Na Veivakalougatataki ni Veiqaravi

Noqu vakabulabula ni oti na veisele lailai a sega soti ni rawarawa me vaka au a namaka. Ia me vaka niu peresitedi ni iSoqosoqo ni Veivukei ena tabanalevu, au vakila ni dodonu meu solia na veivuke kivei ira eso, era sega ni kerea mai. Ena mataka ni Moniti ni oti e tolu na siga noqu sele, au vakayadrati iratou na le vitu na gone ka vakavakarau ena laki vuli. Au lomatarotarotaka tiko kevaka me na tiko mada e vale na luvequ yalewa qase duadua me veivuke vua na gone lailai.

Ena kena curuma noqu vakasama na vakanananu oqo, a taqiri mai na lali ni katuba. Na noqu imatai ni daunivakasala ka itokani vinaka, o Vickie Woodard, a lako mai me veivuke. A kaya ni lako mai me mai caka panikeke. A laveta tiko e ligana e dua na beseni falawa sa uli tu ka taroga se evei na vanua e rawa me kunea kina e dua na itavuteke. Era sa marautaka na gone.

Ni oti na katalau, a kauti ira na gone o Vickie ki koronivuli, sasamaki, ka kauta na gone ki vale me yacova na gauna ni nona moce ena yakavi. E muri, ena noqu taroga se o cei e qaravi ira tiko na nona gone lalai, a kaya vei au ni o turaga watina e dau cegu ena vica na auwa ni nona cakacaka me rawa kina ni vukei au.

Nodrau veiqaravi o Vickie kei na turaga watina ena siga o ya a rawa kina ni totolo na noqu kaukauwa mai meu bulabula vinaka.

Ena dua na siga noqu a tiko duadua e vale vata kei na luvequ tagane gone duadua, au a vasiri ka lutu ena dua na ikabakaba. Yaco kina na mosi ni kete ena vica vata na siga, au a mani laki raica e dua na vuniwai.

Au a sa bukete tiko ena gauna o ya, a mani vakaraitaki mai ena noqu ilovi ni sa taluva tiko na noqu kato ni gone. Na ituvaki oqo e gadrevi kina na taucoko ni vakacegu, ke sega ena rawa me lutu na gone.

Au sa taqaya baleta ni tolu na luvei keirau gone lalai ka na sega ni rawa meu sauma e dua me mai veivuke. Ena nodra qai rogoca ga na marama taciqu ena noqu tabanalevu na noqu ituvaki, era sa lako sara mai me ra mai veivuke, ni se sega mada ga ni ra kerei. Era tuvalaki ira ki na tolu na iwasewase me ra mai vukei au ena mataka, yakavi, kei na bogi.

Era lako mai ka savasava, yayani, vakasaqa, sasamaki ka vukei ira na luvequ ena nodra vuli lesoni. E dua na marama o Rute na yacana, ka a papitaiso ena Lotu ena noqu a se davo tu ena tauvimate, a yaco me kilai-vakalevu sara ena neitou vale. O Rute, e nasi, e veivuke ena bogi ka qarava na veicula e gadrevi.

A sega tale ni yaga meu kerea e dua na ka, era vakaitavitaki ira na marama taciqu oqo ena veika au gadreva ka ra cakava na veika taucoko sara. Ena gauna sa levu sara era mai veivukei kina, ena mai dabe vata toka kei au e dua na marama. Era cakava tu oqo me tolu na vula.

O ira na marama taciqu oqo era solia vei au na kaukauwa, loloma kei na soli igu. Era solia nodra gauna kei na taledi. Era solibula me ra tiko e kea. E sega vakadua ni ra kerea e dua na ka me kedra isau. Era loloma ka ra veiqaravi, vakatotomuria na ivakaraitaki ni Turaga, ka vakatavulica vei keda, “Au sa kaya vakaidina vei kemudou, Ni kemuni a cakava vua e dua sa lailai vei ira na wekaqu oqo, ni a cakava vei au” (Maciu 25:40).

Ena nona a tiko mai vakabisinisi e Orlando, Florida, o Brandon, na turaga watiqu, a yadra mai ena dua na bogi ena tubu vakalevu ni nona katakata ka dredre me cegu. A qirita e dua na lori ni tauvimate me kauti koya ki valenibula, e kea a laki kila kina ni tauvi koya e dua na kisi bibi ni niumonia.

Baleta ni a dua tiko na luvei keirau tagane kei Brandon ka se qai vakatekivu lako tiko, au a sega kina ni rawa ni lako mai na neirau vale e Pennsylvania ki Florida. Au qiriti Bandon e veisiga, ena vakanuinui ni na torocake nona bula me rawa ni lesu tale mai vei keitou.

