Mālohi ke Muimui ʻi he ʻEikí

Ko e taha ʻo e ngaahi meʻa ne u manako taha ai heʻeku kei siʻí ko e lelé. Naʻá ku kau ʻi he timi lová, pea ko e lova ne u manako taha aí ko e lele mita ʻe 800. ʻA ia ko e lele takai ua ia ʻi he malaʻé.

Ko ʻeku fakaʻānauá ia ke u kau he ʻOlimipikí. Naʻe hoko ʻeku faiakó ko ha tokotaha ʻatelita he ʻOlimipikí. Naʻá ne pehē naʻe feʻunga hoku talēnití ke u kau ki he ʻOlimipikí kapau te u ngāue mālohi ki ai.

Ne u ngāue lahi ki ai mo kau ʻi ha ngaahi lova lahi. ʻI hoku taʻu 15, ne u fika ua hake ki he haú ʻi he kalasi ne u kau ki aí ʻi ʻĀsenitina kātoa. Ne u ʻamanaki pē kapau ʻe kei hokohoko atu ʻeku ngāue ki aí, mahalo pē ʻe lava ke u ʻalu ki he ʻOlimipikí.

Ka naʻe ʻi ai ha palopalema. Naʻe meimei ke fai ʻemau ngaahi lová ʻi he ʻaho Sāpaté. Ne ʻikai fuoloa kuó u ʻiloʻi he ʻikai lava ke hoko atu ʻeku feʻauhí. Ko ia ne u fili ai ke ʻoua te u toe lele.

Ko ha fili faingataʻa ia. Naʻe pau ke tuku ā ʻeku fakaʻānaua ke u kau he ʻOlimipikí. Naʻe ʻikai mahino ki heʻeku faiakó e ʻuhinga ne u tuku aí. Ka naʻá ku ʻiloʻi kuó u fai ha fili naʻe lelei. Neongo ko e meʻa lelei e sipotí, ka ʻoku toe lelei ange ʻa e fili ke muimui ʻi he ʻEikí mo Hono Siasí.

Kimui ange ai lolotonga ʻeku ngāue fakakautaú, naʻe ʻave au ki ha ʻapitanga tau ofi ki he ʻOtu Moʻunga ʻAnitesí. ʻI hono maʻu mai ʻeku ngāue ke faí, ne u ongoʻi ʻoku ʻi ai pē ha meʻa makehe ʻoku fie maʻu ʻe he ʻEikí ke u fai ai. Ne u faʻa lotu ʻo fehuʻi, “Ko e hā e taumuʻa ʻoku ou ʻi heni aí?”

Hili ʻeku ʻi ai ʻi ha māhina ʻe tolu, naʻe pehē mai ʻemau ʻōfisá, “ʻOku ou loto ke fokotuʻu ha kalapu maʻá e kau sōtiá.” Naʻá ne fie maʻu ha feituʻu ke mau laukonga ai, fanongo fasi, vaʻinga, fai tohi, mo mālōlō ai. Naʻe tokoniʻi au ʻe he Laumālie Māʻoniʻoní ke u ʻiloʻi ko e meʻa ʻeni naʻe fie maʻu ʻe he ʻEikí ke u faí. Naʻe kole mai ke u hoko ko e palesiteni ʻo e kalapú. Ko e ngāue lahi ʻa hono fokotuʻu ʻo e kalapú. Naʻa mau vali mo fakanāunau ʻa e fale ke mau fakataha aí.

Naʻe kole mai ke u fai ha lea ʻi muʻa he kau ʻōfisá mo e kau sōtiá ʻi he polokalama fakaava ʻo e kalapú. Ne u maʻu ai ʻa e faingamālie ke fai kiate kinautolu ʻeku fakamoʻoni ki he ongoongoleleí mo e ongo naʻá ku maʻu ki he Siasí, ki he kau sōtia tokolahi naʻe ʻikai ke nau moʻui ʻaki e ngaahi tuʻunga moʻui ʻo e ongoongoleleí. Naʻa nau ʻiloʻi kotoa ko e “tamasiʻi Māmonga” au ne u tauhi ki heʻeku ngaahi tuʻunga moʻuí. Naʻe fakaʻapaʻapaʻi foki au ʻe he kau ʻōfisá. Naʻe pehē mai hanau taha, “ʻOku ou fakaʻofoʻofaʻia ʻi he ngaahi tuʻunga moʻui ʻokú ke maʻú.”

ʻOua naʻá ke teitei manavahē ke fakahā ki he kakaí ʻa e meʻa ʻokú ke tui ki aí mo hoʻo ngaahi tuʻunga moʻuí. ʻOku ʻikai fie maʻu ke ke fūfuuʻi pe ko e tokotaha fēfē koe. ʻOku ou ʻiloʻi ʻe tāpuakiʻi koe ʻe he ʻEikí ʻi hoʻo lototoʻa feʻunga ke muimui ʻiate Iá.