Ua Faamanatuina e Taitai le Uelefea, ma Fofogaina mai Malumalu

E silia ma le 10,000 tagata sa auai i sauniga e lima o le Konafesi Aoao Lona 181 Faaletausaga a Le Ekalesia a Iesu Keriso o le Au Paia o Aso e Gata Ai i le Maota Autu mo Konafesi i le Aai o Sate Leki, Iuta, ISA, ae faitau miliona isi na maimoaina pe faafofoga i ai e ala i faasalalauga i TV, leitio, satelite, ma le Initoneti.

Sa auai tagata o le ekalesia i le lalolagi atoa i le konafesi i gagana e 93. O le tele o gagana ua maua faasalalauga faaotio, visio, ma tusitusia i le initoneti i le tuatusi o le conference.lds.org ma o le a maua foi i DVD ma CD.

Sa tatalaina e Peresitene Thomas S. Monson le konafesi i lona fofogaina mai lea o nofoaga o malumalu fou e tolu—Fort Collins, Colorado, USA; Meridian, Idaho, USA; ma Winnipeg, Manitoba, Canada—lea o le a atoa ai le 26 o malumalu ua fofogaina mai pe o loo fausiaina nei. O le taimi nei ua 134 malumalu ua faagaoioia.

Sa faamamafa mai foi e Peresitene Monson le taua o le galuega faafaifeautalai, i lona saunoa mai, “O le galuega faafaifeautalai o le toto ola lea o le malo.” Ua tusa ma le 52,000 faifeautalai o loo galulue nei i misiona e 340 i le lalolagi atoa.

I le afiafi o le Aso Toonai, e 10 le Au Pulega Aoao fou ma Fitugafulu Eria e 41 na lagolagoina ai, ae 34 Fitugafulu Eria ua faamaloloina. E le gata i lea, na valaauina foi Elder Don R. Clarke o le Korama Lua a Fitugafulu e galue i le Korama Muamua a Fitugafulu. O le Lipoti Faafuainumera na faaalia ai ua 14 miliona nei le faitau aofai o tagata o le Ekalesia.

O le tele o lauga na tuuina mai i le lua aso o le konafesi na taulai atu i le autu o le uelefea a le Ekalesia ma le polokalama tulaga ese o le uelefea a le Ekalesia—ua faamanatuina nei lona 75 tausaga i le 2011.

I le Aso Toonai, sa fofogaina mai ai e Peresitene Henry B. Eyring, Fesoasoani Muamua i le Au Peresitene Sili e faapea, ina ia faamanatuina le 75 tausaga o le polokalama uelefea, ua valaaulia ai tagata o le ekalesia i le lalolagi atoa ina ia auai i se aso mo se gaoioiga o le auauna atu. O le aso o lea auaunaga e tatau ona faia i se tulaga faaleuarota pe faalesiteki i se taimi o le tausaga. E tatau i taitai i le lotoifale ona filifilia auiliiliga o galuega faatino taitasi, ma e fautuaina tagata o le au paia ina ia latou valaaulia foi isi e auai pe a talafeagai.

Sa tapunia e Peresitene Monson le konafesi i lana molimau o le Eseta ia Keriso: “I le toe taimi lava, semanu e mafai lava ona Ia toe fo’i. Ae sa le’i foi o Ia. Sa ia o’o ifo i le taele o mea uma ina ia mafai ai ona Ia faasaoina mea uma. O le faia o lena, sa Ia ofoina mai ai mo i tatou le ola i talaatu o le olaga faitino.”