Vukei Ira Ena Nodra iLakolako ki Vale

Kemuni na taciqu kei na ganequ, na Tamada Vakalomalagi e vinakata ka gadreva na noda veivuke ena nodra kau lesu tale yani ki Vua e vale o ira na Luvena vakayalo. Au vosa nikua me baleti ira na itabagone ka ra sa tiko rawa ena loma ni Nona Lotu dina ka ra sa tekivu lakova na sala qiqo ka rabailailai me ra lesu kina ki na nodra vale vakalomalagi. E vinakata o Koya me ra rawata totolo na igu vakayalo me ra na tiko kina e gaunisala. Ka gadreva ko koya na noda veivuke me da kauti ira lesu mai ki na gaunisala kevaka era sa tekivu lako sese.

Au se bisopi gone ena gauna au sa tekivu raica kina vakamatata na vuna e vinakata kina na Turaga vei keda me da vaqaqacotaki ira na gone ni ra se gone sara ka vueti ira mai vakatotolo. Au na tukuna mada vei kemuni na kena italanoa e dua na goneyalewa ka matataki ira e vuqa au sa tovolea oti meu vukea ena veiyabaki.

E dabe o koya mai na yasa kadua ni noqu desi ni bisopi. E tukuna vei au na nona bula. Sa papitaiso ka vakadeitaki oti me lewe ni Lotu ni se yabaki walu. E sega ni dua na wainimata e matana ena nona talanoataka na 20 vakacaca na yabaki e tarava, ia e rarawa na domona. E tukuna na lako ki na ivalavala ca e tekivu ena nona digitaka me veitokani kei ira eso ka nanuma ni ra tamata taleitaki. Sa tekivu me voroka ena imatai ni gauna na veika a nanuma ni ra ivunau lalai.

A vakila taumada eso na rarawa lalai kei na kilai yalona ni nona cala. Ia na nona veimaliwai kei ira na nona itokani e vakila kina na nona taleitaki, ka sa sega soti ni dua kina na ka na yalo ni veivutuni a dau basika mai vagauna. Ni sa toso cake tiko na bibi ni ivunau e voroka, sa seyavu yani na tatadra me dua na matavuvale tawamudu ka mamarau.

Keirau a dabe veibasai ka vakatoka na yalo e vakila me yaluma. E vinakata meu vueti koya mai na icori ni ivalavala ca ka kunea ni sa vesuki tu kina. Ia na sala duadua ga me lako tani mai kina sa ikoya me cakacakataka na nona vakabauti Jisu Karisito, me yaloraramusumusu, me veivutuni, ka yaco me vakasavasavataki, veisau, ka vaqaqacotaki ena Nona Veisorovaki na Turaga. Au wasea vua na noqu ivakadinadina ni se rawa tikoga. E vakadina kina, ia e dredre sara vakalevu, kevaka walega me a sa cakacakataka tiko mai na nona vakabauta ni se gone ena nona ilakolako ki vale vua na Kalou ka vakakina ni a se qai tekivu ga me lako sese.

O koya gona eda na vukei ira vakavinaka duadua na luve ni Kalou ena noda vakarautaka na sala eso me tarai cake kina na nodra vakabauti Jisu Karisito kei na Nona kosipeli vakalesui mai ni ra se gone. Oti me da qai dau vakabulabulataka tiko vakatotolo na vakabauta oqori ni bera ni buwawa mai ni ra sa lako tani mai na gaunisala.

Io, o iko kei au e daru na namaka na madigi e sega ni oti rawa me daru vukei ira kina na dauveilakoyaki ena kedra maliwa na luve ni Kalou. E tukuna vei keda na iVakabula na vuna ena dina kina, ena Nona vakamacalataka na ilakolako dredre lesu ki vale vei ira kece na luve ni Kalou mai na loma ni kabukabu ka vakavuna na ivalavala ca kei Setani:

“Dou curu ki na matamata ni koro qiqo; raica sa lalaga na matamata ni koro, ka rabailevu na sala, sa basika ki na rusa, a ra na lewevuqa sa curu kina.

