Elder Larry Y. Wilson

O le faapaleniina o manaoga o le galuega, Ekalesia, ma tiutetauave o le aiga o se luitau lea mo Elder Larry Young Wilson, ae sa ia faamautinoaina i tagata o lona aiga lo latou taua ia te ia.

“O lo’u aafiaga e aupito sili ona anoa o le avea ai lea ma se tane ma se tamā,” na saunoa ai Elder Wilson. “E seāseā o’u misia se faatinoga a se tamaitiiti i taaloga, musika, po o isi mea e fai. Ou te faitau atu ia i latou tala e faamomoe ai ma tatalo faatasi ma i latou a o le’i faamomoeina i le po. E matua taua tele lo’u i ai iina.”

E silafia lelei e Elder Wilson mea e manaomia mai se tasi ua i ai matafaioi faaletaitaiga i vaega uma o le olaga. Sa soifua mai o ia i le masina o Tesema 1949 i le Aai o Sate Leki, Iuta, ISA ia George ma Ida Wilson ma sa soifua a’e i Pocatello, Idaho, ISA. Sa maua lona uluai faailoga i le Igilisi ma le faiva o tusitusiga mai le Iunivesite o Harvard, ma mulimuli ane maua lona faailoga o le matuaofaiva i le pulega faapisinisi mai le Stanford Graduate School of Business.

Sa faaaoga e Elder Wilson lana matata e faigaluega ai o se faufautua ma se faatonusili i le matagaluega faapitoa o le tausiga o le soifua maloloina. E ui lava ina manaomia tele lana matata, ae sa faamautinoa lava e Elder Wilson e le pulea ai lona soifua.

“E tatau lava ona e faavaeina ni tuaoi o lou soifua galue,” na ia saunoa ai. “A leai, o le a tofatumoanaina ai isi mea uma lava. O lona uiga, o le itu tau galuega, lotu, ma taimi faaleaiga e tatau lava ona feauaua’i e faatali. Tatalo ina ia taialaina oe ona e iloa lea po o lē fea e faamuamua i soo se aso faapitoa.”

Sa auauna ma le maelega ia Elder Wilson o se faifeautalai i le Misiona a Pasila Tutotonu, ma se epikopo, peresitene o le siteki, ma se Fitugafulu Eria a o lei valaauina i le Korama Lua a Fitugafulu.

Sa fesoasoani ia Elder Wilson e sailia lena tulaga paleni taua i lana auaunaga atoa, lona faletua, o Lynda Mackey Wilson, lea sa ia faaipoipo atu i ai i le aso 10 Iulai, 1974, i le Malumalu o Logan Iuta. Sa tausia e le au Wilson se fanau e toafa.

“Soo se taimi lava ou te tuua ai mo fonotaga faale-Ekalesia, e fai mai lava o ia, ‘Tofa, la’u pele. Alu e auauna atu i le Alii,’” na saunoa i ai Elder Wilson. “Sa ia aoaoina le ma fanau i le uiga loloto o la’u auaunaga. E lei umi ae latou faapea mai, “Tofa, Papa. Alu e auauna atu i le Alii!”