Oo atu i le Malumalu

Talu mai le taimi o lo matou papatisoga i le 2001, sa tele ona ma talatalanoa ma lo’u toalua i le malaga atu i le malumalu ma lo ma aiga ina ia faamauina faatasi mo le faavavau. Ae peitai, na muta a ma fuafuaga ina ua tau togafitia o ia i le ma’i o le ate ma maliu ai ae lei mafai ona matou o.

Sa nutimomoia lo’u fatu, ae o lo’u faanaunauga mo lo’u aiga ia faamauina mo le faavavau sa faatupulaia pea ina ua mavae le maliu o lo’u toalua. Peitai, i le avea ai ma se tina nofofua o se fanau e toafa, sa ou iloa e le faigofie le sailia o tupe e manaomia e ave ai lo’u aiga mai Kemupotia i le Malumalu o Hong Kong i Saina—pe a ma le 1,000 maila (1,600 km) le mamao.

E ui i le laitiiti o a matou tupe maua, na matou iloa ma la’u fanau e tatau ona matou o i le malumalu ina ia mafai ona faamauina i matou o se aiga e faavavau. Sa faaauau ona ou galue malosi e fai tagamea i se faletalimalo a o galulue la’u fanau i nai galuega iti eseese. Na alualu malie le faasaoina o nai tupe mo la matou malaga, ae na vave ona matou iloa atonu e le mafai lava ona lava sa matou tupe e teu.

Talu ai sa matou iloa e sili atu ona taua se aiga faavavau i soo se mea matou te maua i le lalolagi, o lea na tonu ai ia i matou o le a faatau le mea taua e tasi o loo ia i matou—o le uilaafi lea a lo’u toalua. Ina ua maea ona faatauina mo se vaega tupe tele, sa olioli o matou loto i le iloa ua lata le taimi o le a mafai ona matou faamau atu ai i lo matou tama pele ma le toalua.

Peitai na puupuu lo matou fiafia. E tasi le vaiaso talu ona faatauina atu le uilaafi, ae matou foi mai le lotu ua gaoia lo matou fale. Ina ua matou iloa ua leai le tupe mai le faatauga o le uilaafi, sa matua taia o matou i le loto faanoanoa. E tele ni masina talu le osofaiga, sa matou tatalo pea ia i ai se auala e mafai ai ona matou o i le malumalu.

Ina ua mavae ni nai masina na tali mai a matou tatalo ina ua ta’u mai ia i matou e mafai ona matou mauaina se fesoasoani mai le vaega Tupe Fesoasoani a le Ekalesia mo Tagata Lautele o le Malumalu. Sa faafiafiaina a’u ma la’u fanau i le tala ma e lei pine ae matou faia la matou malaga faamoemoeina i le malumalu.

Faafetai i le agalelei o isi o le Au Paia o Aso e Gata Ai, ua faavavau nei lo matou aiga.