Luveni Ga Rairai Sabalia se na Kokosi Vakaturaga? Vakatau Ga Vei Iko!

Niu se gonelailai au nanuma na nona dau wilika vei au na tinaqu na italanoa ni “Luveni Ga Sabalia,” mai vei Hans Christian Andersen. E rairai na vuna baleta niu dau mamadua kau vakila niu sega ni veiganiti kaya, ia na vakanananu kei na ivakavuvuli ni italanoa ko ya e dau tu vata ga kei au.

Ena tikina au nanuma, ni wawa vakamalua toka e dua na tina ni ga me dirilaka nona yaloka ka ra basika mai na luve ni ga lalai. Sega ni dede, era sa basika mai na luve ni ga dromodromo ka marau kina na tina ni ga. Ia, e dua na yaloka ni ga levu cake vakalailai e se bera ni kadiridiri. Era wawa ka vakararai toka na tina ni ga kei ira na luvena. Ni sa qai kavoro na yaloka, era qai raica na luve ni ga dromodromo ni duatani na kena irairai na lewe ni nodra matavuvale vou. Era wavoliti koya ka kaya vei rau na tinadra kei na tamadra, “E sega ni vakataki keda o koya. E rairai sabalia.” Era biuti koya tu ga ena sova ka qalo tani yani. A biuta na sova na luve ni ga rairai sabalia oqo ka tovolea me vunitaki koya. Na veika kecega e sota kaya e ca ka veivakayalolailaitaki. E dau vakasamataka, “Era sa cati au kecega baleta ni sa rui sabalia na kequ irairai.”

A qai yaco ena nona bula e dua na cakamana. A raici ira eso e tautauvata kei koya na kedra irairai kei na nodra ivukivuki! A yaco me itokani vata kei ira, ka ra qai kauti koya vei tinadra ka ra kerea, “Nana, Nana, keitou raica e dua na taci keitou lailai! E rawa beka ni tiko vakadua vata kei kedatou?” E olona na ga rairai sabalia lailai oqo e tabana na tina ni kokosi totoka ka vakasakiti oqo ka kaya vua ena domo malumu, “O sega mada ga ni luve ni ga! O iko e dua na kokosi lailai, ka na yaco e dua na siga mo tui ni tobu oqo.”

Au dau taleitaka ni rogoca na italanoa oqo niu se gone. Au a sega ni kila ni na vukei au ena noqu itabayabaki vakacauravou na lesoni au vulica mai kina. Au a papitaiso meu lewe ni Lotu niu se qai yabaki walu, ia a yaco me luluqa mai vakalotu na noqu matavuvale.

Ena koro lailai au tubu cake mai kina e Idaho, e dau vakayacori ena dua na valeniyaloyalo na sara iyaloyalo ena yakavi ni Vakarauwai. Au dau lako vata kei na rua se tolu na noqu itokani. E dau vakaraitaki ena valeniyaloyalo e dua na iyaloyalo lekaleka me baleta na qito kei na dua tale me baleta na veika e yaco vakavolivoliti keda. Na iyaloyalo namaki e vakavuqa ni dua na iyaloyalo ni cowboy ka levu kina na veivala.

Ena dua na Vakarauwai ena gauna ni vakacagicagi, eratou a vaqiqica mai na dauveiqaravi e dua na basikeli e 10 na kena siviti. E ka damudamu, e rairai totoka sara, ka ratou na solia yani ki vua na tamata e sarasara tiko ka taura tiko na vu ni tikite e nona na qaqa! Sa dua na ka na noqu vinakata na basikeli o ya!

A tatara na daukacikacivaki ki na loma ni tavaya ka taura mai e dua na tikite. Ni wilika mai na naba ena tikite, au qai kila ni tiko vei au na tikite sa nona na qaqa. Ia au sega ni yavala se kaya e dua na ka. Au sa rui madua. E sega vei au na dei ni yalo meu tucake ka tukuna vei ira kecega na tamata ni noqu na tikite sa qaqa. A kacivaka tale vakarua na naba sa qaqa, ia ena gauna kece oqori au a vunitaka toka ga na tikite me kakua ni dua e raica. Oti sa qai kacivaka na daukacikacivaki e dua tale na naba. A yaco ni nona e dua vei rau na itokani au lako vata mai na naba vou. A rika cake, kaila, ka cici yani ki na tavata me taura na nona basikeli. A rawa ni a noqu na basikeli ko ya!

Niu taubale duadua yani ki vale ena Vakarauwai ko ya, au vakasamataka na italanoa ni luve ni ga rairai sabalia ko ya. Au vakila ni vaka meu tautauvata vakalevu cake kei na kokosi lailai oya. Au vakila ni vaka meu veilakoyaki voli e veikau niu via vunitaki au ka ni sega ni dua e taleitaki au. Au sega ni vakila se o cei koi au se na vanua au rawa ni yaco kina. Ena gauna au qai yaco yani kina ki vale, au kila ni dodonu me veisautaki e dua na ka. Au nanuma niu a vakasamataka, “Ni sa gauna ni tubu. Ena sega ni yaco tale vei au na ka oya.”