“ Ia sa qiqo na matamata ni koro, ka rabailailai na sala sa basika ki na bula; a ra sa lewe lailai sa kunea.”¹

Ni sa raica rawa tu mai na nodra gagadre na Luvena, sa biuta tu kina na Tamada Vakalomalagi dauloloma na idusidusi kei ira na dauveivueti ena nodra sala. A tala mai na Luvena, o Jisu Karisito, me rawa ka laurai vinaka kina na ilakolako. E kaciva me Nona parofita ena gauna oqo o Peresitedi Thomas S. Monson. Mai na gauna sara ni nona gone sa dau vakavuvulitaka o Peresitedi Monson e sega walega ni ivakarau me da butuka tiko ga kina na sala, ia na nodra vueti talega vakacava o ira era sa lako yani ki na yaluma.

Sa dau biuti keda na Tamada Vakalomalagi ena veituvaki ni bula eso me da vaqaqacotaki ia, kevaka ena gadrevi me da tuberi ira na dauveilakoyaki ki na veitaqomaki. Na noda ilesilesi bibi ka kaukauwa duadua sa ikoya ena matavuvale. Era sa rui bibi baleta ni matavuvale e koto kina na madigi ena itekivu ni nona bula e dua na gone me ra vakadeitaka na yavadra ena gaunisala ki vale. O ira na itubutubu, tacida kei na ganeda, tubuda, nei kei na momo sa yaco me ra dauveituberi ka dauveivueti kaukauwa ena vuku ni ivau ni loloma ka ra yavu ni matavuvale.

Sa gauna vinaka ki na matavuvale na imatai ni walu na yabaki ena nona bula e dua na gone. Ena veiyabaki taqomaki oqori, ena vuku ni Veisorovaki i Jisu Karisito, e lati tu kina o Setani mai na nona vakayagataka na kabukabu ni butobuto me vunia kina ka latia na gaunisala lesu ki vale. Ena veiyabaki talei o ya e vukei ira kina na veimatavuvale na Turaga ena nodra kacivi na liganicakacaka ena Lalai me ra veivuke ena kena vaqaqacotaki ira vakayalo na gone. Sa vakarautaki ira talega na Matabete i Eroni o Koya me ra qarava na sakaramede. Ena masu ni sakaramede, era rogoca na gone na yalayala ni na dua na gauna era na ciqoma na Yalo Tabu me dauveidusimaki tiko kevaka era talairawarawa ki na ivakaro ni Kalou. Na kena isau, era na vakaukauwataki me ra vorata na veitemaki ena gauna e yaco mai kina oti me qai, lako ena veivueti vei ira na tani, ena dua na gauna e muri.

E vuqa na bisopi ena Lotu era vakauqeti me ra kaciva na tamata kaukauwa duadua ena tabanalevu me ra veiqaravi ena vukudra na gone yadua ena Lalai. Era kila ni kevaka era vaqaqacotaki na gone, ena vakabauta kei na ivakadinadina, ena sega soti ni gadrevi me ra vueti ena nodra gauna vakaitabagone. Era kila ni yavu kaukauwa vakayalo ena rawa ni vakavuna na duidui ena gauna ni bula taucoko.

E rawa ni da veivuke taucoko. Bubu, tutu, kei na lewenilotu yadua e kila e dua na gone e rawa ni veivuke. E sega ni gadrevi me da kacivi ki na Lalai. E sega talega ni yalani ena yabaki. E dua na marama vakaoqo, ni se gone, a vakaitavi ena matabose raraba ni Lalai ka veivuke ena kena tauyavutaki na ibole na DND.

E sega vakadua ni oca ena veiqaravi vei ira na gone. E veivakavulici ena Lalai ni nona tabanalevu ena nona gagadre ga me yacova ni sa voleka ni yabaki 90. E rawa ni ra vakila na gone lalai na nona lomani ira. Era raica na nona ivakaraitaki. Era vulica mai vua na ivakavuvuli rawarawa sara ni kosipeli i Jisu Karisito. Ka kena ilutua, ena vuku ni nona ivakaraitaki era sa vulica kina me ra vakila ka kila na Yalo Tabu. Ia ni yaco me vakakina, sa tekivu me ra rawata na vakabauta era na vorata rawa kina na veitemaki. Sa na lailai na kena gadrevi me ra vueti ka ra sa na vakavakarau kina vakavinaka me ra laki vueti ira na tani.

Au vulica na kaukauwa ni vakabauta rawarawa ena masu kei na Yalo Tabu ena gauna era se lalai kina na luvei keirau. E se bera ni papitaiso na luvei keirau tagane qase duadua. Era tovolea na nona itubutubu, o ira na qasenivuli ena Lalai, kei ira na italai ena matabete me ra vukea me dau vakila ka kila na Yalo Tabu ka kila me ciqoma vakacava kina na Nona veivuke.

