Mga Pagtulun-an sa Atong Panahon
Kita nakat-on gikan sa daang mga propeta nga ang Basahon ni Mormon naglangkob og daghang mga “yano ug bililhong mga butang” nga gipreserbar aron sa pagtudlo kanato sa atong panahon (tan-awa sa 1 Nephi 13:40; 19:3). Kining mga kamatuoran naghatag og katin-awan ug dugang pagsabut sa kahingpitan sa ebanghelyo ni Jesukristo ug nagtabang sa mga estudyante sa Basahon ni Mormon nga makasagubang sa mga hagit sa kinabuhi uban sa paglaum ug kalig-on. Sa mosunod nga mga kinutlo, ang modernong mga propeta ug mga apostoles nagpamatuod niining mahinungdanong mga pagtulun-an.
Ang Ginoo Naghunahuna Kanato
“Napahinumduman ako sa mga pulong sa Ginoo nga makita diha sa basahon ni Ether sa Basahon ni Mormon. Miingon ang Ginoo, ‘Kamo dili makatabok niining dako nga lawod gawas kon Ako moandam kaninyo batok sa mga balud sa dagat, ug sa mga hangin nga molabay ngadto, ug sa mga lunop nga moabut’ [Ether 2:25]. Akong mga kaigsoonan, Siya nag-andam kanato. Kon kita maminaw sa Iyang mga pulong ug magsunod sa mga sugo, kita makaluhatay niining panahon sa pagkamatuguton ug pagkadautan—panahon nga matandi ngadto sa mga balud ug sa mga hangin ug sa mga baha nga makalaglag. Naghunahuna Siya kanunay kanato. Nahigugma Siya kanato ug mopanalangin kanato samtang kita nagbuhat unsa ang matarung.”
Presidente Thomas S. Monson, “Panapos nga Pakigpulong,” Liahona, Nob. 2009, 109.
Si Jesus Mao ang Kristo.
“Ang Basahon ni Mormon mao ang labing gamhanan nga sinulat nga pagpamatuod nga anaa kanato nga si Jesus mao ang Kristo. Unsa ang giingon ni Nephi nga mao ang basihan sa pagdawat sa Espiritu Santo? Hugot nga Pagtuo diha ni Ginoong Jesukristo. Ang pagbasa ba sa Basahon ni Mormon karon ug hangtud sa hangtud makasiguro og hugot nga pagtuo diha sa Ginoo nga si Jesukristo? Dili kamo magsalig lang niini kon kamo mabinantayong mobasa sa Nephi. Siya miingon kini ‘mao ang gasa … niadtong tanan kinsa makugihong nagtinguha kaniya.’ Ang pagkamakugihon siguradong nagpasabut og makakanunayon. Ug kini siguradong nagpasabut og pagpamalandong ug pag-ampo. Ug ang pag-ampo siguradong naglakip sa matinguhaong paghangyo aron masayud sa kamatuoran. Ang bisan unsa nga butang nga ubos pa niini lisud kaayong isipon nga makugihon. Ug ang bisan unsa nga butang nga ubos pa niini dili paigo alang kaninyo ug kanako.”
Presidente Henry B. Eyring, Unang Magtatambag sa Unang Kapangulohan, “Going Home,” sa Brigham Young University 1986–87 Devotional and Fireside Speeches (1987), 77–78.
Usa ka Pamahayag sa Ebanghelyo
“Ang mahinungdanon nga mga elemento sa mensahe sa ebanghelyo makit-an sa tanang balaan nga mga kasulatan apan kini tataw nga gihatag kanato diha sa Basahon ni Mormon ug diha sa mga pinadayag ngadto ni Propeta Joseph Smith. Dinhi si Jesus Mismo yanong mipahayag sa Iyang doktrina ug sa Iyang ebanghelyo, diin ang mga anak sa Dios kinahanglan mosunod aron ‘makaangkon og kinabuhing dayon’ (D&P 14:7).”
Presidente Dieter F. Uchtdorf, Ikaduhang Magtatambag sa Unang Kapangulohan, “Wala Ba Kita’y Rason nga Maglipay?” Liahona, Nob. 2007, 19.
Bunyag sa Gagmayng mga Bata
“[Pipila ang nagtuo] nga ang gagmay nga mga bata gipanamkon sa sala ug mosulod sa mortalidad sa usa ka kahimtang nga may kinaiyanhong kadautan. Kana nga doktrina sayop!
