Meʻa Mahuʻinga he Temipalé
Temipale Kātisitoni ʻAlapetá
Naʻe tāpuakiʻi ʻe Palesiteni Siosefa F. Sāmita (1838–1918) ʻa e konga kelekele ki he temipale ʻi Kātisitoni ʻAlapetá ʻi Kānata he ʻaho 27 ʻo Siulai 1913. Ko e konga kelekele ia ʻo e tāpanekale motuʻá, naʻe fuofua foaki ki he Siasí ʻe Sālesi ʻOla Kaati (Charles Ora Card), ʻa ē naʻá ne kamata nofoʻi ʻa e koló he 1887, ʻi he taimi naʻe fuofua tūʻuta mai ai ʻa e Kāingalotu hikifonuá. Ko ʻEletā Tēvita O. Makei (1873–1970) leva ʻo e Kōlomu ʻo e Kau ʻAposetolo ʻe Toko Hongofulu Mā Uá naʻá ne fakatoka ʻa e makatulikí he ʻaho 19 ʻo Sepitema 1915. Naʻe fakatapui leva ʻe Palesiteni Hiipa J. Kalānite (1856–1945) ʻa e falé he ʻaho 26 ʻo ʻAokosi 1923.
Naʻe langa ʻa e temipalé ʻaki ha maka kalāntie lanu kilimi mei he ngaahi keliʻanga maka ofi ki Nilasoni ʻi Pilitānia Kolomupiá. ʻI heʻene hoko ko ha kolotau mālohi ʻo e ʻOtuá ʻi he ivi fakalaumālié pea pehē ki hono fōtunga ki tuʻá, ʻoku maʻu ai ʻe he Temipale Kātisitoni ʻAlapetá ha ʻata fakaʻofoʻofa ki he toafa mohuku ʻo Kānatá mei ha tapa pē mei Kātisitoni.
ʻI he hoko ʻa ʻEletā Tēvita O. Makei ko ha ʻAposetoló, naʻá ne fakatoka ai e makatuliki ʻo e Temipale Kātesitoni ʻAlapetá ʻi he 1915.
Ko e taha ʻo e ngaahi fōtunga fakaʻofoʻofa ʻo e temipalé ko ha pēnolo kuo tongitongi ʻoku fute ʻe 33 hono fālahí (mita ʻe 10) ʻoku ʻi he tafaʻaki fakahahaké. ʻOku fakafōtunga ʻe he tā-tongitongí hono foaki ʻe he Fakamoʻuí ʻa e vai ʻo e moʻuí ki he fefine Samēliá ʻi he veʻe vai tupú.