Elder J. Devn Cornish

Ua silafia e John Devn Cornish e taua tagata uma ma valaauga uma i le Ekalesia.

“E taua le manatua pe a fuafua ni valaauga i le Ekalesia, e le afaina po o fea tatou te nonofo ai i luga o le vaalele —e taua lo tatou i ai i luga o le vaalele,” na ia saunoa ai. “O le avea ai o se vaega o le galuega e taua e faavavau. Po o lē fea tofiga tatou te tauaveina, e faalē taua tele.”

Mai lona valaauga e galue i le Misiona a Guatemala–El Salvador seia oo mai i lona valaauga aupito lata mai i le Korama Lua a Fitugafulu, sa galue punouai Elder Cornish i le faataunuuina o ona valaauga i le Ekalesia, e aofia ai le peresitene i Alii Talavou a le uarota, peresitene i le korama a toeaina, failautusi faapitoa a le uarota, taitai vaega a le au faitaulaga sili, fautua maualuga, epikopo, peresitene o le siteki, peresitene o le Misiona a le Tominika Ripapelika Santiago, ma le Fitugafulu Eria.

Na soifua mai ia Aperila 1951 i le Aai o Sate Leki, Iuta, ISA, ia George ma Naomi Cornish, ma sa soifua a’e Elder Cornish i Iuta, Georgia, ma Virginia, ISA, a o lei toe taliu atu e aoga i Iuta.

A o nofo ai i Provo, sa la feiloai ai ma Elaine Simmons i se gaoioiga a talavou nofofua matutua. Sa faaipoipo i la’ua i le Malumalu o Manti Iuta ia Aokuso 1973.

A o la tausia ma lona faletua le la fanau e toaono, sa faigaluega Elder Cornish i le Taupulega Faafomai a le Fuavaa i le Ea a le Iunaite Setete, sa maua ona faailoga faafomai mai le Iunivesite o Johns Hopkins, ma sa ia faatinoina foi le vae mulimuli o ana aoaoga faamasani faafomai o tamaiti i le Aoga Faafomai a Harvard—Falemai o Tamaiti i Boston.

O a’oga ma galuega i Idaho, Texas, Kalefonia, ma Georgia, ISA sa tele ai ina fesiita’i solo le aiga i le tele o tausaga, ae po o fea lava le mea sa latou i ai, na saunoa ai Elder ma Sister Cornish, sa fiafia lava i la’ua e galulue auauna i le Ekalesia.

“Ua tupu ma ola le galuega i le lalolagi atoa, ma o se faamanuiaga tele le mafai ona fesoasoani e auauna atu i fanau a le Alii i soo se mea e mafai ai,” o le saunoaga lea a Elder Cornish.

O lenei valaauga o le Fitugafulu, “e pei o valaauga uma lava i le Ekalesia, o se isi avanoa e avea ai o se vaega o le galuega a le Alii,” na saunoa i ai Elder Cornish. “Matou te faafetai lava mo lena avanoa.”