Aisea e tuu ai e le Ekalesia le faamamafa i auaunaga? Aisea e le mafai ai ona na ona tatou fiafia?

E tuu e le talalelei a Iesu Keriso le faamamafa tele i le fesoasoani atu i o tatou uso a tagata. E le lava le lagona alofa i se tasi ua manaomia—o lo tatou tiutetauave o le faatino. “A ia fai outou ma e anaana i le upu, a e aua le na ona faalogologo i ai” (Iakopo 1:22).

Sa aoao mai le Faaola, “Aua na faia e outou i le tasi o e aupito itiiti o o’u uso nei, o a’u lea na outou faia i ai” (Mataio 25:40), ma na aoao le Tupu o Peniamina e faapea “pe a i ai outou i le galuega a o outou uso ua na ona i ai outou i le galuega a le Atua” (Mosaea 2:17). O le auauna atu i isi e faaalia ai lo tatou tuuto i le Alii ma le soifua manuia o Lana fanau.

O le auaunaga e le na o le fesoasoani atu i isi. E mafai foi ona taunuu atu ai i lo tatou lava tuputupu ae faaleagaga. Pe a tatou auauna atu i valaauga ma faia isi auaunaga, e le gata ina faamalosia ai isi ae avea ai foi i tatou ma tagata sili atu.¹

O le mea e sili ai, o le auaunaga e mafai ona avea ma se mea e matuā malie pe a e faia ma le uiga sa’o. Mafaufau i au taleni ma tomai ma pe faapefea ona e faaaogaina e fesoasoani ai i isi. O auaunaga faaletagata lava ia e tauia, ma e mafai foi ona e fiafia e auauna atu ma ni uo! Faapotopoto faatasi se vaega o ni tagata, ma tuufaatasi o outou manatu i ni auala fou ma lelei e mafai ona outou auauna ai. O le a outou maofa i le faamalieina e mafai ona maua mai i le auaunaga.