“‘Kon ako nasayud sa kamatuoran,’ si Mormon misulat, ‘dihay mga panaglalis diha kaninyo mahitungod sa bunyag sa inyong gagmay nga mga bata.’ (Moroni 8:5).
“Iyang gitawag kining panaglalis nga ‘dakong sayop’ ug misulat: …
“‘Paminaw sa mga pulong ni Kristo, imong Manunubos, imong Ginoo ug imong Dios. Tan-awa, ako mianhi sa kalibutan dili sa pagtawag sa mga matarung apan sa mga makakasala ngadto sa paghinulsol; ang himsog nga lawas wala magkinahanglan sa mananambal, apan sila nga mga masakiton; busa, ang gagmay nga mga bata walay sala, kay sila dili makahimo sa pagpakasala; busa ang tunglo ni Adan gikuha gikan kanila, nga kini walay gahum ibabaw kanila; …
“‘Ug sa ingon niini nga paagi gipatin-aw sa Espiritu Santo ang pulong sa Dios ngari kanako; busa, akong hinigugma nga anak, ako nasayud nga usa ka maugdang pagbiay-biay sa atubangan sa Dios, nga kamo kinahanglan mobunyag sa gagmay nga mga bata’ (Moroni 8:7–9). …
“Basaha ang iyang tibuok sulat. Kini tinuod nga doktrina.”
Presidente Boyd K. Packer, Presidente sa Korum sa Napulog Duha ka mga Apostoles, “Little Children,” Ensign, Nob. 1986, 17.
Mga Pasidaan gikan sa Basahon ni Mormon
“Lakip sa mga leksyon nga atong makat-unan sa Basahon ni Mormon mao ang hinungdan ug epekto sa gubat ug sa unsa nga mga kondisyon nga kini makatarunganon. Naghisgut kini mahitungod sa mga kadautan ug kapeligro sa tinago nga mga kalihokan, nga gitukod aron makaangkon og gahum ug bintaha sa ubang mga tawo. Naghisgot kini mahitungod sa katinuod ni Satanas ug naghatag og mga timaan sa pipila ka mga paagi nga iyang gigamit. Nagtambag kini kanato mahitungod sa sakto nga paggamit sa katiguyanan. Naghisgot kini kanato mahitungod sa yano ug bililhon nga mga kamatuoran sa ebanghelyo ug sa katinuod ug sa kabalaan ni Jesukristo ug sa Iyang maulaon nga sakripisyo alang sa tanang katawhan. Nagsulti kini kanato mahitungod sa pagpanagpundok sa balay ni Israel sa ulahing mga adlaw. Nagsulti kini kanato mahitungod sa katuyoan ug mga baruganan sa misyonaryo nga buhat. Nagpahimangno kini kanato batok sa garbo, sa dili pagpanumbaling, pag-unya-unya, sa mga kapeligro sa dili gusto nga mga tradisyon, pagpakaaron-ingon, ug pagkamalaw-ay.
“Karon anaa ra gyud nato ang pagtuon sa Basahon ni Mormon ug magkat-on sa mga baruganan niini ug gamiton kini sa atong mga kinabuhi.”
Elder L. Tom Perry sa Korum sa Napulog Duha ka mga Apostoles, “Mga Panalangin Tungod sa Pagbasa sa Basahon ni Mormon,” Liahona, Nob. 2005, 8.
Ang Tanang mga Butang Ipahiuli
“Ang katinuod ug kamalukpanon nga kinaiyahan sa pagkabanhaw klaro nga gihulagway sa Basahon ni Mormon. Si propetang Amulek mitudlo:
“‘Ang kamatayon ni Jesukristo mohubad sa mga higot niini nga temporal nga kamatayon, nga ang tanan pagabanhawon gikan niini nga temporal nga kamatayon.
“‘Ang espiritu ug ang lawas pagahiusahon pag-usab diha sa iyang hingpit nga kahimtang; ang mga bahin sa lawas ug ang lutahan mapahiuli sa iyang tukma nga bayanan, gani sama kanato karon niini nga panahon; …
“‘Karon, kini nga pahiuli modangat sa tanan, tigulang ug batan-on, ulipon ug gawasnon, lalaki ug babaye, dautan ug matarung; ug gani walay buhok sa ilang mga ulo nga mawala; apan ang matag butang ipahiuli ngadto sa iyang hingpit nga bayanan’ (Alma 11:42–44).
