Naʻe Ongo Totonu pē Ia

ʻOku fetuʻutaki ʻa e Laumālié ʻi ha ngaahi founga lahi. Kuó u ʻosi aʻusia ha ngaahi momeniti nonga, ongo fakafiemālie, pea mo ha fakakaukau mahinongofua. Ko ha niʻihi ʻo ʻeku ngaahi ongo mālohi tahá ʻoku hoko mai pē ia ko ha ongoʻi ʻo e moʻoní mo e totonú. ʻOku faingataʻa ke fakamatalaʻi ʻa e ongó, ka ʻoku ʻi ai ia ʻi heʻete ʻiloʻi pē ʻoku moʻoni ha meʻá pea ʻoku fie maʻu ke ke ngāue.

Ko e taha ʻo e ngaahi aʻusia mālohi taha kuó u maʻu fakataha mo e ongo ko ʻení naʻe hoko ia ʻi heʻeku feinga ke maʻu ha fale ke u fakatau. Naʻe teʻeki ai ke u mali pea kuo taʻu lahi ʻeku fakakaukau ke fakatau ha falé. Naʻá ku talaange ki he fakafofonga kelekelé ʻa e faʻahinga fale naʻá ku fie maʻú, pea naʻá ne fakahoko ha ngāue lelei ʻi hono kumi ʻo e ngaahi fale naʻe feʻunga mo ia naʻá ku fakamatalá. Naʻá ne fakaʻaliʻali mai kiate au ha ngaahi fale, ka naʻe ʻikai ke u tali ʻe au koeʻuhí he naʻe ʻikai ke ongo tonu. Naʻe kamata leva ke ne ʻeke mai kiate au pe ko e hā e meʻa naʻe ʻikai ke u saiʻia ai ʻi he ngaahi falé taki taha koeʻuhí ka ne lava ʻo fakaʻaliʻali mai kiate au ha ngaahi ʻapi ko ē ʻe feʻunga mo ʻeku fie maʻú. Kae pangó, he naʻe ʻikai ke u fakamatalaʻi pau ʻa e meʻa naʻe fehālākí.

Naʻe fāifai pea aʻu ki ha hoʻatā ʻe taha naʻá ma hū atu ai ʻi ha fale naʻe ʻikai ke fuʻu sai ia ʻo hangē ko e toenga naʻá ma mamata aí. Naʻe kiʻi mamafa ange ia ʻi he toengá. Ka naʻe feʻunga ia mo e meʻa naʻá ku fakamatala fekauʻaki mo ia naʻá ku fie maʻú kae ʻikai ke fuʻu lelei ʻo hangē ko ha niʻihi naʻá ma ʻosi mamata aí. Neongo ia, ʻi he hili ʻema hū takai holo aí, naʻá ku talaange leva ki he fakafofonga kelekelé ʻoku ou fie fokotuʻu haʻaku mahuʻinga. Naʻe hangē naʻe ʻohovalé, ʻi heʻeku fie fakahoko fakavavevavé. Naʻe tonu pē ke ʻohovale, ʻi heʻete fakakaukau atu ki heʻeku ʻāʻāmio he ngaahi māhina ki muʻá. Ka ko e ongo ko iá, ko e feituʻu ʻeni naʻá ku fie nofo aí, naʻe mālohi fau. Naʻe ʻikai ke u ongoʻi ʻe au naʻe fie maʻu ke u toe tatali mo toe fakakaukauʻi.

Naʻe fakahoko ʻeku talamahuʻingá, pea tali ʻe he kau fakataú, neongo naʻe ʻikai ko e talamahuʻinga māʻolunga taha ia ne nau maʻú. Naʻá ku talaange ki hoku fāmilí naʻá ku ʻilo ʻoku totonu ke u nofo ʻi he fale ko ʻení, neongo naʻe ʻikai ke u ʻilo hono ʻuhingá.

Naʻe vave pē ʻeku ʻilo hono ʻuhinga naʻe fie maʻu ai ke u nofo aí. Naʻá ku fetaulaki, ʻi he māhina pē naʻá ku hiki atu aí, mo ha fefine ʻi he uooti tāutahá. ʻOsi mei ai ha taʻu ʻe taha nai, kuó ma tūʻulutui fehangahangai ʻi he ʻōlita ʻi he temipalé, ʻa ia ne silaʻi ai kimaua ko e husepāniti mo e uaifi.

ʻOku ngāue moʻoni ʻa e ʻEikí ʻi ha ngaahi founga fakamisiteli. Naʻe ʻikai ke u ʻilo ʻe au naʻá Ne tataki au ki he mali taʻengatá ʻi Heʻene tokoni mai ʻi heʻeku fili ha falé. Ko e meʻa pē naʻá ku ʻiló naʻe tataki au ke u fakahoko ʻeni, pea kuó u lava ʻeni ke sio naʻe haʻu ʻa e fakahinohinó mei Hono Laumālié.