Liga ni Veivukei, Liga ni Veivakabulai

Kemuni na taciqu kei na ganequ, au vakavinavinakataka vakalevu na madigi ni mai vosa ena koniferedi oqo. Au vakavinavinaka vei Peresitedi Thomas S. Monson, ka vakadinadinataka ni o koya e dua na parofita ni Kalou ka bula tiko. Au vakauqeti vakalevu sara ena ivakaraitaki totoka nei Peresitedi Monson, ni solia na nona bula me dodoliga yani me veivuke ka vakabulai ira na tani.

Eda bula donuya tiko na gauna era sa sotava tiko kina e vuqa na tamata na leqa tubukoso lelevu ka ra gadreva tu na veivuke ena vuku ni veivakacacani ni uneune, sunami, cagilaba, kei na vakaleqai ni vanua tale e so. Sa dodoliga yani na Lotu ena nodra vukei na tamata ena veivuke raraba. Era solia ena yalodina na lewe ni Lotu na nodra isolisoli ni lolo ena veivula kei na veiqaravi ena yalo ni loloma. Era dodoka yani na ligadra dauveivukei ena sala ni Turaga. Era muria na ivakaro ni Turaga me ra “nanumi ira tiko na dravudravua kei na luveniyali, na tauvimate kei ira sa vakaleqai tu, ia ko koya sa sega ni kitaka vakakina, sa sega ni noqu tisaipeli” (V&V 52:40).

Au na via vosa nikua baleta na liga sa dauveivukei ka veivakabulai vakayalo. Na cakacaka kei na lagilagi dina ni Turaga o ya “me ra tucaketale mai na mate na tamata kecega ka rawata na bula tawamudu” (Mosese 1:39). E vuqa era tiko volekati keda era gadreva me ra vukei vakayalo. Ni da dodoka yani na ligada veivakabulai vei ira sa luluqa tu vakalotu, lewenilotu duadua ena matavuvale, kei ira era sega ni lewenilotu, eda sa sureti ira kece me ra “lako mai vei Karisito.”¹

Oi au e dua na curuvou ena Lotu, ka a yaco vei au na veivakabulai vakayalo mai na liga ni veivakabulai ni dua na lewe ni Lotu yalodina. Au a tubu cake e Matsumoto, Japani, ka volekata na vanua a vakayacori kina na Olimipiki ni Vulaibatabata e Nagano. Na noqu taoni e vakataka na irairai kei Salt Lake City, ni wavokita na kena buca na veiulunivanua totoka. Niu se qai yabaki 17, au a sotavi rau o Elder Carter kei Elder Hayashi, na daukaulotu mai Amerika. E dina ga ni veisivi toka ga ena rua se tolu na yabaki na neitou bula, e tiko vei rau na daukaulotu oqo e dua na ka totoka au sega mada ni se bau vakila e liu. Erau gugumatua, mamarau ka vakasinaiti tu ena loloma kei na rarama. Au vakauqeti sara vakabibi ena nodrau ivakarau, kau vinakata sara meu vakataki rau. Au a rogoca na nodrau itukutuku kau sa nanuma meu papitaiso. Erau saqata vakaukauwa sara na noqu itubutubu lotu Budha, na noqu papitaiso. Ena nodrau veivuke na daukaulotu kei na Turaga, au a vakadonui ka veivakurabuitaki sara na noqu sa papitaiso.

Ena yabaki e tarava au a curu ena univesiti e Yokohama. Niu tiko duadua, ka yawa sara mai noqu vanua kei ira au kila, au a galili ka gole tani mai na Lotu. Ena dua na siga au a taura e dua na ivola mai vua e dua na lewe ni Lotu mai noqu vanua. A vola mai ni rogoca niu sa sega tiko ni gole ki na soqoni ni Lotu. A vola mai e dua na tikina ena ivolanikalou ka sureti au meu lesu ki lotu. Au a luvuci dina ena vosa ni ivolanikalou o ya. A vukei au na ka oqo meu kila rawa ni sa rairai yali mai vei au e dua na ka bibi, kau a vakasamataka ka vakayavalati toka ena vuqa na siga. A vukei au talega meu nanuma na nodrau yalayala vei au na daukaulotu: “Kevaka mo na wilika na iVola i Momani ka kerea ena yalodina ena masumasu kevaka e dina na yalayala e tiko ena Moronai, ko na kila na ka dina ena kaukauwa ni Yalo Tabu.”²

Au sa qai kila niu a sega ga ni masu ena yaloqu dina taucoko kau sa gadreva sara meu sa na cakava. Ena dua na mataka au a yadra vakatotolo, tekiduru ena noqu rumu, ka masu ena yalodina. Au kurabui, ni yaco mai vei au na veivakadeitaki ni Yalo Tabu me vaka sa yalataki tu. E katakata na lomaqu, au a sautaninini, kau vakasinaiti ena marau. Ena kaukauwa ni Yalo Tabu, au sa kila kina ni rau bula tiko na Kalou na Tamada kei na Luvena, o Jisu Karisito, ka Rau a rairai dina vei Josefa Simici. Au sa vakadeitaka kina e yaloqu meu sa veivutuni ka muri Jisu Karisito ena yalodina ena vo ni noqu bula.