“Si Alma mitudlo usab nga inigkabanhaw ang ‘tanan nga butang ipahiuli ngadto sa ilang tukma ug hingpit nga bayanan’ (Alma 40:23). …
“Makahupay kaayo nga masayran nga ang tanan nga may kakulangan sa panglawas niining kinabuhia … mabanhaw sa ‘tukma ug hingpit nga bayanan.’”
Elder Dallin H. Oaks sa Korum sa Napulog Duha ka mga Apostoles, “Resurrection,” Liahona, Hulyo 2000, 17.
Mga Peligro sa Tinago nga mga Kalihokan
“Ang Basahon ni Mormon nagtudlo nga ang tinago nga mga kalihokan nga naghimo sa pagpatay usa ka seryuso nga hagit, dili lamang isip indibidwal ug mga pamilya apan sa tibuok sibilisasyon. Ang pipila sa tinago nga mga kalihokan karon mao ang mga gang, pagpayuhot og mga drugas, ug pag-organisar og krimen sa mga pamilya. Ang tinago nga mga kalihokan karon naglihok sama gayud sa mga tulisan ni Gadianton sa panahon sa Basahon ni Mormon. … Usa sa ilang mga katuyoan mao ang ‘makabuno, ug makapanglungkab, ug makapangawat, ug makabuhat sa malaw-ay nga mga buhat ug sa tanan nga matang sa pagkadautan, supak sa mga balaod sa ilang nasud ug usab sa mga balaod sa ilang Dios’ [Helaman 6:23].
“Kon kita dili magbantay, ang tinago nga mga kalihokan karon makaangkon og gahum ug impluwensya sa ingon ka dali ug ingon ka hingpit sama sa nahitabo sa panahon sa Basahon ni Mormon.”
Elder M. Russell Ballard sa Korum sa Napulog Duha ka mga Apostoles, “Standing for Truth and Right,” Ensign, Nob. 1997, 38.
Pagsulbad sa mga Hagit sa Kinabuhi
“Ang Basahon ni Mormon naglangkob og mga mensahe nga balaanong gibutang didto aron ipakita kon sa unsang paagi ikorihir ang impluwensya sa sayop nga tradisyon ug unsaon sa pagdawat og kahingpitan sa kinabuhi. Kini nagtudlo kanato kon unsaon sa pagsulbad sa mga problema ug mga hagit nga atong giatubang karon. … [Ang Ginoo] nag-andam og paagi sa pagkorihir sa dagkong mga sayop sa kinabuhi, apan ang giya niini walay bili kon kini magpabilin nga natago sa sirado nga basahon.”
Elder Richard G. Scott sa Korum sa Napulog Duha ka mga Apsotoles, “True Friends That Lift,” Ensign, Nob. 1988, 76.
Usa ka Pahinumdom sa Atong mga Pakigsaad
“Kita gipahinumduman gikan sa Basahon ni Mormon nga ang atong bunyag usa ka pakigsaad nga ‘mobarug ingon nga mga saksi sa Dios [ug sa Iyang gingharian] sa tanan nga mga panahon ug diha sa tanan nga mga butang, ug diha sa tanan nga mga dapit nga kamo mahimo nga maanaa, bisan hangtud sa kamatayon, nga kamo mahimo nga matubos sa Dios, ug malakip uban niadto nga diha sa unang pagkabanhaw, nga kamo makabaton og kinabuhi nga dayon’ (Mosiah 18:9; empasis gidugang).”
Elder Robert D. Hales sa Korum sa Napulog Duha ka mga Apostoles, “The Covenant of Baptism: To Be in the Kingdom and of the Kingdom,” Liahona, Ene. 2001, 7.
Mga Panalangin sa Pagkamasulundon
“Sa daghang mga dapit diha sa Basahon ni Mormon, ang mga katawhan gisaaran nga sila mouswag sa yuta kon sila mosunod sa mga kasugoan [tan-awa sa 1 Nephi 2:20; 2 Nephi 4:4]. Kini nga saad sa kasagaran giubanan og pasidaan nga kon sila dili mosunod sa mga kasugoan sa Dios, sila isalikway gikan sa Iyang atubangan [tan-awa sa Alma 36:30].”
Elder Quentin L. Cook sa Korum sa Napulog Duha ka mga Apostoles, “Hinaut nga Ikaw Nahibalo, Kami Naglisud Gayud,” Liahona, Nob. 2008, 104.