Tekivu ena Masu

E dua na ka taleitaki era a veitalanoataka na itabagone ni Otawa sai koya na kena saumi mai na nodra masu. Taumada, e kaya ko Susan Brook, “Kevaka o vinakata e dua na kena isau, e dodonu mo vakarogoca.”

E kaya ko Susana ni isau ni nona masu ena so na gauna e dau yaco mai ena wili ivolanikalou. E tiko e dua na kena ivakaraitaki vinaka vua: “Ena dua na siga, au sa oca sara ga vakalevu, kau sa yaloyalo ca kina vei ira kecega. Au sega ni via vosa. Au nanuma niu a wilika ena ivolanikalou, au sega mada ga ni nanuma evei, ka kaya, ‘Mo yalomalumalumu.’ A tarai au sara ga. Oqori na noqu isau ni taro.” (Raica naV&V 112:10.)

Sa dau vakarorogo vinaka ena lotu ko Ariana Keith. “Au vakabauta ni levu na noda masu sa dau saumi mai vei ira na vosa e valenilotu,” e kaya o koya. “Ena dua na gauna au a vinakata na noqu veivakalougatataki vakapeteriaki. Ena macawa ni se bera na gauna sa lokuci tu meu na qai taura kina, a lako mai na neitou peteriaki ni iteki ki na neitou tabanalevu ka mai vosa kina. Au sa masulaka sara toka ga mai vakabibi, ka sa dua na ka talei na noqu rogoci koya.”

E kaya ko Mackenzie Loftus ni dau saumi mai vakavuqa na nona masu mai na nona matavuvale. A masulaka e dua na lewa vakamatavuvale, “kau vakila na Yalotabu ena gauna vata ga, ka kila ni lewa keitou vakayacora sa dodonu.”

Ena so na gauna ena lako sara ga mai vakadodonu vei iko na kena isau. Ni ratou toki ko Thomas Francis kei na nona matavuvale ki Otawa, a gadreva me vakaitokani vou ena nona koronivuli vou. A masu me kunea eso na itokani vovou. “Ena dua na siga,” e kaya ko Thomas, “a lako mai vei au na gone oqo ena neitou kalasi ka kaya, ‘O vinakata mo mai sota vata kei ira na noqu itokani?’ Me tekivu mai na gauna ko ya, keirau sa veitokani tu mai kina. A vukei au sara vakalevu.”

E tiko e dua na ka bibi vei Dawson Lybbert me tukuna me baleta na isau ni masu. E kaya o koya, “Ena so na gauna o na sega ni ciqoma na isau ni masu o namaka tiko, ia o na ciqoma na veika o gadreva.” E kaya o koya ena so na gauna o na sega ni rawa ni raica ena gauna vata ga, ia ena rawa ena gauna o raica lesu kina.

E vuqa vei ira na itabagone era tukuna na totoka ni nodra dau masu vata e dua na matavuvale. Sa dau taleitaka vakalevu cake o Kyffin de Souza na nona kila ni ratou dau masu vata e veibogi na nona matavuvale. “E tiko e dua na neitou ituvatuva me keitou dau vakaitavi yadua. Au vakila na Yalotabu, kau kila ni kevaka au tu yawa mai vale, eratou na masulaki au tiko meu taqomaki.”

Sa dau taleitaka o Bénédicte Bélizaire na masu vata kei rau na nona itubutubu ena veimataka. “Au dau lako ki na nodrau rumu ka keitou masu,” e kaya o koya. “E tiko e dua na noqu ivakadinadina ni tiko vata kei au na Yalo Tabu, ia kevaka au gadreva na Nona veivuke, au na kerei Tamada Vakalomalagi kina.”

E kaya o Ruth Decady na nona itokani, “sa ka bibi dina, ni, ena gauna eda cavuta kina na noda masu, eda kila ni vakarorogo tiko o Tamada Vakalomalagi. E tiko kina e dua me baleti iko.”

