Susugi ni iTabatamata Tubucake Tiko Mai

O Elder Neal A. Maxwell (1926–2004) ena Kuoramu ni Apositolo Le Tinikarua: “Maroroi tu mai vua na Turaga me baleta na gauna oqo, [na itabatamata tubucake tiko mai] ena gauna oqo e dodonu me ra qarauni … ka vakarautaki me baleta na nodra gauna namakii ena itukutuku ni kawa-tamata! Era sa tarovi tu me ra lako mai ena gauna oqo, ia ena gauna oqo era gadreva me ra toso ki liu ka sota ena nodra gauna yalataki …

“O ira na itabagone era sega ni duidui mai vei ira na vakarau curuvou mai. Ena yaco eso na gauna ni vakatitiqa ka tekivu me vakatatiki yani na yalodra— kivua na Turaga se vakayawa sara mai Vua. E sega ni rawa ni da buli ira na gauna ni vakatulewa vakaoqo, ia na gauna e yaco kina, e dodonu me ra kakua ni vakasabusabutaki. E wasoma mai na kena sega, na veigauna vakaoqo ena dau yaco na veivosaki malua ka vakarokoroko vata kei ira na itubutubu; rau na tukanigone kei na buinigone, dua na bisopi, dua na iliuliu ni uabula, se dua na icaba yalododonu” (“Unto the Rising Generation,” Ensign, Apr. 1985, 8, 10).

O Elder Ronald A. Rasband ena Mataveiliutaki ni Vitusagavulu: “Era gadreva na noda itabatamata era se qai tubu tiko mai na noda sasaga uasivi duadua me ra tokoni ka vaqaqacotaki ena nodra ilakolako ki na bula vakaitabaqase. … Se na cava ga eda na cakava tiko, kei na veivanua kecega eda na lako kina, me da na kauwaitaka vakalevu cake na gadrevi ni veivakaqaqacotaki, veisusu kei na ivakaraitaki vinaka vei ira kece sara na itabagone Yalododonu Edaidai, eda na sotava.(“Na Noda iTabatamata Tubu Cake tiko mai,” Liaona, Me 2006, 47).

O Peresitedi Gordon B. Hinckley (1910–2008): “Kakua ni guilecava ni o ira na lalai oqo era luve ni Kalou tagane kei na yalewa ka ni nomu o iko na veisemati ni veimaroroi kivei ira, ni a dua o Koya na itubutubu ni bera na nomuni itubutubu ka se sega ni bau soro o Koya ena Nona dodonu vakaitubutubu se na Nona taleitaki ira Nona lalai oqo. … Susugi ira na luvemu ena loloma, ena veisusu kei na veivunauci ni Turaga. Qarauni ira nomuni lalai. Kidavaki ira ki na nomu lomanivale, ka veisusu ka lomani ira ena yalomu taucoko. E rawa me ra cakava, ena veiyabaki mai oqo, eso na ka o na sega ni vinakata me ra cakava, ia mo vosota. O na se sega ni guce ena balavu kece ni gauna o tovolea tiko kina” (“Words of the Living Prophet,” Liahona, May 1998, 26–27).

O Julie B. Beck, peresitedi raraba ni iSoqosoqo ni Veivukei: “Na veisusugi sa ikoya na veivakarautaki, veimaroroi, kei na veivakatuburi. … Na veisusugi e gadrevi kina na ituvatuva vakayalomatua, na vosota, na loloma, kei na cakacaka. Na vukei ni tubu ena gauna ni veisusugi sa dua dina na ilesilesi qaqa ka veivakauqeti era sa vakatikori kina na marama” (“O Ira na Tina Era Kila,” Liaona, Nove. 2007, 76, 77).

O Barbara Thompson, ikarua ni daunivakasala ena mataveiliutaki raraba ni iSoqosoqo ni Veivukei: “Oi keda na marama lewe ni iSoqosoqo ni Veivukei sa rawa me da veivukei ena kena vaqaqacotaki na matavuvale. Sa noda madigi me da veiqaravi ena veisala e vuqa. Ena so na gauna eda na sotavi ira kina na gone kei na itabagone era gadreva sara tikoga na veika sa tu me da solia. Oi kemuni na marama qase cake sa tu vei kemuni na veivakasala vivinaka kei na kila mo ni wasea yani vei ira na marama tina gone. Ena so na gauna e rawa ni dau cauraka mai e dua na iliuliu ni Goneyalewa se qasenivuli ni Lalai na veika sara ga e gadrevi me vaqaqacotaki kina na ka e via vakavulica tiko e dua na itubutubu. E dina o ya ni sega sara ni gadrevi me da vakaitutu vakalotu me da qai laki veivuke yani kivua e dua na itokani se dua e tiko tikivi iko” (“Au na Vakaukauwataki Iko; Kau na Vukei Iko,” Liaona, Nove. 2007, 117).