Elder W. Christopher Waddell

O se mataupu faavae taiala i taimi uma i le aiga o Elder Wayne Christopher Waddell e le o tusia o le, “Faalagolago i le Alii.”

“A e faalagolago i le Alii, e te le tau popole i ni suiga tetele,” o le saunoaga lea a Elder Waddell e uiga i femilosa’iga ma taaviliga faafuasei o le olaga. “Matou te iloa sa sili ona fiafia o matou loto ia te Ia, ma o le a faamanuiaina ai i matou.”

Na soifua mai Elder Waddell ia Iuni 1959 i Manhattan Beach, Kalefonia, ISA, ma o ia o le atalii o Wayne ma Joann Waddell. Sa maua lona faailoga o le tagata malaga i le talafaasolopito mai le Iunivesite o le Setete o San Diego, lea foi na taalo volipolo ai. E tele tulaga sa faigaluega ai o ia i se kamupani iloga o tautua mo tupe teu faavaitaimi.

Na faaipoipo Elder Waddell ia Carol Stansel i le aso 7 Iuni, 1984, i le Malumalu o Los Angeles Kalefonia. E toafa le la fanau. O le lotogatasi e aupito maualuga i le aiga o Waddell. Latou te faatinoina lena lotogatasi i lo latou taumafai e mulimuli i le talalelei a le Faaola i lo latou aiga. E taua foi gaoioiga faaleaiga— o le faaaluina faatasi o taimi i matafaga e lata atu i lo latou fale ma le auai o se aiga i ni taaloga.

A o lei valaauina i le Korama Muamua a Fitugafulu, sa avea Elder Waddell ma faifeautalai faamisiona i Sepania, o se epikopo, fautua maualuga, fesoasoani i le peresitene o le misiona, peresitene o le siteki, peresitene o le Misiona a Barcelona Sepania, ma Fitugafulu Eria.

Fai mai Elder Waddell o le aafiaga e tasi ua faaopoopo atu i le isi ma faaauau ai lava ona faaopoopo atu i le “oa o molimau” o loo ia faalagolago i ai e faafetaia’ia ai luitau o le olaga.

Ina ua saunoa e uiga i le tapenapenaga mo lona valaauga fou, sa ta’ua ai e Elder Waddell le malumalu.

“O le a se mea sa saunia ai i ma’ua mo lenei valaauga? Ina ua ma faatoa o i le malumalu mo le uluai taimi ma osia ai ni feagaiga, sa ma tautino atu o le a ma naunau e faia soo se mea e poloai mai ai le Alii ia i ma’ua, tusa lava pe le faigofie,” na ia saunoa ai. “O le o i le malumalu, faia o se misiona, osia o feagaiga, ma le vaaia o Lona aao ma le ala o loo Ia taitaiina ai le galuega—na pau lava lena o le mea e te manaomia. Ma te le o faia se isi mea e tulaga ese; o loo ma tausia feagaiga sa ma osia, e faapei foi o isi tagata uma.