Na veisotavi vakayalo oqo e veisautaka vakadua na noqu bula! Au sa digitaka kina meu laki kaulotu me noqu vakavinavinaka vua na Turaga, vakakina vei koya na lewe ni Lotu ka a vakabulai au. Ni oti na noqu kaulotu, au a laki vauci e valetabu vata kei na dua na goneyalewa totoka ka keirau a vakalougatataki ena va na luvei keirau. A sega ni vakacala ka, ni oqo na goneyalewa vata ga a volavola yani vei au ena noqu itikotiko galili o ya mai Yokohama ena vuqa na yabaki sa oti. Au sa vakavinavinaka tawamudu ki na loloma vakalou ni Turaga kei na nona veivuke na lewe ni Lotu, ka a sureti au tale meu “lako mai vei Karisito.”³

Au kila ni vuqa vei kemuni ko ni dau dodoliga lo tu yani ni loloma kei na veivakabulai ena veisiga yadua. E oka kina e dua na marama yalodina ni iSoqosoqo ni Veivukei e sega walega ni dau qaravi ira na marama e lesi me sikova ia kivei ira talega na marama era tauvimate se gadreva tu me ra vukei. E dau veisiko vakawasoma ka vuqa na yabaki na nona sa vaqaqacotaka rawa na nodra vakabauta e vuqa. Au vakasamataka e dua na bisopi e dau sikovi ira na yada kei na dawai ena nona tabanalevu. Na ivakarau ni veivukei vakaoqo e tomana tikoga ena vuqa na yabaki ni nona sa vakacegui oti.

Au kila e dua na iliuliu ni matabete e dau laki veimaliwai vata kei na dua na cauravou sa mate o tamana. E dau tiko vata kei koya ena itaviqaravi, vakavulici koya ena kosipeli ka vakasalataki koya me vaka ga ena dau vakayacora o tamana. E dua tale na matavuvale e ratou marautaka na wasea na kosipeli. E ratou soli ivakadinadina ni kosipeli na itubutubu kei iratou na gone vei ira era tiko voleka ka ra taleitaki iratou e vuqa na tamata.

Me tiki ni itaviqaravi ni Lalai, me na biuta o makubuqu yalewa yabaki lima e dua na sore ni sila ena dua na tavaya levu ena veigauna yadua e caka vinaka kina. Ena lagata e cake na sere ni Lalai oqo ni vakasaqara tiko na veika vinaka me na cakava ena veisiga: “Muri parofita, muri parofita, Muri parofita; ni sa kila.”⁴

E sega na gauna meu tukuna vei kemuni ni vuqa na veika vinaka taucoko au raica era cakava na lewe ni Lotu. Era muria na nodra ivakasala na parofita—sega ni sa itavi se ilesilesi ia ena nodra gagadre dina, vakaiira ga ena mamarau.

Eso na gauna eda vakila ni da sa malumalumu ka yalolailai meda vukei ira na tani, ia e vakavotuya vei keda na Turaga,“Au sa qai kaya vakaidina vei kemuni, Ni kemuni a cakava vua e dua sa lailai vei ira na wekaqu oqo, ni a cakava vei au” (Maciu 25:40).

Meu tinia ena vosa nei Peresitedi Thomas S. Monson: “Taciqu kei na ganequ, eda sa vakavolivoliti tu oqo mai vei ira era gadreva tu na noda veikauwaitaki, na veivakayaloqaqataki, noda veitokoni, na noda veivakalomavinakataki, na noda yalovinaka—era lewe ni noda matavuvale, itokani, veikilai, se vulagi. Eda sa liga ni Turaga e vuravura edaidai kei na itavi ni veiqaravi ka vueti ira cake na luvena. Sa vakararavi tu mai vei keda o Koya.”⁵

Me da na muria na ivakasala kei na ivakaraitaki ni parofita ka vakasaqarai ira era leqa tu ena veisiga, me da sa na liga kina ni Turaga ena nodra vukei ka vakabulai na luvena, sa noqu masu oqo ena yaca i Jisu Karisito, emeni.