O Ira Era Vosa Vei Ira na iTabagone

Sa vakanuinuitaki vei keda na matabete ka meda na veiqaravi ena yaca ni Kalou. Sa tu oqo vei keda e dua na veivakabauti e vakalou. Sa levu sara na ka sa nuitaki vei keda… . Meda vakasamataka na noda ilesilesi, dikeva na noda itavi ka muri Jisu Karisito na noda Turaga.

Peresitedi Thomas S. Monson, “Na Vakavakarau ena Kauta mai na Veivakalougatataki,” 64.

Ena vica na macawa sa oti, au a raica e dua na dikoni vou ni sa tekivu me muria na salatu ni gugumatua. A vakaraitaka vei au o tamana e dua na daiqaramu a cakava o luvena tagane ka vakaraitaka tiko kina na iyatu yadudua ena nodratou valenilotu, ka dua na naba ena soli ki na dikoni yadua me vota na sakaramede, kei na na nodra iyatu me ra muria ena loma ni valenilotu me ra vota yani na sakaramede vei ira na lewenilotu. Keirau dredre ni keirau vakasamataka ni rawata oqo e dua na gonetagane, ni sega ni tukuni vua, ka me cakava e dua na ituvatuva me raica sara me gumatua cake ena nona cakacaka ni matabete.

Au raica rawa ena nona gugumatua oqo na ivakarau e tiko ena ivola lailai vou ni iTavi Vua na Kalou. O ya mo vulica na veika sa namaka tiko vei iko na Turaga, cakava e dua na ituvatuva mo rawa ni vakayacora ka cakacakataka kina na nomu ituvatuva ena gugumatua, ka wasea vei ira na tani na kena sa veisautaki iko na ka oqo ka sa vakalougatataki ira tale eso.

Peresitedi Henry B. Eyring, iMatai ni Daunivakasala ena Mataveiliutaki Taumada, “Cakacaka ena Gugumatua Kecega,” 60.

Sa dodonu me ra kila na lewe ni Lotu uabula ni veika e gadrevi ena Torocake Yadudua kei na iTavi Vua na Kalou e sega ni ituvatuva balavu ni veika me toqai walega. Oqori na sasaga ni tamata yadua ka ra biuta na cauravou kei na goneyalewa me vukei ira me ra kilikili ena ciqomi ni cakacaka vakalotu ni valetabu, veiqaravi ni kaulotu, curuma yani na vakamau tawamudu, ka marautaka na bula vakacerecerei. Ia me kilai tiko: ni ra tovolea na cauravou kei na goneyalewa me ra vakacavara ga vakataki ira na veisasaga oqo ena dua na lusi levu kei na leqa!

Kemuni na tama, tina, kei na veiliutaki ni itabagone, keimami vakauqeti kemuni mo ni vakaitavi ena Torocake Yadudua kei na iTavi Vua na Kalou vata kei ira na luvemuni kei ira na itabagone. E sega walega ni ra tubu kina o ira, o kemuni na tubu talega. Sa ka bibi sara talega vakakina, ni ko ni na tubu cake vata ena dua na ivau ni vakabauta kei na veitokoni ka na rawa kina vei kemudrau mo drau veivaqaqacotaki vakataki kemudrau ena vakabauta kei na veitokani ka tiko tawamudu ena gaunisala ni kosipeli.

Elder Robert D. Hales ena Kuoramu ni iApositolo Le Tinikarua, “Na Noda iTavi Vua na Kalou: Na Noda iTavi na iTubutubu kei na iLiuliu ki na iTabatamata Tubucake Tiko Mai,” 95.

Sa nomuni na buturara, kemuni na gonetagane lomani ena Matabete i Eroni. Ko ni sa vakarau tu beka ka lomasoli mo ni vakayacora na nomuni itavi? E gadreva na Turaga na cauravou kece e rawa me ra vakavakarau ka yalataki ira tale, me tekivu ena bogi nikua, mo ni kilikili kaya na veikacivi mai vua e dua na parofita ni Kalou me ra laki kaulotu.

Elder Ronald A. Rasband ena Vitusagavulu, “Nona Veikacivi Vakalou e Dua na Daukaulotu,” 51.

Me vaka ni o ni dikoni, ivakavuvuli, ka bete, o ni na vakaitavi ena veiitaviqaravi ka na vukea na nomuni taracake na igu vakayalo ka vulica ka qarava vakavinaka na nomuni itavi ni matabete. Na itaviqaravi yadua ena vakamuria ga na ivalavala rawarawa oqo:

Taumada o na vulica e dua na ivakavuvuli ni kosipeli se dua na itavi ni matabete. O na kila na ka e vinakata na Tamada Vakalomalagi mo vakayacora, ka segata mo rawata e dua na ivakadinadina vakayalo ni vuna e bibi kina.

Tarava o na tuvalaka mo cakava na veika o sa vulica. O sa vakayaloqaqataki mo yavutaka na nomu ituvatuva ena nomu gagadre, nomu tuvaki ni bula, kei na madigi mo qaravi ira kina na tani. Oqo e dua na gauna vinaka mo vakaitavi kina ena nomu tubu vakataki iko ka tara cake na bula rawati koya vakayalo.