Ena dua na yakavi a kauti koya na watiqu ki na nona vale e dua na marama ka vakavulici koya tiko ena wilivola. Na neitou ituvatuva o ya meu na vakavodoki koya niu sa lesu yani ki vale mai na cakacaka.

A oti totolo na nona lesoni. E dei na yalona ni kila na sala ki vale. Sa mani tekivu taubale. A qai kaya e muri ni a dei vakavinaka tu na yalona ka taleitaka na vakasama ni na lako duadua ena ilakolako oqo. Ni sa taubale tiko me rauta ni veimama ni maile (0.8 km), sa tekivu me buto mai. Sa tekivu me vakila ni se yawa sara mai vale.

E se nanuma vinaka tiko na kena sa kataremoremo na cina ni motoka era lako siviti koya mai ena wai ni matana. E vakila ni vaka me sa dua na gone lailai, ka sega ni me vaka e dua na gonetagane ena nona a tekivu taubale yani ki vale ena yalodei. E kila ni gadreva na veivuke. Oti a basika mai ena nona vakanananu e dua na ka. E kila ni a dodonu me masu. Sa mani biuta kina na gaunisala ka goleva yani eso na vunikau era sa sega soti ni laurai vinaka ena butobuto. A kunea e dua na vanua me tekiduru kina.

Ena loma ni veikau, e rawa ni rogoca eso na domo ni ra lako vakadodonu tiko mai vua. Erau a rogoca na nona tagi e rua na itabagone. Ni rau yaco yani vua, erau kaya, “E rawa beka ni keirau vukei iko?” E tukuna yani ena mata tagitagi ni sa lakosese tiko ka vinakata me lesu ki vale. Erau taroga kevaka e kila na naba ni talevoni ki nodratou kei na vanua e tiko kina. E sega ni kila. Erau taroga kevaka e kila na yacana. E kila o koya na ka oqori. Erau kauti koya ki na nodrau itikotiko ka voleka toka ga. Erau kunea na yaca ni neitou matavuvale ena ivola ni talevoni.

Niu rogoca oti na talevoni, au kusa yani meu veivueti, ka vakavinavinaka ni ra a biu tu ena nona sala ki vale na tamata yalo vinaka. Kau sa dau vakavinavinakataka tu ga ni a vakavulici me dau masu ena vakabauta ni na yaco mai na veivuke ena gauna e lakosese kina. Na vakabauta oqori sa dau vakabulai koya ka kauti ira mai vakalevu na dauveivueti ka vakawasoma e veigauna ka sega ni wilika rawa.

Sa biuta tu na Turaga e dua na ivalavala ni veivueti kei ira na dauveivueti ena Nona matanitu. Ena Nona vuku, sa vakauqeti ira na Nona tamata na Turaga me ra vakotora eso na sala kaukauwa me da vaqaqacotaki kina me ra biu kina eso na dauveivueti vinaka duadua ni da lako sivita na veiyabaki vakaitabagone.

O ni kila e rua na parokaramu qaqa e vakarautaka na Turaga. E dua, me baleti ira na goneyalewa e vakatokai na, Torocake Yadudua. Kena ikarua, me baleti ira na Matabete i Eroni, e vakatokai, na iTavi Vua na Kalou. Eda vakauqeti ira na itabagone ena itabatamata ka tubu cake tiko mai me ra raica na veika era rawa ni ra cakava vakataki ira ena kena tarai cake na igu cecere vakayalo. Ka da sa kerei kemuni kina ko ni kauwaitaki ira na itabagone oqo mo ni tu ka sotava na veika e namaka vei keda na Turaga me da vukei ira. Ia me vaka ni vakatau tu vei ira na gauna ni Lotu ka se bera mai, o keda kece eda kauwai kina.

Erau sa vakavoui na parokaramu e rua oqo, ia e dei koto ga na kedrau inaki. E biuta kina vakaoqo o Peresitedi Monson: sa dodonu me da “vulica na veika e dodonu me da vulica, cakava na veika e dodonu me da cakava, ka bula me vaka e namaki.”²

Na ivolalailai ni Torocake Yadudua me baleti ira na goneyalewa e vakamatatataka vei ira na kedra inaki: “Na parokaramu ni Torocake Yadudua e vakayagataka na walu na yavunilewa ni Goneyalewa me vukei iko mo kila vakavinaka cake se o cei o iko, na cava o mai tiko kina eke e vuravura, kei na veika e dodonu mo vakayacora tiko ni o luvena yalewa na Kalou mo vakarau kina ki na siga mo sa na lako ki na valetabu ka laki cakava na veiyalayalati tabu.”