Sa tekivu meu kila ni ra tu wavoliti au eso era lomani au ka kauwaitaki au. Eratou sa tekivu taleitaki au na matabisopi ni noqu tabanalevu, ka vakakina na peresitedi ni noqu iteki, ka vakaitikotiko ena gaunisala vata ga au tiko kina. Eratou vakavulici au ena kosipeli. Eratou wasea vei au na nodratou ivakadinadina me baleta na dina ni iVakabula kei na Nona Veisorovaki vakamareqeti kei na veika e rawa ni cakava vei au. Eratou dau wilika wasoma vei au na italanoa kei Josefa Simici kei na nona raivotu ena Veikau Tabu. Ena vuku ni veika au a sotava oqori au sa vakaitovotaki au kina ena itovo talei ni kena wiliki na Josefa Simici—Ai Tukutuku e veimacawa. Ena noqu vakayacora vakakina, au kila ni rawa niu rawata na kaukauwa meu sotava rawa kina na veika kecega e biu e mataqu ena macawa ko ya.

Ena gauna oya ni noqu bula, ena gauna sara ga au gadreva kina e dua, a vakalougatataki au na Tamada Vakalomalagi. E kilai au ko Koya, ka tala mai na Nona italai me ra vukei au meu raica vakataki au. Era mokoti au e ligadra ka tukuna ena nodra ivalavala niu sega ni luveni ga rairai sabalia o au ia kevaka au bula kilikili ka muria na ivakaro ni Kalou, ena rawa niu yaco meu “tui ni tobu.” Na veivakalougatataki kei na kilai ni Veisorovaki sa tekivu me vakaikuritaka na noqu kaukauwa kei na yalodei.

Niu sa yabaki 16, era a vakayaloqaqataki au na turaga vinaka oqo meu taura e dua na veivakalougatataki vakapeteriaki. Niu taura oti ga na noqu ivolatara, au dabe ena noqu basikeli makawa ka vodoka yani me vica vata na maile ki na nona vale na peteriaki. E vakamacalataka tale se cava na veivakalougatataki vakapeteriaki kei na sala ena vakalougatataka kina na noqu bula. E vakotora na ligana e uluqu. Ni oti na veika oqori, sa veisau sara ga na noqu bula.

Au a ciqoma e dua na kaci ni kaulotu ki Sikoteladi kau sotava kina eso na ka vakasakiti. Ni oti e vica na macawa na noqu lesu mai ki vale, au a sotava na yalewa ka na qai watiqu e muri ena dua na soqoni ni Lotu. Keirau a gadi, kau kerea me keirau vakamau. Keirau a vakamau ena Valetabu e Salt Lake.

E dua na iyatuvosa ena noqu veivakalougatataki vakapeteriaki e tukuna ni na vakatarai vei au meu mai bula eke vata kei na dua na agilosi. Ena gauna a solia kina vei au na peteriaki na veivakalougatataki oqori, au sega mada ga ni kila se cava na agilosi, na ibalebale ni malanivosa oya sa qai yawa sara. Niu biuta mai na valetabu, ena siga keirau vauci kina kei na watiqu, au sa qai kila na kena ibalebale. Sa yaco me rarama tu ni noqu bula ko koya. Au vakavinavinaka vua, Sa vakatarai vei au meu bula tu ena dua na draki ni bula ni rarama. Sa kauta mai ko koya na reki kei na marau vei iratou na luvei keirau e lewe 8, 25 na makubui keirau, kei na 2 na makubui keirau vakarua. Sa yaco me ratou vakatokai koya kece na luvei keirau ko vakalougatataki. Au vakavinavinaka vua na Kalou ena veivakalougatataki ni kosipeli kei na veivakalougatataki tawamudu ni veiyalayalati kei na cakacaka vakalotu ni valetabu.

Ena segata ko Setani me da nanuma ni da luveni ga rairai sabalia ka sega ni rawa ni da yaco me vaka na Tamada Vakalomalagi kei na Luvena Tabu. Au vakadinadinataka ni lomani keda yadua na Kalou ena veisala digitaki eso. Me vaka sa dau cavuta wasoma ko Elder Neal A. Maxwell (1926–2004) ena Kuoramu ni iApositolo Le Tinikarua, “Na nona cakacaka ni veibuli na Kalou ena vakilai ena veitikina matailalai ni noda bula.”¹ O keda na Luvena. Sa yaco meu kila ni rawa ni da tubu ka sivita na ivakarau ni bula eda tu kina oqo ka yaco me “tui ka ranadi ni tobu” ena noda muria na ivakaro ni kosipeli.

Au kila e dua tale na ka. Au kilai iko kei na vanua ko lako mai kina. E taleva lesu vei keda na ivakatakila na noda yalodina ena bula taumada (raica na iVakatakila 12:7–11; V&V 138:56; Eparaama 3:22–23). Ni da semata na noda ivakadinadina ki na dina levu oya, sa yaco me ka ni veivakalougatataki talei vei keda yadua na veisiga yadua.

Toka ga ena nona yasana ni laini na Turaga. Kevaka a rawa Vua me kauwaitaka e dua na gonetagane mamadua vakataki au, ena kauwaitaki iko o Koya ena gauna oqo ka vakakina na veisiga ni mataka. O iko na luvena tagane se yalewa digitaki na Kalou. Digia mo bula me vaka na kaukauwa vakalou sa tu vei iko.