O se Tautinoga a se Perofeta

I le tautotogo o le 1848, o matua o matua o matua o ou matua, o Charles Stewart Miller ma Mary Mc Gowan Miller, na tuua lo latou aiga i Sikotilani ae malaga mai i St Louis, Misuri, ma se vaega o le Au Paia, ma taunuu ai iina i le 1849.

Ao i ai le aiga i St Louis e galulue ai e saili se tupe ia lava e faaauau ai le latou malaga i le Vanu o Sate Leki, sa matuai pepesi le faamai o le kolela i le nuu atoa. I totonu o le lua vaiaso, e toafa tagata o le aiga na fano ai. O fanau na totoe na tuua ua matuaoti, e aofia ai le tina o le tina o lo’u tina o Margaret, sa 13 ona tausaga i le taimi lena.

O le fanau e toaiva a Miller sa totoe sa faaauau ona galulue ma faaputuputu mo lena malaga ua le faauauauina e o latou matua faapea o latou uso ma tuagane. Na latou tuua ia St Louis i le tautotogo o le 1850 faatasi ai ma povi e fa ma le taavale toso e tasi, ma taunuu atu ai i le Vanu o Sate Leki i le tausaga lava lena.

Na feagai foi isi o ou augatama ma faigata faapea. Ae peitai, e ui i nei mea uma, sa tumau mausali pea a latou molimau. Sa ou maua mai ia i latou uma se talatuu o le tuuto atoatoa i le talalelei a Iesu Keriso.

Faatasi ai ma lo’u loto atoa ma le faamaoni o lo’u agaga, ou te tautino atu o loo soifua le Atua. O Iesu o Lona Alo, le Alo e Toatasi o le Tama i le tino. O Ia o lo tatou Togiola; o Ia o lo tatou Puluvaga i le Tama. E alofa o Ia ia te i tatou i se alofa e le mafai ona tatou malamalama atoa i ai, ma talu ai e alofa o Ia ia te i tatou, o lea na Ia ofo mai ai Lona soifua mo i tatou. O lo’u lotofaafetai mo Ia e le mafaamatalaina.

Ou te tautino atu lo’u ola, o lo’u malosi e auauna ai ia te Ia ma le taitaiga o mataupu o Lana Ekalesia e tusa ai ma Lona finagalo e ala i Ana musumusuga.