Usa ka Sagrado nga Basahon

Usa ka gabii ang akong misyonaryo nga kompanyon ug ako nanuktok sa pultahan sa usa ka batan-ong lalaki nga usa ka international student nga nag-eskwela sa usa sa daghang mga unibersidad sa London. Gipasulod mi niya, ug among gipasabut nga kami mga misyonaryo sa Ang Simbahan ni Jesukristo sa mga Santos sa Ulahing mga Adlaw. Morag gusto kaayo siya nga makat-on pa og dugang mahitungod sa Pagpahiuli sa ebanghelyo, busa mipamatuod kami kabahin ni Propeta Joseph Smith ug misulti kaniya mahitungod sa usa ka sagrado nga basahon gikan sa atong Langitnong Amahan nga gitawag og Basahon ni Mormon. Among gipasabut og maayo nga sagrado kini tungod kay nagpamatuod kini kang Jesukristo.

Among gipasabut nga mahimo siyang masayud sa iyang kaugalingon sa kamatuoran niini ug mihatag kaniya og usa ka kopya. Sa dihang akong gitunol ngadto kaniya ang Basahon ni Mormon, mibarug siya sa iyang gilingkuran ug mibiya sa lawak nga wala magtingog. Gigunitan nako ang Basahon ni Mormon sa makadiyot, ug ang akong kompanyon ug ako nagtinan-away nga natingala sa hilum, naghunahuna unsay angay nga buhaton. Akong gibutang ang basahon sa lamesa.

Among nakita ang among batan-ong higala diha sa kusina nga nanghugas sa iyang mga kamot ug gitrapohan kini sa limpyong tualya aron mauga. Mibalik siya og sulod sa lawak ug gipunit ang Basahon ni Mormon gikan sa lamesa ug miingon lang, “Ang akong katawhan kanunay nga manghugas sa ilang mga kamot sa dili pa mohikap sa usa ka butang nga sagrado.” Mitulo ang mga luha sa akong mga mata samtang nagtan-aw ko niining batan-ong lalaki nga nag-abli sa Basahon ni Mormon sa unang higayon ug mipakli sa sagrado nga mga pahina niini gamit ang iyang limpyo nga mga kamot.

Si Alma mitudlo nga ang mga kasulatan sagrado ug gipreserbar aron sa pagdala sa mga kalag ngadto sa kaluwasan. Namahayag siya ngadto sa iyang anak nga lalaki nga si Helaman, “Ang Dios mitugyan kanimo uban niini nga mga butang, diin mga sagrado, diin siya miamping nga sagrado, ug usab diin siya moamping ug mopatunhay alang sa usa ka maalamon nga katuyoan diha kaniya, nga siya makapakita sa iyang gahum ngadto sa umaabut nga mga kaliwatan” (Alma 37:14).

Gipadala ko sa misyon aron itudlo ang gipahiuli nga ebanghelyo ni Jesukristo, apan ako ang natudloan niining batan-ong lalaki sa iyang limpyo nga mga kamot. Sa daghang mga kultura—lakip na ang akong kultura—dili kinahanglan nga manghugas sa among mga kamot sa dili pa mobasa sa mga kasulatan, apan ang iyang yano nga pagpakita sa pagrespeto mao ang usa ka balaang pagtahud ug gamhanang pahinumdom sa kasagrado sa Basahon ni Mormon.