Kiʻi Foʻi Ngāue Angaʻofa

ʻOku ʻikai lavelaveʻiloa ʻe ha taha ʻa e meʻa ʻe ala fakatupu ʻe ha kiʻi foʻi ngāue angaʻofa. Lolotonga ʻeku ngāue ʻi ʻAkuili ʻi he Misiona Naisīlia Lakosí ʻi Sānuali ʻo ha taʻu ʻe taha, naʻe ʻi ai haʻaku kiʻi meʻaʻofa naʻá ku fie foaki ki ha taha. Naʻá ku fifili ai ʻo pehē, “Ko hai te u lava ʻo foaki ki ai ʻeni ʻe ʻaonga kiate ia?” Naʻá ku ʻalu mo e meʻaʻofá ki he lotú ʻi ha Sāpate hokohoko ʻe ua, ka naʻe ʻikai ke u fakapapauʻi pe ko hai.

ʻI he Sāpate hono tolú, naʻá ku ʻalu ai ki he lotú mo fakakaukau pē te u ʻoange ʻeni ki haku kaungāmeʻa lelei. Ka naʻe ʻikai ke haʻu ia ki he lotú he ʻaho ko ʻení, peá u maʻu ha ongo ʻoku fie maʻu ia ʻe he taha kehe. ʻI heʻeku vakavakai takai he falelotú, naʻá ku fakatokangaʻi ha kiʻi tamasiʻi naʻe ʻikai kau ki he Siasí ʻene ongo mātuʻá. Naʻe fotu ngali taʻelata. Naʻá ku ongoʻi ke foaki ange maʻana ʻa e meʻaʻofá. Naʻá ku foaki ange kiate ia peá u ongoʻi loto fiefia ʻaupito.

Naʻe hoko heni ha meʻa fakaʻofoʻofa. Naʻe haʻu ki he lotú ʻene fineʻeikí he Sāpate hono hokó. Naʻe fakamālō mai kiate au ʻi he meʻaʻofá. Naʻá ne pehē mai, “Naʻá ku toutou palōmesi ange ki heʻeku tamasiʻí te u haʻu ʻi ha ʻaho ki he lotú. ʻOku ou haʻu he ʻaho ní ke fakahoko atu ʻeku houngaʻia ʻi he meʻaʻofá.” Ko e founga ia ʻeku feʻiloaki mo hoku hoá pea mo e fefiné ni; talu mei ai, kuó ne ʻosi kau ki he Siasí. Naʻe fiefia lahi moʻoni ʻa e kiʻi tamasiʻí ʻi he faifai pea mamata kuo papitaiso ʻene fineʻeikí.

ʻOku ou ʻilo ʻoku lava ʻi he fanga kiʻi founga īkí ke fakahoko ha ngaahi meʻa lalahi.