E tukuna talega ni o ira na goneyalewa e ra na “cakava na yalayala eso, cakacakataka, ka tukuna na nomu toso vua e dua na itubutubu se iliuliu.” E yalataka talega, “na ivakarau eso o tauyavutaka ena nomu cakacakataka na Torocake Yadudua—me vaka na masu, vuli ivolanikalou, veiqaravi, kei na vakaleweni ivolaniveisiga—ena yaco me itovo tudei ni veisiga yadua. Na itovo eso oqori ena vaqaqacotaka na nomu ivakadinadina ka vukei iko mo vuli ka vinaka cake ena nomu gauna ni bula taucoko.”³

Na parokaramu ni iTavi Vua na Kalou me baleti ira na cauravou ena Matabete i Eroni sa vaqaqacotaki ka vakanamata. Sa na dua ga na kena ivola me baleti iratou tolutolu na itutu vakabete ni Matabete i Eroni. Era na ciqoma na cauravou kei ira na nodra veiliutaki e dua na ilavelave ni ivola vou oqo. Sa dua na iyaya ni cakacaka kaukauwa. Ena vaqaqacotaka na nodra ivakadinadina na cauravou kei na kedra isema vua na Kalou. Ena vukei ira me ra vulica ka ra vinakata me ra qarava vakavinaka na nodra itavi ni matabete. Ena vaqaqacotaka na kedra isema vei ira na nodra itubutubu, vei ira vakalewe ni kuoramu, ka vakakina vei ira na Cauravou kei na nodra iliuliu.

Na parokaramu ruarua oqo era vakaitavitaki kina vakalevu na itabagone vakataki ira. Era sa sureti me ra vulica me ra cakava na veika ena veibolei vei ira na tamata kecega. Niu vakasamataka na noqu gauna ni gone, au sega ni vakasamataka rawa na gauna au a bolei vakalevu kina vakaoqo. Oi, ena vica na gauna au a sureti meu sotava na veivakatovolei vakaoqo, ia e dau vakavudua tu. Na parokaramu oqo e namaki kina me ia tikoga, na veisasaga cecere, kei na kena tarai cake tikoga na vuli kei na veimadigi vakayalo ena veiyabaki.

Niu vakasamataka au qai kila ni lewe ni ivola oqo era sa ivakaraitaki ni nona veivakabauti na Turaga vei ira na itabatamata era tubu cake tiko mai kei keda kece eda dau lomani ira. Kau sa raica na ivakadinadina ni sa koto vakavinaka na veivakabauti oqori.

Ena noqu dau veisiko au dau saravi ira na veikuoramu ni Matabete i Eroni ena nodra veiqaravi. Au dau raici ira na cauravou ni ra muria na ivakarau ni vuli, ena nodra tuvatuvalaki me ra cakava na veika e vinakata vei ira na Kalou, era qai toso yani ki na veika era sa yalataka me ra cakava ka wasea vata kei ira na tani na veisau vakayalo sa yaco vei ira. Ia niu sarasara ka vakarorogo, e matata ni o ira na tama, tina, iliuliu, itokani, kei ira sara mada ga na tiko veivolekati ena dua na ivavakoso e tarai ira na Yalotabu ena nodra rogoci ira na itabagone era vakadinadinataka na nodra vakaukauwataki. Era a laveti cake na itabagone ena nodra wasea nodra ivakadinadina, ka vakakina o ira era a tovolea tiko me ra vukei ira me ra tucake.

Na parokaramu ni Goneyalewa e tiko kina na ivakarau qaqa vata o ya ena kena vakatorocaketaki na igu vakayalo vei ira na goneyalewa ka soli kina vei keda na madigi me da veivuke. Na Torocake Yadudua era vukei kina na Goneyalewa ena nodra vakavakarau me ra ciqoma na veicakacaka vakalotu ni valetabu. Era vukei ena nodra ivakaraitaki na tinanigone, buinigone, kei ira kecega na marama buladodonu era wavoliti ira ena Lotu. Au sa raica na nodra vukea e dua na luvedra yalewa na itubutubu me rawata na nona sasaga kei na nona tatadra ena kena dau raici ka vakavinavinakataki na veika vinaka kece sara e dau cakava.