Oti mo qai wasea na veika o sa vulica ka sotava vei ira na tani. Ni o vakayacora vakakina, o na vaqaqacotaka na nomu ivakaidinadina ka tara cake na vakabauta vei ira era tu wavoliti iko. Ena vakalevutaka cake na nomu rawata mo veitalanoataka na kosipeli vata kei ira na tani… .

… Au vakadinadinataka ni nomuni veiqaravi ena yalodina ena Matabete i Eroni ena veisautaka na nodra bula o ira o ni qaravi ira. Era tu eso na tamata era gadreva na nomuni veiqaravi vakamatabete. Era gadrevi kemuni na nomuni matavuvale. E gadrevi kemuni na nomuni kuoramu. E gadrevi kemuni na Lotu. E gadrevi kemuni ko vuravura.

David L. Beck, peresitedi raraba ni Cauravou, “Na Matabete i Eroni Vakasakiti,” 54.

Sa vakarautaki tu na ivakamacala me baleta na parokaramu ni iTavi Vua na Kalou ena vuqa na vosa ena DutyToGod.lds.org.

Ena imatai ni tabana ni nomu ivolalailai ni Torocake Yadudua ni Goneyalewa ko na raica kina na malanivosa oqo: “O iko e dua na luvena yalewa vakamareqeti na Tamada Vakalomalagi, o a vakarautaki mo qai lako mai ki vuravura ena gauna oqo me baleta e dua na inaki tabu ka lagilagi.”

Sa dina sara na vosa oqori, kemuni na ganequ! Era sega ni tekivutaki ena dua na italanoa buli! E sega beka ni ka talei dina meda kila ni Tamada Vakalomalagi e kilai kemuni, rogoci kemuni, wanonovi kemuni tiko, ka lomani kemuni ena dua na loloma e tawa yalani? Na ka dina, na Nona lomani kemuni sa ka cecere sara ka a solia mai vei kemuni na bula ena vuravura oqo me dua na iloloma totoka “ena dua na gauna sa oti,” e vakataucokotaki kina na kemuni italanoa dina ni ilakolako, vakatovolei, kei na veimadigi mo ni cecere kina, vakaranadi, yaloqaqa, ka loloma. Ka kena lagilagi duadua, e solia o Koya vei kemuni na iloloma e sega ni voli se vakasamataki rawa. E solia tu vei iko o Tamada Vakalomalagi na iloloma cecere duadua—o ya na bula tawamudu—kei na madigi kei na veivakalougatataki tawayalani ni nomuni “bula marau ka tawamudu.”

Peresitedi Dieter F. Uchtdorf, iKarua ni Daunivakasala ena Mataveiliutaki Taumada, “Na Nomu Bula Marau ka Tawamudu,” 124.

Oi kemuni na goneyalewa ni Lotu i Jisu Karisito ni Yalododonu Edaidai, ni namuma tiko se o cei o kemuni! Ko ni sa digitaki. Ko ni sa luvena yalewa na Kalou. Mo ni kakua ni dua na itabagoneyalewa ka lomavinakataka nona sa rauta toka, ka yaloqaqa ga mo ni laurai ka kilai mo ni “tucake ka rarama mai, io me cila yani na nomudou rarama me ivakaraitaki vei ira na veimatanitu” (V&V 115:5). Ena saga o vuravura mo vakabauta ni ko sega ni dua na ka—ni ko ni ka ni gauna makawa ka dredre me tarai. E vosa tiko o vuravura vei kemuni ena domo e vaqaseqasea, ka kosakosa mo ni “vakatautaka tu ga,” “tovolea na ka kecega,” “cakava ka marautaka.” Ena kena veibasai, e dau vakasolokakana na Yalo Tabu ena domo lailai ka vinaka ka sureti kemuni tiko na Turaga mo ni “yalodina ka caka dodonu,” “kakua ni domona na iyau vakavuravura,” “ka nanuma tiko na [nomuni] veiyalayalati” (V&V 25:2, 10, 13).

Elaine S. Dalton, peresitedi raraba ni Goneyalewa, “Nanuma Tiko O Cei O Iko!” 120.

Na Torocake Yadudua ena vakarautaka e dua na sala veivakurabuitaki vei iko mo vakania kina vakaikalawa na nomu ivakadinadina. Na veika yaga o sotava kei na cakacaka era ikalawa lalai ka na vakania na nomu ivakadinadina me baleti Jisu Karisito ena nomu vulica na Nona ivakavuvuli ka vakayagataki ira wasoma ena nomu bula. Na veivakani vagauna oqo ena taqomaki iko e gaunisala.

Mary N. Cook, imatai ni daunivakasala ena mataveiliutaki raraba ni Goneyalewa, “Kakua, Kakua, Kakua ni Soro!” 117.

Ni na tiko vata kei keda na Turaga ka na sega ni biuti keda taudua tu. A vakavulici vei keda ni Tamada Vakalomalagi e kilai ira na Luvena yadua ka lomani ira. Me vaka ko ni dua na luvena yalewa talei, sa rawa me nomu na Nona veivakadeitaki kei na veidusimaki ena kaukauwa ni masu.

Ann M. Dibb, ikarua ni daunivakasala ena mataveiliutaki raraba ni Goneyalewa, “Mo Yaloqaqa,” 114.

Me baleta na ikuri ni ivakamacala ni Torocake Yadudua, gole ki na PersonalProgress.lds.org.