Ko e Meʻa Totonu Pē Ia Ne u Fie Maʻú

ʻI heʻeku ʻiloʻi ʻa e femoʻuekina ʻo e ʻahó, ne pongipongia ʻeku hū ki tuʻa he matapaá, kuo fonu ʻeku kato āfeí he ʻū tohí, teunga ki he kalasi ako ki he maluʻí, sū hulohula, meʻakai hoʻatā, mo e meʻakai efiafi ke u moʻui ai ʻi ha toe ʻaho femoʻuekina ʻe taha he kolisí. Naʻe ʻi ai ʻeku sivi ʻe ua naʻe ʻikai te u ongoʻi kuó u mateuteu ki ai, laukonga kuo teʻeki ai ke ʻosi, pea ʻikai ha taimi feʻunga ke u aʻu ai ki he feituʻu kotoa pē naʻe totonu ke u ʻalu ki ai he ʻaho ko iá.

Ne u ongoʻi faikeheʻia hono tui hoku piva naʻe fie maʻu ki heʻeku sivi hulohulá mo ʻeku fuʻu kató, peá u manavasiʻi naʻá ku tōmui ki heʻeku ʻuluaki kalasí. ʻI heʻeku humu ʻo tō ʻi loto-mālie ʻi ha feituʻu naʻe tokolahi ai ʻa e fānau ako mo ha ʻū motokā, naʻá ku tangi ʻi heʻeku maá mo ʻeku ʻitá, fakataha mo e mahae hoku sitōkeni nailoni foʻoú. Ko e fitu pongipongí pē ia kuó u ʻosi tangi au.

ʻI heʻeku tuʻu hake ʻo ketuketu atu ki ʻapiakó, naʻá ku lotu fakamātoato ke fekau mai ʻe he ʻEikí ha taha ke ne fakafiemālieʻi au. Meʻa lelei moʻoni kapau te u sio ki heʻeku faʻeé, ka naʻe ʻi ha siteiti mamaʻo ia. Mahalo pē naʻa tali ʻe he ʻEikí ʻeku lotú ʻo fakafou ʻi ha taha ʻo kinautolu ʻoku mau loki tahá ne ʻaʻahi mai ki ha taha ʻo ʻeku ngaahi kalasí. Pe mahalo te Ne fekauʻi mai ʻa e tamasiʻi ʻi he uōtí ʻoku ou manako aí.

Ne u tafoki ʻo sio ki mui heʻeku fakavave atu ki heʻeku ʻuluaki kalasí ka ne ʻikai te u sio ki ha taha naʻá ku ʻiloʻi. Ne u kei tangi pē he taimi naʻe fai ai ʻeku sivi ʻuluakí, peá u lele ki heʻeku kalasi hono uá ʻo tōmui ki ai. Ne u kei loto-mamahi pē heʻeku lele atu ki heʻeku kalasi hono tolú mo ʻeku fakavave ke teuteu ki heʻeku sivi hokó. Naʻe sai ange ʻeku siví ʻi he meʻa ne u ʻamanaki ki aí, pea naʻe kamata ke u kiʻi ongoʻi fiemālie ange ʻi heʻeku maʻu ha feituʻu lōngonoa he holó ʻo kai ai ʻeku meʻakai hoʻataá mo fai ʻeku ako. Ne u lolotonga lau ʻeku ʻū tohí mo ʻeku ongoʻi hono ui ʻe ha tokotaha hoku hingoá.

Ne u hanga hake ʻo sio ki heʻeku faiako ʻaʻahí, ʻa ia ne teʻeki ai ke u sio tuʻo taha ai ʻi ʻapiako. Naʻá ne tangutu hifo ʻi hoku tafaʻakí, peá ma talanoa ʻi ha meimei houa ʻe taha—ʻo ʻikai ki he ngaahi meʻa fakamamahi ʻo e ʻaho ko iá ka ki he ngaahi meʻa lelei naʻe hoko kiate aú, ʻema ngaahi palaní, mo e ngaahi meʻa naʻá ne hohaʻa ki aí.

Naʻá ne ʻalú peá u toki manatuʻi hake ʻeku lotu ʻo kole he pongipongi ko iá. Ko e moʻoni ʻe tali ʻe he ʻEikí ʻa ʻeku lotú ʻo fakafou mai pē ʻi he fefine ko ia kuo uiuiʻi ke ne tokangaʻi aú. Ne u fie maʻu ha taha ke ne fakafiemālieʻi au he pongipongi ko iá, ka naʻá Ne ʻafioʻi te u mateuteu ke sio ki haku kaumeʻa ʻi he konga kimui ʻo e ʻahó—ʻi he taimi kuó u nonga feʻunga hifo ai ke tali ʻa e fakafiemālie ne u fie maʻú mo fai ha fakafiemālie ki ha tokotaha naʻe ʻi ai mo hono ngaahi faingataʻaʻia.

Naʻe ʻafioʻi au ʻe he ʻEikí peá Ne fekauʻi mai ʻa e meʻa totonu pē ne u fie maʻú ʻi he taimi totonu pē ne u fie maʻu aí.