Ena vica ga na siga sa oti au a sarava kina e dua na tina ni rau tu vata kei na luvena yalewa ena nodrau ciqoma e dua na veivakacaucautaki ena nodrau sa yaco vata me ivakaraitaki ni bula vakamarama vakasakiti. Ni rau wasea vei au na kena ibalebale vei rau, au vakila na nona veivakadonui na Turaga kei na veivakayaloqaqataki vei keda kece.

Ena veivuke kece sara e rawa ni da solia vei ira na itabagone oqo, na kena e cecere duadua sa ikoya me ra vakila na noda yalodei ni ra sa lakova tiko na gaunisala ki vale vua na Kalou ka rawa ni ra yaco kina. Ka da rawata na kena vinaka duadua o ya ena noda lako vata kei ira. Baleta ni gaunisala oqo e sa rui veidelana ka so na gauna e veivatu, ena so na gauna era na yalolailai ka tarabe sara mada ga. Ena so na gauna era na veilecayaki me baleta na vanua era na cava kina ka guta eso tale na sasaga ka sega soti ni bibi na kedra yaga tawamudu. Na parokaramu vakauqeti oqo ena dredre ni yaco kina oqo baleta ni na vakavuna na nodra sureta na Yalo Tabu na itabagone me nodra itokani.

Na ivakasala vinaka duadua me da solia vei ira na itabagone o ya ni ra na qai rawa ga ni yaco lesu vei Tamada Vakalomalagi ni ra sa dusimaki ka vakadodonutaki tiko mai na Yalo ni Kalou. Ia, kevaka eda yalomatua, eda na vakayaloqaqataka, vakacaucautaka, ka vakaraitayaloyalotaka na veika kecega e sureta na veitokani ni Yalo Tabu. Ni ra wasea vata kei keda na veika era cakava tiko ka vakila, sa dodonu me da sa cakacakataki keda tiko me ganiti keda kina na Yalo. Ena gauna oqori, era na vakila kina mai na noda veivakacaucautaki kei na matadredredre na veivakadonui ni Kalou. Ia, kevaka eda vakila ni gadrevi me soli na ivakasala ni veivakadodonutaki, era na vakila kina na noda loloma kei na loloma ni Kalou, ka sega na veivosataki kei na veibeitaki, ka na rawa kina vei Setani me kauti ira sara yani vakayawa.

Na ivakaraitaki era gadreva vakalevu duadua mai vei keda sa ikoya me da cakava na veika e dodonu me ra cakava. Eda na gadreva me da masuta na isolisoli ni Yalotabu. Eda na gadreva me da vakanananu vakatitobu ena ivolanikalou kei na nodra vosa na parofita bula. Eda na gadreva me da biuta na ituvatuva ka sega walega ni gagadre ia na veiyalayalati. Oti eda na qai gadreva me da maroroya na noda yalayala vua na Turaga. Ka da na gadreva me da laveti ira na tani ena noda wasea vei ira na veivakalougatataki ni Veisorovaki ka sa yaco mai ki na noda bula.

Kei na kena gadrevi me da vakavotukanataka ena noda bula, na yalodina tudei ka namaka vei keda na Turaga. Ni da vakayacora vakakina, eda na vukei ira me ra vakila mai na Yalotabu na veivakadeitaki ni kevaka era na kitaka tikoga, era na rogoca na vosa mai vua na iVakabula dau loloma kei na Tamada Vakalomalagi: “E vinaka, a tamata vinaka ka dina, ko sa dina ena ka e vica ga, au na lesi iko mo lewa na ka e vuqa: curu ki na marau ni nomu turaga.”⁴ Kei keda eda vukei ira tikoga ena nodra ilakolako eda na rogoca na veimalanivosa oqori ena reki.

Au vakadinadinataka ni lomani kemuni na Turaga kei ira kecega na luvena na Kalou. Oqo na Nona matanitu , sa vakalesui vata mai kei na idola ni matabete mai vua na Parofita o Josefa Simici. O Thomas S. Monson na parofita ni Turaga nikua. Au yalataka vei kemuni yadua, ena nomuni muria na veidusimaki vakauqeti eke, ena Lotu dina i Jisu Karisito, me rawa kina ni ra sereki o ira na noda itabagone kei keda eda dau vukei ira ka lomani ira ka vakalesui yani ena bula vinaka ki vale kei na Tamada Vakalomalagi kei na iVakabula me da laki bula vata vakamatavuvale ena reki me tawamudu. Ena yaca i Jisu Karisito, emeni.