Loto-toʻa ke Moʻui ʻAki ʻa e Ongoongoleleí

Ne kei siʻi ʻeku tamaí, ʻa Keti, ʻi Pōlani lolotonga e Tau Lahi Hono II ʻa Māmaní. Naʻá ne faʻa ongoʻi fiekaia, mokosia, mo ilifia. Naʻe hoko leva ha meʻa fakaʻofoʻofa. Naʻe fakaafeʻi ia ʻe hono kaumeʻa taʻu 10 ko ʻOto Telekā ke na ō ki he Lautohi Faka-Sāpaté fakataha mo e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe ako ʻa Keti mo ʻOto ʻi he Lautohi Faka-Sāpaté ʻo ʻiloʻi ko e fānau kinaua ʻa e ʻOtuá. Naʻá na hiva ha ngaahi foʻi hiva. Naʻá na ako ke na lotu. Naʻe saiʻia ʻa Keti ʻi he ongo naʻá ne maʻu he taimi naʻe ʻalu ai ki he lotú; nonga mo fiefia. Naʻá ne kole ki heʻene mātuʻá mo hono tuofefiné ke nau ō. Naʻe ʻikai fuoloa kuo papi ʻeku tamaí mo hono fāmilí. Ne tokoniʻi kinautolu ʻe he ongoongolelei ʻo Sīsū Kalaisí ke nau loto-toʻa ʻi he taimi faingataʻá.

Naʻe ʻatamai lelei ʻaupito ʻeku tamaí, pea naʻá ne fie ako ʻi ha ʻunivēsiti. ʻI he taimi ko iá, naʻe fili pē ʻe he puleʻanga naʻá ne nofo aí pe ko hai ʻe lava ʻo hū ki he ʻunivēsití mo hai he ʻikai lavá. Naʻe ʻikai fie maʻu ʻe he puleʻangá ke tui ʻa e kakaí ki he ʻOtuá. Naʻe fakahā ange ki heʻeku tamaí ʻe toki lava pē ke ne hū ki he ʻunivēsití kapau he ʻikai te ne toe kau ki he Siasí pea ʻoua ʻe toe talanoa kau ki he Tamai Hēvaní mo Sīsū Kalaisi.

Naʻe ʻiloʻi ʻe heʻeku tamaí he ʻikai ke ne lava ʻo tukuange ʻene tuí. Ko ia naʻá na fakakaukau leva mo Helekā, ko ʻeku faʻeé, ke na hiki mei hona ʻapí. Naʻá na heka ʻi ha lēlue ki Siamane Hihifo, mo na lotu pē ke fakangofua kinaua ke na hū ki he fonua ko iá. ʻI he ʻā ngataʻanga ʻo e fonuá, naʻe ʻikai ke vakaiʻi ʻe he kau ʻōfisa polisi ia naʻa nau sivi e ngaahi lēlué ʻa e loki naʻe ʻi ai ʻeku ongomātuʻá. Ko ia naʻe lava ke na kamata ha moʻui foʻou ʻi ha fonua naʻe lava ke na lotu ai ki he ʻOtuá. Hili pē ha māhina ʻe ua mei ai, naʻe fāʻeleʻi au.

Naʻe fie maʻu ke u loto-toʻa ke moʻui ʻaki ʻa e ongoongoleleí ʻo hangē ko ʻeku mātuʻá. Naʻá ku hoko ko ha sōtia ʻi he kau tau ʻa Siamané ʻi ha taʻu ʻe taha. Naʻe ngāueʻaki ʻe ha kau sōtia tokolahi e lea koví, ifi tapaká pea fai mo ha ngaahi meʻa ne u ʻiloʻi naʻe ʻikai totonu ke u fai. Ne u faʻa ongoʻi tuēnoa he taimi ʻe niʻihi, ka ne u feinga maʻu pē ke tauhi ki he ngaahi tuʻunga moʻui ʻa e Tamai Hēvaní. Naʻe fakaʻapaʻapaʻi ʻe hoku kau ʻōfisa pulé ʻeku tauhi ki he ngaahi tuʻunga moʻuí ni pea nau tuku mai haku taimi ʻatā ke u kau ai ki he ngaahi ʻekitivitī faka-Siasí.

ʻI he pō fakaʻosi ʻo e ngāue ʻa ha sōtia, te ne inu kava mālohi mo hono kaungāmeʻá mo fai ʻenau paati longoaʻa ʻaupito. Ne u fakakaukau mo lotua ʻa e meʻa ʻe totonu ke fai ʻi hoku pō fakaʻosí. ʻI he aʻu ki he pō ko iá, ne u talaange ki he kau sōtia naʻa mau ngāué, “Tau fai ha meʻa kuo teʻeki ai ke fai ki muʻa.” Naʻa mau tui homau suti lelei tahá pea mau ō ʻo lea fakamāvae ki homau kau taki ʻi he sōtiá. Naʻe ʻikai ke tui ʻa e mēsia ki he meʻa naʻe hokó. Ne u ongoʻi naʻe tataki au ʻe he Tamai Hēvaní ke u maʻu ʻa e tali ki heʻeku palopalemá. ʻI heʻeku fakakaukau atu ki he meʻa naʻe hokó, ʻoku lava ke u sio ai naʻe maʻu ʻa e ngaahi tāpuaki maʻongoʻonga taha ʻi heʻeku moʻuí ʻi heʻeku muimui ki he akonaki ʻa e kau palōfitá mo tauhi e ngaahi fekau ʻa e ʻOtuá.

ʻE fie maʻu ʻe ho kaungāmeʻá he taimi ʻe niʻihi ke mou fai ha ngaahi meʻa ʻokú ke ʻiloʻi ʻoku ʻikai ke totonu. ʻOua naʻa teitei ngalo hoʻo palōmesi te ke moʻui ʻaki e ngaahi tuʻunga moʻui ʻa e Tamai Hēvaní. Te Ne tāpuakiʻi koe ke ke ʻiloʻi ʻa e meʻa ke lea ʻaki mo faí ʻi hoʻo feinga ke muimui ʻi Heʻene ngaahi fekaú. Te Ne tokoniʻi koe ke ʻoua te ke ongoʻi manavahē. Te ke lava ʻo vahevahe mo ho ngaahi kaumeʻá ʻa e meʻa ʻokú ke ʻiloʻi ʻo kau ki he Tamai Hēvaní mo e ngaahi founga ʻokú ke ongoʻi ai ʻEne ʻofá, ʻo hangē pē ko e kaungāmeʻá ʻeku tamaí ko ʻOtó. ʻE hoko ha fuʻu lelei lahi ʻi haʻo loto-toʻa ke fai ʻa e meʻa totonú!