Ang Basahon ni Mormon Namulong Kanako

Sa dihang ang among kinamanghuran nga anak, si Amanda, dos anyos, siya nahiling nga adunay leukemia. Ang iyang sakit grabe, ug ang iyang kanser wala mous-us human sa chemotherapy. Gikinahanglan nga butangan og uyok ang iyang bukog [bone marrow transplant].

Samtang ang akong bana ug duha nako ka anak nga mga lalaki didto sa balay sa Utah, akong giubanan si Amanda sa laing estado gikan sa Septyembre hangtud sa una nga bahin sa Enero. Wala kami makasaulog sa Pasko nga magkauban, apan sa pagtapos sa follow-up care, kami miuli sa balay.

Sa among unang bisita sa ospital alang sa check-up human makauli sa balay, ang mga doktor nakakita na usab og mga leukemia cell sa dugo ni Amanda. Ang pagbutang og uyok sa bukog [transplant] napakyas. Pagkadungog sa balita, mibati ko nga mora og kakuyapon. Ang among pamilya nagsagubang og daghan kaayong kabalaka, trabaho, panaglagyo, ug lisud nga mga panahon. Karon mawala ra gihapon ang among anak nga babaye.

Mibalik ko sa balay nianang pagkahapon para sa akong duha ka anak nga mga lalaki. Samtang nagpaabut kami sa akong bana nga mauli gikan sa trabaho, among gikuha ang among mga kopya sa Basahon ni Mormon ug misugod sa pagbasa. Anaa kami sa 2 Nephi 9. Samtang kami nagbasa, ang mosunod nga mga pulong namulong ngari kanako:

“Ako mamulong nganha kaninyo niini nga mga butang nga kamo magmaya, ug ihangad ang inyong mga ulo sa kahangturan, tungod sa mga panalangin diin ang Ginoong Dios motugyan diha sa inyong mga anak.

“Kay ako nasayud nga kamo misiksik pag-ayo, daghan kaninyo, aron masayud sa mga butang nga umaabut; busa ako nasayud nga kamo nasayud nga ang atong unod madunot ug mamatay; bisan pa niana, sa atong mga lawas kita makakita sa Dios. …

“Kay tungod ang kamatayon modangat ngadto sa tanan nga mga tawo, aron pagtuman sa maloloy-on nga laraw sa makagagahum nga Tiglalang, gikinahanglan gayud nga adunay gahum sa pagkabanhaw. …

“O pagkawalay katapusan sa kaayo sa atong Dios, kinsa nag-andam og paagi aron kita makalingkawas gikan sa pagkupot niini nga makalilisang nga mangtas; oo, kana nga mangtas, kamatayon. …

“Ug siya mianhi sa kalibutan aron siya moluwas sa tanan nga mga tawo kon sila mopatalinghug sa iyang tingog; kay tan-awa, siya miantus sa mga kasakit sa tanan nga mga tawo, oo, ang mga kasakit sa tanan nga mga buhi nga binuhat, mga lalaki, mga babaye, ug mga bata, nga nahisakop sa banay ni Adan.

“Ug siya miantus niini aron mabanhaw ang tanan nga mga tawo, nga silang tanan makabarug sa atubangan kaniya sa adlaw sa dako nga paghukom” (2 Nephi 9:3–4, 6, 10, 21–22).

Samtang nagbasa ko niini nga mga pulong, ang Espiritu Santo mipuno sa kwarto. Mibati ko nga ang akong Langitnong Amahan nasayud sa mga balita nga akong nadungog nianang adlawa. Mibati ko nga ang mga pulong ni propetang Jacob nga gisulat nga labaw sa 2,000 ka tuig na ang milabay gisulat alang kanako nianang adlawa ug gikan mismo sa Manluluwas. Siya nasayud sa kasakit ug kaguol nga akong gibati human madungog nga ang among anak nga babaye mamatay. Ug Siya anaa aron sa paghupay sa among pamilya uban sa Iyang saad nga Siya nag-andam og usa ka paagi ug moabut ang adlaw, pinaagi sa gahum sa Pagkabanhaw, “sa atong mga lawas kita makakita sa Dios.”

Si Amanda nabuhi pa og hapit usa ka tuig, apan wala gayud nako kalimti ang adlaw sa dihang ang mga pulong sa Basahon ni Mormon namulong ngari kanako sa akong panginahanglan ug ang Ginoo mihatag kanako og paglaum, kahupay, ug pagsabut sa Iyang plano.