O le a le taua o le Aso Paionia? Pe e faamanatu e le Ekalesia atoa?

O le Aso Paionia e faamanatu ai le taunuu mai o le vaega muamua o paionia Mamona i le Vanu i Sate Leki, i le aso 24 o Iulai, 1847. O se aso malolo aloaia i le setete o Iuta, ma le faamanatuina, e aofia ai se solo tele, e faatatau i Days of ’47 [Aso o le ’47]. O se taimi e aloaia ai i latou uma sa saofaga i le fausiaina o le setete, e tusa lava pe o le a le latou tapuaiga po o talaaga.

E le gata i lea, o tagata o le Au Paia i nofoaga eseese i le lalolagi atoa e mafai ona auai i le faamanatuina o lo tatou talatuu faapaionia. O isi alalafaga e faia faaaliga, o solo, o konaseti, ma solo a taavale tosolima o se vaega o faafiafiaga. I isi nofoaga, o le faamanatuina atonu e faigofie e pei o se tafaoga a le aiga po o se taimi e manatunatu ai faaletagata lava ia. E tusa lava pe o fea le nofoaga o i ai tagata o le Ekalesia, e tusa lava pe e i ai se faafiafiaga po o ni manatunatuga, o se taimi talafegai lea e manatua ai tagata o le Au Paia anamua ma mea sa latou faia mo i tatou uma, e aofia ai paionia o o tatou lotoifale o e sa faamalosia le Ekalesia i nofoaga o loo outou soifua ai.

Sa saunoa Peresitene Dieter F. Uchtdorf, Fesoasoani Lua i le Au Peresitene Sili: “O se fiafiaga ma se faamanuiaga le avea ai o se vaega o lenei Ekalesia i le lalolagi atoa ma le aoaoina ma le faagaeetia e perofeta, tagatavaai, ma talifaaaliga! … E pei ona taliaina nei e le lalolagi atoa le savali o le talalelei toefuataiina a Iesu Keriso, o i tatou uma o paionia i o tatou lava eria ma tulaga.”¹