Gibati Nako ang Kalayo sa Kahiladman

Nagdako ko nga nagtambungan sa Sunday School sa usa ka simbahan tupad sa akong balay sa bata pa ko didto sa Michigan, USA. Aduna koy maanindot nga magtutudlo nga mipuno nako sa gugma alang kang Jesukristo.

Matag semana manghatag siya og mga kard nga naghulagway sa mga panghitabo gikan sa mortal nga pangalagad sa Manluluwas, lakip na ang mga baruganan nga Iyang gitudlo ug mga milagro nga Iyang gihimo. Matag semana akong ipapilit ang mga kard ngadto sa usa ka scrapbook ug basahon og balik ang mga istorya sa Biblia. Samtang nagdako ko, padayon ko nga nagtuon sa mga Ebanghelyo diha sa Bag-ong Tugon.

Katuigan ang milabay, panahon sa summer sa 1968, ang mga misyonaryo sa Ang Simbahan ni Jesukristo sa mga Santos sa Ulahing mga Adlaw mibisita sa balay sa usa ka sakop sa pamilya. Iyang gibalibaran ang pagdapit sa mga elder sa pagkat-on mahitungod sa Simbahan apan gipaadto sila sa akong balay.

Sa among unang panagkita ang mga misyonaryo mitudlo kanako nga “ang pagsupil” nahitabo sa Simbahan nga gitukod ni Jesukristo (tan-awa sa 2 Mga Taga-Tesalonica 2:3). Unsay ilang gitudlo mitukma sa akong personal nga pagtuon, busa sa dihang nangutana sila kon mahimo ba sila nga mobisita nako og balik, miuyon ko.

Sa ilang sunod nga pagbisita, aduna koy listahan sa mga pangutana. Ang mga Santos sa Ulahing mga Adlaw namunyag ba pinaagi sa pagpaunlod? Mituo ba sila sa awtoridad sa priesthood? Mituo ba sila sa pagpang-ayo sa mga masakiton? Ang ilang mga tubag misuporta sa akong gitun-an sa Bag-ong Tugon. Sa pagtapos sa pagbisita, gibinlan ko nila og basahon nga giingon nila nga nagpamatuod kang Jesukristo.

Gibutang nako ang basahon ibabaw sa TV ug natulog. Apan pagka-tungang gabii, nahigmata ko sa usa ka kusog nga pagbati nga sa kaulahian akong nahibaloan nga mao ang Espiritu Santo. Gibati nako nga naaghat nga mosugod og basa, busa nagbasa ko sulod sa usa ka oras ug tunga sa wala pa mobalik sa higdaanan. Wala madugay human niana, nahigmata na usab ako nga adunay sama nga pagbati, busa nagbasa ko og dugang.

Kini nga pamaagi nagpadayon sulod sa duha ka gabii. Ganahan ko sa akong gibasa ug nasayran nga ang Basahon ni Mormon nagpamatuod kang Jesukristo.

Nakahukom ko nga mangamuyo sa Dios alang sa giya. Sa unang higayon sukad kaniadto nga bata pa ko, miluhod ko aron mag-ampo. Nangamuyo ko sa Langitnong Amahan sa pagtabang kanako nga masayud unsay buhaton sa kalayo nga akong gibati sa akong kahiladman. Sa dihang nahuman na ko sa akong pag-ampo, gibati nako nga naaghat nga moadto og balik sa asoy sa pagkakabig sa mga Lamanite diha sa 3 Nephi 9. Akong nabasa nga sila “gibunyagan uban sa kalayo ug uban sa Espiritu Santo, ug sila wala masayud niini” (bersikulo 20).

Ang hugpong sa mga pulong nga “sila wala masayud niini” nagsulti ngari kanako. Ang hunahuna miabut kanako: “Ang Simbahan ni Jesukristo ania gayud sa yuta!” Naghinam-hinam ko nga makig-istorya sa mga misyonaryo mahitungod sa unsay akong nabasa ug sa unsay akong nasayran karon. Apan sa dihang gitubag nila ang akong mga pangutana uban sa pagdapit nga magpabunyag, giingnan nako sila nga dili mahimo. Ang akong bana dili makasabut.

Sa akong pagpadayon og hunahuna mahitungod niana nga bersikulo, hinoon, akong naamguhan nga naglangkob kini og klaro nga direksyon alang kanako sa paghalad og sakripisyo nga “usa ka masulub-on nga kasingkasing ug usa ka mahinulsulon nga espiritu.” Nag-ampo ko ug nangamuyo sa akong Amahan sa Langit sa pagtabang kanako, nga Iyang gihimo. Human nga ang akong bana naminaw sa mga panaghisgutan sa misyonaryo, mihatag siya sa iyang pagtugot nga bunyagan ko.

Pagkamapasalamaton nako sa usa ka mahigugmaong Langitnong Amahan alang nianang bililhon ug gamhanan nga kasinatian nga akong nasinati isip usa ka batan-ong inahan sa pagbasa sa Basahon ni Mormon. Migiya kini kanako sa gipahiuli nga ebanghelyo ni Jesukristo. Isip resulta, ang impluwensya sa Espiritu Santo nga akong gibati niadtong mga gabii sa 1968 karon kanunay na nga gasa—nga naggiya kanako panahon sa akong kapin sa 40 ka tuig isip miyembro sa Simbahan.