga fakakaumeʻá ʻi he kāingalotu ʻo e Siasí. Mou aleaʻi mo e fāmilí e ngaahi founga te mou lava ʻo tokoni ai ki he kāingalotu ʻo homou uōtí pe koló. Fakamatalaʻi ange ʻe lava ʻe hono fakamālohia ʻo e ngaahi vā fetuʻutaki ko ʻení feohi ʻo fakatupu ha feohi fakakaumeʻa ʻe tuʻuloá pea tokoni ke tau haʻu kia Kalaisi ʻi heʻetau tokoni ki he niʻihi kehé.

“He ʻIkai Teitei ʻIlo Ki Ai Ha Taha,” p. 28: Ko e hā e ʻuhinga ʻa e kakaí ʻi heʻenau pehē he ʻikai teitei ʻilo ki ai ha tahá? Aleaʻi e ʻuhinga ʻoku hala ai e ʻuhinga ko ʻení mo e founga ʻe lava ke matuʻuaki ai ʻe he kau mēmipa ʻo e fāmilí ʻa e ʻahiʻahí. Hiki ha lisi ʻo ha ngaahi ʻahiʻahi pea tuku ke fakafaivaʻi ʻe he fāmilí e meʻa te nau faí ka hoko mai e ʻahiʻahi ko iá. Lau ʻa e 1 Kolinitō 10:13.

“Ngaahi Toʻu Tangatá” p. 40: Fakamatala ki homou fakauluí, pe fakamatala ki hono fakaului hoʻomou ngaahi kui naʻa nau tali ʻa e ongoongoleleí. Fakaafeʻi e kau mēmipa ʻo e fāmilí ke nau vahevahe hono ʻuhinga ʻoku mahuʻinga ai ʻa e ongoongoleleí ʻi heʻenau moʻuí.

“Ko ha Fakaafe ki ha ʻAho ʻEkitivitī,” p. K10, mo e “ʻE Lava Ke u Hoko ko ha Faifekau he Taimí Ni,” p. K14: Hili hono lau e ngaahi talanoá ni, fakakaukau ki ha kakai ʻe lava ke ke fakaafeʻi ki ha fakatahaʻanga pe ʻekitivitī ʻa e Siasí. Hiki ha lisi ʻo e kaungāʻapí, kaungāmeʻá, mo e kau mēmipa ʻo e fāmilí. Naʻa mo e tokotaha ʻokú ke pehē ʻe ʻikai fie haʻú, hiki pē mo hono hingoá he lisí. ʻOku ʻikai te ke teitei ʻilo pe ko hai te ne tali hoʻo fakaafé. Ki muʻa pea fai e fakatahaʻangá pe ʻekitivitií, lotu peá ke fili ha kakai ʻi hoʻo lisí pea fakaafeʻi ke mou ō. Talaange te mou lue fakataha ki ai pe fakauta kinautolu ʻi ha meʻalele kapau ʻe lava. Kapau he ʻikai te nau fie ō ki ai pea hokohoko atu pē hoʻo fakakaumeʻa kiate kinautolú.