ʻE Lava Nai Ke u Tāpuni ʻEku Pisinisí he Sāpaté?

Hili ha uike ʻe tolu mei heʻeku fakaava hoku lotó, maʻu ʻa e ongoongoleleí, mo fai ʻa e fili mahuʻinga ke u papitaiso ʻi he 2001, ne u ʻalu ai ki ha kalasi Lautohi Faka-Sāpate ʻa ia ne mau aleaʻi ai hono mahuʻinga ke tauhi e ʻaho Sāpaté.

ʻI heʻeku hoko ko e taha ʻoku ʻi ai ʻene pisinisi lelei mo tokolahi ʻene kau ngāué, kuo laka hake he taʻu ʻe 20 ʻeku ngāue he Sāpaté. Ka ʻi heʻene mahino ko ʻeni kiate au hono mahuʻinga ʻo e ʻaho ko ʻení, naʻá ku pehē leva ke u fakahā ki heʻeku kau pulengāué ʻe toko tolu he ʻikai ke mau toe ngāue ʻi he Sāpaté.

Hili ha ngaahi uike siʻi mei heʻeku fakahā ʻa ʻeku tuʻutuʻuní, kuo talamai ʻe heʻeku kau pulengāué ʻe toko tolú ʻoku ʻi ai ha kau fakatau vili taʻeʻunua, ko e tokolahi tahá ko ha kau faiako, ʻoku nau ʻeke pe te mau toe fakaava homau ngaahi falekoloá he Sāpate hono hokó. Naʻá ku ngāue ʻi he pisinisi lolé ʻi Pāpanitila (Papantla), pea naʻe fie maʻu ʻe he kakaí ke nau fakatau ha lole mo ha piñatas ko e teuteu ki he El Día del Niño (ʻAho ʻo e Fānaú), ʻa ia ʻe fakamanatua ia ʻi he Mōnite hono hokó. Ko e ʻAho ʻo e Fānaú, ʻoku hoko ia ʻi he ʻaho 30 ʻo ʻEpelelí ʻi Mekisikou, pea ʻoku fakahoko ai ʻe he ngaahi akó ha ngaahi fakafiefia mo ha ngaahi vaʻinga, pea maʻu ʻe he fānaú ha lole.

Naʻá ku talaange ki heʻeku kau pulengāué, “ Te u toki tala atu ʻapongipongi, he Tokonakí.”

ʻI heʻeku aʻu atu ki ʻapí, naʻá ku talaange ki hoku uaifí ʻa e meʻa ne hokó. Naʻá ku ʻamanaki ʻe pehē mai, “Fakaava ʻe koe. He ko hono moʻoní ko e kiʻi Sāpate pē ʻe taha.” Ka naʻe ʻikai ko ʻene talí ia.

Naʻá ne fakahā mai ʻi ha leʻo mālohi, ko e ʻulu au ʻo e fāmilí pea ko e fili pē ia ʻaʻaku. Ka naʻá ne toe fehuʻi mai leva kiate au, “Kapau ʻe tala atu ʻe ha taha ko e Sāpate ko iá, te ke maʻu ai ha koloa lahi pe ko haʻo talitali hoʻo Tamai Hēvaní, ko e fē te ke filí?”

Naʻe tokoni ʻene fehuʻí ke u fakatokangaʻi ai hono mahuʻinga hono tali ʻo e ʻEikí ʻi he Sāpate kotoa peé, pea ne u ʻilo leva kuo pau ke u tuʻu maʻu ʻi heʻeku tuʻutuʻuní. Ko e meʻa mahuʻinga taha te tau lava ʻo fai he Sāpaté ko e fakaʻapaʻapa ki he ʻEikí, pea talu mei ai, kuo teʻeki ai ke mole ha faingamālie meiate au ke u fakahoko ai ia.

Kapau te tau fakamuʻomuʻa ʻa e ngaahi meʻa ʻa e ʻEikí ʻo laka ange ia ʻi he ngaahi meʻa ʻa e tangatá, ʻe foaki mai ai kiate kitautolu ha fakamoʻoni ki he ʻaho Sāpaté. Kuo hanga ʻe heʻemau tauhi ko ia ʻa e ʻaho Sāpaté, ʻo tāpuekina lahi hoku fāmilí, pea pehē ki heʻeku pisinisí. ʻOku ou fakatauange pē te tau lava ʻo maʻu ʻa e ngaahi tāpuaki ʻo hono tauhi ʻo e ʻaho Sāpaté.