Elder Randall K. Bennett

O le taimi aupito faamanuiaina o lana galuega faalematata o se fomainifo faapitoa, na lagona ai e Randall Kay Bennett ma lona faletua o Shelley “se uunaiga ma’oti” e sauni e faamisiona. O lona uiga, o le a manaomia ai ona faatau ese atu loa lava lo la fale.

O le mafuaaga o le uunaiga, e lei vave ona tino mai—na atoa le tolu tausaga o tau faatau atu le fale, o se faiga na “matua tele le onosai na manaomia ai” ma sa manaomia ai lo la “faaali atu i le Alii ua ma matuai tautino atu lava i ai,” na saunoa ai Elder Bennett. “Sa faaauau pea ona ma faalagolago i le Alii ma taumafai e tumau latalata atu ia te Ia e ala i lo ma o soo i le malumalu, suesue tusitusiga paia i aso taitasi, tatalo, anapogi, ma auauna atu i isi.”

E lei leva ona faatau ese atu lo la’ua fale, ae valaauina Elder Bennet e auauna atu i le Nofoaga Autu mo le Aoaoina o Faifeautalai, ona avea ai lea ma peresitene o le Misiona a Rusia Samara.

“E ofoofogia lava—ma faalotomaulaloina—le iloa sa silafia e le Alii i ma’ua ma sa saunia i ma’ua,” na saunoa ai Elder Bennett. “Ua ma iloaina ai e silafia e le Alii manatu o o ma’ua mafaufau ma lagona o o ma’ua loto. Ua ma aoao ai e talitonu e sili atu Lona silafia nai lo i ma’ua, e tele atu mea Na te silafia nai lo i ma’ua, ma e alofa o Ia ia i ma’ua.”

E le gata i ona valaauga o se tasi o le Korama Lua a Fitugafulu ma se peresitene o le misiona, sa avea foi Elder Bennett o se peresitene ma se fesoasoani i le paranesi a le Nofoaga Autu e Aoao ai Faifeautalai i Provo, o se tasi o fautua maualuga a le siteki, fesoasoani i se au epikopo, peresitene o Alii Talavou a le uarota, ma isi valaauga eseese, ma se faifeautalai i Misiona a Farani Pale ma Farani Toulouse.

Na maua le faailoga fomai tipitipi o nifo mai le Iunivesite o Alberta (Kanata) ma sona faailoga o le matuaofaiva i togafitiga faapitoa o nifo mai le Iunivesite o Loma Linda i Kalefonia i Saute, ISA.

Na soifua mai Elder Bennett ia Iuni 1955 i Magrath, Alberta, Kanata. O ona matua o Donald Kay Bennett ma Anne Darlene Long. Na faaipoipo o ia ia Shelley Dianne Watchman i le aso 23 o Aperila, 1977, i le Malumalu o Cardston Alberta. O i la’ua o matua o se fanau e toafa.