Elder Ian S. Ardern

Soo se taimi lava e telefoni atu ai se tagata pe tuitui atu i le faitotoa, o upu masani muamua lava mai le fofoga o Elder Ian Sidney Ardern o le “E mafai faapefea ona ou fesoasoani atu ia te oe?”

Na soifua mai o ia ia Harry ma Gwladys McVicar Wiltshire i Te Aroha, Niu Sila i le masina o Fepuari 1954, ma sa toe ta’ua e Elder Ardern o le tele lava o taimi o nai faatinoga laiti lava o le auauna atu e faia ai le eseesega aupito sili i olaga o lē foai atu ma lē na te talia. “E le faigofie i taimi uma le auauna atu, ae e faamanuia ai i taimi uma lou olaga,” o le saunoaga lea a Elder Ardern.

Na feiloai Elder ma Sister Ardern a o aooga i le Kolisi a le Ekalesia i Niu Sila ma sa faaipoipo ai i le Malumalu o Hamilton Niu Sila i le aso 17 Ianuari, 1976. Sa ola ae la la’ua fanau e toafa i se aiga sa faamuamua ai le alolofa ma le manatu popole o le tasi i le isi, ma se manaoga ia malamalama ma ola i mataupu faavae o le talalelei. “O se faamanuiaga le vaai atu foi o faamuamua nei mea i aiga o la ma’ua fanau ua faaipoipo,” sa saunoa i ai Elder Ardern.

E tele naua mea e faamoemoe mai i ai le Alii mai Ana fanau, ma Na te saunia foi se ala mo na faamoemoega e faataunuuina ai. “E sili ona ou faafetai atu ia i latou uma sa fesoasoani i lo matou aiga e mulimuli i le Alii,” le saunoaga a Elder Ardern.

O le mulimuli i aoaoga a perofeta i le aiga, sa avea ma faamuamua mo le aiga o Ardern. Sa avea le suesue i aso taitasi o tusitusiga paia ma se mausa, aua sa faamautinoa e le fanau ua fai ina ia mafai ai ona feauaua’i i latou e tuu se faailoga mumu i luga o le kalena e ta’u mai ai ua uma ona fai le faitaugatusi i lena aso. “O nai mea iti ma le faatauvaa e mafai ai ona tulai mai mausa lelei,” na saunoa i ai Sister Ardern.

A o lei valaauina i le Korama Muamua a Fitugafulu, o le auaunaga a Elder Ardern i le Ekalesia e aofia ai ona valaauga e avea ma faifeautalai i Farani ma Peleseuma, peresitene o Alii Talavou i le siteki, fautua maualuga, fesoasoani i le epikopo, epikopo, fesoasoani i le peresitene o le siteki, peresitene o le Misiona a Fiti Suva, ma Fitugafulu Eria.

Na maua faailoga o le tagata malaga ma le matuaofaiva i mea tau aoaoga mai le Iunivesite o Waikato i Niu Sila. O lana matata faapolofesa e aofia ai le tele o tulaga i le Ofisa o Aoga a le Ekalesia, e aofia ai le faiaoga, faatonusili, taitai faamaopoopo o seminare i Niu Sila, pule a’oga i le Kolisi a le Ekalesia i Niu Sila, ma le Faatonusili i le Eria a le Pasefika.