O a Mea na Aumai e Paionia?

Ina ia malamalama i paionia ma mea na latou faataunuuina, e tatau ona tatou vailiilia o latou faamoemoega. … Na latou o mai mo le saolotoga ma le filemu, e pei ona faia e isi. Na latou o mai e fau ni fale mo i latou lava, e pei ona faia e isi. Na latou o mai e tapuai i le Atua ma faatino a latou lotu i le mea sili e tusa ai ma o latou talitonuga, e pei ona faia e isi; ae peitai o le mea lenei e tasi na latou o mai ai, e pei ona ou iloa, e leai se mea e tutusa ai ma se isi lava malaga paionia: na latou o mai ma le faamoemoega mautinoa e fausiaina se sosaiete ina ia mafai ona latou toe avatu i le lalolagi na latou sosola mai ai, ioe, e oo lava ia i latou na sauaina i latou, o mataupu faavae o le olaga ma amio na avea ma punavai o a latou lava musumusuga, lotogatasi, manuia, ma le fiafia. …

O a la mea na aumai e paionia? Na latou aumaia le galue malosi i se fuataga e seasea ona faatusalia. Na latou aoao mai ma faatinoina le talalelei o le galue e avea ma faavae mo le manuia ma le fiafia. …

Na latou aumaia le aoaoga ma le fiafia mo faatufugaga ma le matagofie. …

Na latou aumaia ma i latou se faatulagaga maualuga o le lotonuu ma se malosiaga tele mo le tuuto mausali i le faamoemoe ua latou tauaveina. …

Ua ou oo mai nei i le mea aupito sili o mea uma lava na aumaia e paionia ma i latou, ma o lena mea ou te faaupuina o le atamai, atamai i mea taua o le olaga. …

Muamua, mafaufau i le tino o le tagata. … Na aumaia e paionia se manatu faavae fou o le tino lena na faamamaluina ai i se uiga paia. Na latou aoao mai o le tino o se fale faalelalolagi lea mo le agaga o le tagata lea e faanofo ai le agaga o le tagata, le atalii/afafine moni o le Atua, ma o lea e le mafai ai ona faaleagaina pe faapalapalāina le tino po o le faia faatautala i le tuuina i ai o ni mea oona ma mea matautia e aunoa ma le faatiga ai o le Atua, o lē e ona le Agaga o loo nofo ai i totonu. … Na latou aumaia ma i latou se faatulagaga o tulafono o le soifua maloloina. …

Lona lua—natura po o le uiga. … [O paionia] na aoao mai e le gata o le tagata o le atalii o le Atua, o le gafa e aupito sili ona tamalii ae ua faamoemoe foi o ia, pe afai e ola ai, e auai faatasi ma lona Tama Faalelagi i le tauaveina o Ana galuega faavavau i taimi uma o i luma. …

O le isi—o le aiga. … O le a le atamai na aumaia e paionia e uiga i le aiga? Aisea, na latou faamanuiaina le aiga i uiga e aupito sili ona faaeaina e lei oo mai muamua i ai talu mai le talafaasolopito uma o le lalolagi. Na latou aoao mai e le gata o se iunite faavae mo le olaga fiafia ma le alualu i luma i lenei lalolagi ae o loo i ai foi le faavae tonu lava o lo tatou faamoemoe mo le faaeaga aupito silisili i le malo selesitila o lo tatou Atua. Ioe, o le lagi o loo tatou sailia ua sili laitiiti atu nai lo le na ona lalagi o o tatou aiga i le faavavau. Oka se eseesega o nei manatu faavae maualuluga e uiga i le aiga ma le auaiga ma le matautia o le leaga ua i ai le olaga faaleaiga i le taimi nei—o faaipoipoga ua tatala, aiga malepelepe, o tamaiti faalogogata ua lē amanaia ma ua tatau ona alofagia nai lo le sauaina ona o le faaletonu o le olaga faaleaiga. … Oi, pe ana mafai e le atamai na aumai e nei paionia lotomaualalo ona maua le avanoa e faaaogaina ai e aiga o le lalolagi, oka se faamanuiaga semanu e maua ai le filemu ma le fiafia ma le alualu i luma o tagata.

O le mea mulimuli, … o le usoga. Na latou aoao mai, i le auala e aupito sili ona moni, le manatu faavae mo atunuu uma, ituaiga, gagana, ma tagata e i ai i le aiga o le Atua. … Na latou talitonu … pau le faamoemoega autu mo le filemu i le lalolagi o loo taoto lea i le faalauteleina atu o lenei aoaoga faavae o le usoga i le lalolagi atoa. …

… O nei saofaga atamai o loo ou tautala atu ai ma le tele o isi, o ni mataupu faavae o le talalelei a le Alii o Iesu Keriso lea na toefuatai mai e ala mai i le Perofeta o Iosefa Samita. … Ona o le faatuatua lē leoa o paionia i lenei savali musuia o le olaga ma le upumoni na latou fausia ai le maota o le Alii i “tumutumu o atu mauga” [Isaia 2:2]. O se mea taua tele le faatuina o se teritori ma faaliliuina se toafa i ni aai, taulaga, ma nuu e i ai fale o aiga, a’oga, ma mea uma ua tatou fiafia ai nei. O se taunuuga sili ona maoae le faatuina o le malo o le Atua ma auina atu mai Siona lena savali aoga o le faamoemoe ma le faatuatua ma le paia, atamai faavavau i tagata uma. O le talatuu moni lenei na aumaia e o tatou paionia tamalii ma tuuina mai ia i tatou ma a tatou uo. … O le meaalofa aupito sili lea ona taua i le olaga. Ia fesoasoani mai le Atua ia i tatou ia faatauaina, ia ola ai, ma faasalalauina atu.