Ia, na ituvaki nei Brandon e sa toro sobu sara. Ena nona a cikevi au e dua na nasi meu lako mai ki valenibula ena gauna totolo duadua, au tekivu vakasamataka se o cei ena rawa me qarauni iratou neirau gonetagane.

A vakadonuya o tinaqu me cegu mada mai ena nona cakacaka ka kaya ni na rawa me lako mai ena gauna totolo duadua e rawata, ia na waqavuka au gadreva meu vuka kina e sa na biubiu oti ni bera nona qai yaco mai. Au qiria e vica noqu itokani me laurai kevaka e rawa me ra mai raici iratou toka na gonetagane me yacova ni yaco mai o tinaqu. E dua na itokani o Jackie Oldsk, mai na iSoqosoqo ni Veivukei, e kaya ni na marautaka me mai vakaraici iratou toka.

“Kauta ga mai nodratou isulu kei na daipa,” a kaya, “au na qai maroroi iratou tiko ena levu ga ni siga o gadreva mo lako tu kina.”

Sa tekivu meu cata baleta ni marama oqo, e tolu tiko mada ga na luvena gone, e dua na bula osooso, ia e cikeva vakaukauwa tikoga mai. Ena noqu sa mai talaci iratou na gonetagane ena dua na gauna lekaleka, a vakacegui au ena nona kaya, “Kakua ni leqataki iratou. Leqataka ga me bula vinaka o Brandon ka kauti koya mai vale. Au sa dau meimei tu e liu vei ira na se qai vakatekivu lako.”

Au sa kila sara ni o iratou na gonetagane eratou na taqomaki, marau, ka ratou na qarauni vakavinaka, a qai vakakina. A qai rawa meu tiko vata kei na turaga watiqu, ka a tauvimate bibi koto ena gauna au yaco yani kina ki valenibula. Ia ni oti ga e vica na siga, sa bula vinaka sara ka rawa me sa lesu tale ivale.

Au vakavinavinakataka e dua na itokani vinaka ena nona a dolele mai—me sivia sara yani na veika au a kerea vua—vakakina na nona veiqaravi vei keirau ena gauna ka gadrevi kina.

O Baraca Anderson, na peresitedi bulabula yabaki 35 ni Cauravou ena tabanalevu, sa ikoya e dua na mataqali iliuliu ni itabagone eda dau vakasakita: kaulotu oti; lima na luvena, taukei ni bisinisi, yalo vakagone. Ia oqo e sa tauvi lukimia. Ena kena ciqomi oti na itukutuku oqo mai vua na bisopi, o Ryan Hill, na imatai ni ivukevuke ni kuoramu ni bete, sa tekivu yavala, kacivi ira vakayadua na bete era bulabula kei ira era sa luluqa ena nona kuoramu.

“Eda sa na lako ki valenibula me da laki sikovi Baraca Anderson. Keitou gadrevi kemuni vakayadua. E rawa mo lako mai?” e vakaruataka na gauna ni kaci vakayadua.

“Sega ni macala seu na rawata,” kaya e dua na bete. “Au na gadreva meu laki cakacaka.”

“Ia keimami na waraka nomu suka mai na cakacaka,” sauma o Ryan. “Sa ikoya oqo e dua na ka ka dodonu me da cakava vata.”

“Sa Donu,” a kaya na lewe ni kuoramu. “Au na raica kevaka e rawa meu veisau cakacaka vata kei na dua tale.”

Era lako taucoko ki valenibula na lewe 11 na bete. O ira era luluqa tu kei ira ka ra sega vakadua ni calata na soqoni ni Sigatabu era a tiko kina. Era duavata, ena veidredrevaki kei na tagi ka masu ka tuvatuvalaki me baleta na gauna sa bera mai. Ena veivula ka tarava, era vagaunataka nodra masia na yavai Baraca Anderson ena gauna e sa dredre kina ni drodro vakavinaka na dra, e dui tu nodra gauna yadua ni soli dra ena veiyarua na auwa me ra solia ga na nodra dra, ka ra draiva me 20 na maile (32 km) ena gauna ni danisi ni koronivuli vata kei ira na goneyalewa era sureta me ra laki danisi vata (okati kina e rua na goneyalewa erau sega ni lewe ni Lotu) ena yasa ni nona loga ivalenibula me rawa kina vua me wasea kei ira na veika era sotava ena koronivuli toro cake.

Ena vica nona siga sa vo, a kerei ira o Baraca Anderson me ra kaulotu, vakamau ena valetabu, ka veitaratara tiko vakai ira. Ni sivia e dua na daseni na yabaki e muri, lesu mai vale ni cava na kaulotu, vakamau ena valetabu, ka tekivutaki nodra dui matavuvale, era vakananuma lesu tikoga na icavacava ni veika a sotavi vakayalo ena veiqaravi vata taucoko kei na nodra iliuliu daulomani.