Elder LeGrand R. Curtis Jr.

E silafia e Elder LeGrand Raine Curtis Jr. “e ao ina ave i le Alii le loto ma le mafaufau mataala” (MFF 64:34).

“E fiafia o ia e tautua i le Ekalesia, ma na te faia i le galue malosi ma se uiga naunautai,” o le tala lea a lona faletua o Jane Cowan Curtis, lea na faaipoipo i ai i le Malumlau o Sate Leki i le aso 4 Ianuari, 1974. “O le auauna atu o lona moomooga ma lona manao aupito sili lea.”

Na soifua mai Elder Curtis ia Aokuso 1952, i Ogden, Iuta, ISA ia LeGrand R. ma Patricia Glade Curtis. Na avea mulimuli ane lona tama ma se tasi o le Korama Lua a Fitugafulu (1990–95).

A o lei valaauina o ia i le Korama Muamua a Fitugafulu, sa auauna atu Elder Curtis Jr. i le Misiona a Italia i Matu ma sa avea foi ma epikopo, fautua maualuga, peresitene o le siteki, peresitene o le Misiona a Italia Padova, ma Fitugafulu Eria. Sa avea o ia ma se tasi o le Korama Lima a Fitugafulu i le Eria a Iuta Aai o Sate Leki i le taimi na valaauina ai i le Korama Muamua.

Na faauu Elder Curtis mai le Iunivesite o Polika Iaga i sona faailoga i mataupu tau i le tamaoaiga ma sa maua lona fomai o le tulafono mai le Iunivesite o Michigan. I le taimi o lona valaauga, sa faigaluega o ia o se loia ma se paaga i se kamupani loia. E le gata ina a’oga ma faigaluega, ae sa tausia foi e Elder Curtis ma lona faletua se fanau e toalima.

Ina ua mavae ai lana auaunaga o se Fitugafulu Eria mai le 2004 i le 2011, sa saunoa Elder Curtis sa ia talisapaia le avanoa e galulue ai ma le Au Pulega Aoao. “Sa faamanuiaina lava au e galulue faatasi ma nisi o taitai iloga i le Ekalesia,” na ia saunoa ai. “O le matauina o i latou ma aoao mai ai, o se avanoa sili e le lau maua.”

Fai mai Sister Curtis, o Elder Curtis e i ai i taimi uma ia te ia ni lima naunau ma se loto naunautai. “O lona lava ia uiga faaalia i taimi uma o le, ‘O le a ou faia,’” o lana tala lea.

Mataupu Faavae ma Feagaiga 64:34 e faaiu i upu nei: “O ē gaua’i ma usiusita’i o le a aai i mea lelei o le laueleele o Siona i nei aso e gata ai.” Fai mai Brother ma Sister Curtis, ua matuai faamanuiaina lava i la’ua ma le la fanau ma fanau a fanau ona o le auauna atu i le Alii.