O Uo Faamaoni

O se tasi o saafiafiga maoae e mafai e le Faaola ona tuuina mai o le ta’ua lea o i tatou o “uo.” Ua tatou iloa e alofa o Ia i se alofa atoatoa i fanau uma a Lona Tama Faalelagi. Ae mo i latou o e sa faamaoni i la latou auaunaga ia te Ia, e Na te faapolopolo i ai lenei faalaniga faapitoa. Tou te manatua upu mai le vaega e 84 o le Mataupu Faavae ma Feagaiga: “O lenei foi ou te fai atu ia te outou, a’u uo e, aua e afua atu nei lava ona ou ta’ua outou o uo, ua tatau lava ona ou tuuina atu ia te outou lenei poloaiga, ina ia avea outou faapei o a’u uo lava i aso ina o ou faatasi ma i latou, ma femalagaai e folafola le talalelei i lo’u mana” (MFF 84:77).

E avea i tatou ma Ana uo a o tatou auauna atu i isi mo Ia. O Ia o le faataitaiga tonu o le ituaiga uo e tatau ona avea ai i tatou. E finagalo o Ia na o le mea sili mo fanau a Lona Tama Faalelagi. O lo latou fiafia o Lona fiafia lea. Na te lagonaina lo latou faanoanoa e pei o Ia e ona aua na Ia totogi le tau mo a latou agasala uma, tauave i Ona lava luga o latou mafatiaga uma, tauave o latou faafitauli uma, ma lagonaina o latou naunauga uma. O Ona faamoemoega e mama a’ia’i. Na te le sailia se viiga mo Ia lava ae ia tuuina atu le mamalu uma i Lona Tama Faalelagi. O le uo moni, o Iesu Keriso, e matua le manatu faapito lava i le ofoina mai o le fiafia i isi.

O i tatou taitoatasi ua osia le feagaiga o le papatisoga ua folafola atu e mulimuli i Ana faataitaiga o le fesui ia outou avega e ave e pei o le a Ia faia (tagai Mosaea 18:8).

I ni nai aso o sosoo ai o le a tele ou avanoa e avea ai ma uo mo Ia. Atonu a o e savali i luga o se auala pefu. Atonu a o e saofai i se nofoaafi. Atonu a o e sailia se nofoaga e nofo ai i se aulotu a le Ekalesia. Afai o e vaavaai mai, o le a e vaaia se tasi o loo amoina se avega mamafa. Atonu o se avega o le faanoanoa po o le tuulafoaiina po o le inosia. Atonu o le a faailoa atu na o oe pe afai na e tatalo mo le Agaga e tuuina atu ia te oe ni mata e vaai ai i totonu o loto ma folafola atu e sii ae i luga lima o loo tautau i lalo.

O le tali i lau tatalo atonu o foliga o se uo tuai, se tasi e te lei toe vaai i ai i le tele o tausaga ae na faafuasei lava ona oo mai ona manaoga i lou mafaufau ma lou loto ma lagona ai e pei lava o oe e ana. Sa tupu ia te au lena mea. Sa aapa mai a’u uo tuai i le tele o maila ma tausaga e ofo mai le faamalosiauga lea ua na o le Atua lava na mafai ona ta’uina atu ia i latou la’u avega.

Na talosaga mai perofeta soifua a le Atua ia i tatou ia avea ma ni uo faamaoni a i latou o e o mai i le Ekalesia o ni tagata liliu mai ma ia o atu e laveai mai i latou ua tafefea ese atu. E mafai ona tatou faia, ma o le a tatou faia pe afai tatou te manatua pea le Faaola. Pe afai tatou te aapa atu e tuuina atu le fesoasoani ma sii ae se avega, e aapa atu o Ia faatasi ma i tatou. O le a Ia taitaia i tatou i e o manaomia. O le a Ia faamanuia i tatou ia lagonaina o latou lagona. Ao tatou tautu i a tatou taumafaiga e auauna atu ia i latou, o le a faateteleina le tuuina mai o le meaalofa o le lagonaina o Lona alofa mo i latou. O le a aumai ai ia i tatou le lototoa ma le malosi e aapa atu ai pea lava pea i le faamaoni.

Ma, i le taimi nei ma le faavavau, o le a tatou lagonaina le olioli i le taliaina lea i le faapotopotoga o Ana uo faamaoni. Ou te tatalo mo lena faamanuiaga mo i tatou uma ma mo i latou o le a tatou auauna atu i ai.