E taleitaka o Katie Cameron na nona dau vakila na ka, ena nona masu. “Niu vosa vua na Turaga, e vaka ni dua e vinakata tiko me vosa mai vei au. Au kila ni rawa niu tukuna Vua e dua ga na ka.”

O ira na cauravou—vakabibi o ira ena yabaki ni bete me vakataki Ronan Filamont, Fred King, Dawson kei Davin Lybbert—eratou tukuna na bibi kei na itavi ni kena cabori na masu ni sakaramede ena vukudra na lewe ni nodratou tabanalevu kei na tabana.

E kaya o Dawson, “Na masulaki ni sakaramede e vakavuna na nomu vakasamataka vakamatata cake na kena bibi. E tu vei au na kaukauwa ni matabete oqo, kau vakila ni sega ni rawa niu vakasausataka.”

E nanuma tiko o Fred na nona a cabora na masu ni sakaramede ena imatai ni gauna ni se qai tabaki me bete: “Taumada a dredre, kau qai calacala tikoga. Ena dua na gauna au a tekivuna tale vakavica. Ia a vakasolokakana vei au na Yalotabu ni sega ni dua na ka kevaka au na tovolea tiko vakavica; ena qai donu ga mai. Sa dua na ka vakasakiti.”

E vica vei ira na itabagone era tukuna na veika bibi era a cakava me ra vakavakarau kina me ra masu. E kabi tu ena lalaga ni rumu ni moce nei Matt Larson e dua na idusidusi vakaivolanikalou, Vunau kei na Veiyalayalati 78:19: “O Koya sa ciqoma na ka kecega ena vakavinavinaka, ena vakalagilagi; ka na vakaikuritaki vua ena veika ni vuravura oqo, ena yadrau, io, ena levu cake.” Sa vakananuma vua me dau vakavinavinakataka na veika sa solia vua na Turaga. E kila ni dodonu me tiki ni nona masu na vakavinavinaka.

E kaya ko Nick Moolenbeck, “E sega ni yaga na masu kevaka au kerekere walega kau sega ni vakasamataka vakabibi ka solia kina na yaloqu.”

E tiko vei Sierra Lybbert e dua na italanoa cecere me baleta na masu. Ni se qai yabaki rua, a butuka na ligana e dua na ose. A ramusu na nona idovidovi ni kakana, ka vuvuseisei e vica na iqaqalo ni ligana. Erau a veiciciyaki na nona itubutubu mai na dua na valenibula ki na dua tale ena nodrau vaqara e dua na dauveisele ka rawa ni tovolea me cakava na ripea ka kena irairai tu oqo ni na sega ni rawa. A kaya kina ko koya, “A kaya vei rau na noqu itubutubu e dua na vuniwai e sega vei dauveisele e dua na masu me rawata kina vakavinaka. E kaya vua ko tinaqu ni sega ni tiko vua na dauveisele e dua walega na qaqa ni masu—e vuqa. A qiri na tinaqu ki valetabu me biu na yacaqu ena ivola ni masu.”

Oqo, ni sa yabaki 13, sa cakacaka tu na ligana. Sa cakacaka vinaka tu na nona idovidovi ni kakana, ka laveta cake me ratou raica e vica na goneyalewa mai na nodratou tabanalevu. Eratou a sega ni se rogoca sara na italanoa. Na ka ga eratou rawa ni raica ena ligai Sierra e dua na imacamaca ni mavoa ka wavokita toka na vu ni nona idovidovi ni kakana, e voleka sara me sega ni laurai rawa. E qoroi dina na vua ni veisele oqo.

E kaya ko Sierra, “E vakatubura vei au na marau niu kila na ka e rawa ni vakayacora vei au na masu. Sa dua na ka vakasakiti ena noqu bula.”

E voleka ni ra duavata kece kei Kale Loftus ena nona kaya, “Na Masu e dua na itovo cecere me da vakaitovotaki keda kina.”