“ʻOku ou ongoʻi lōmekina ʻi he taimi ʻe niʻihi ʻi heʻeku fakakaukau atu ki he ngaahi meʻa kotoa ʻoku fie maʻu ke u fai ke moʻui ʻaki e ongoongoleleí. Te u kamata naí ʻi fē?”

ʻOku ʻikai fie maʻu ʻe he ʻEikí ia ke tau haohaoa ʻi he ngaahi meʻa kotoa pē, ka ʻokú Ne fie maʻu ke tau fai ʻa e lahi taha ʻo e meʻa ʻoku tau malava ke faí. Kapau ʻoku ʻuhingá ke tau kamata mei he ngaahi tefitoʻi meʻa īkí hangē ko e ako fakaʻaho ʻo e folofolá mo e lotú, te Ne hōifua mai ki heʻetau feingá. ʻI heʻetau loto fiemālie ke moʻui ʻaki ʻa e ongoongoleleí mo fai ʻa e ngaahi meʻa iiki mo faingofua ʻoku fie maʻu meiate kitautolú, ʻa e fanga kiʻi meʻa hā ngali lōmekina ʻokú Ne kole mai ke tau faí, he ʻikai pe toe fuʻu ngali lōmekina ia.

ʻOku mātuʻaki mahuʻinga ke tau moʻui ʻaki e ongoongoleleí fakataha mo hotau fāmilí. ʻE lava ke tau kamata moʻui ʻaki ia ʻo fakafou ʻi he lotu fakafāmilí, ako fakafāmili ʻo e folofolá, efiafi fakafāmili ʻi ʻapí pea mo hono fakahoko ʻo e hisitōlia fakafāmilí. ʻOku tokoni lahi e ngaahi tefitoʻi moʻoni ko ʻení ke toe fakamahino lahi ange ʻa e meʻa ʻe lava ke fai ʻe he ongoongolelei ʻo Sīsū Kalaisí ʻi heʻetau moʻuí.

Lau ʻa e folofolá mo lotu fakaʻaho. Fekumi maʻu pē ke maʻu e takaua ʻo e Laumālie Māʻoniʻoní. ʻE tokoni atu ʻa e Tamai Hēvaní ke ke moʻui ʻaki ʻa e ongoongoleleí. Fekumi maʻu pē ki Heʻene tokoní. Kolea ʻa ʻEne fakahinohinó kae lava ke ke fai ʻa ia ʻokú Ne finangalo ke ke faí. Te ke ongoʻi ʻa e takaua ʻo e Laumālié ʻi he fili totonu kotoa pē ʻokú ke faí. ʻE hoko ia ke ke maʻu ai ha loto holi ke lahi e ngaahi fili totonu ʻokú ke faí.

Kuó u ako ʻo ʻilo ko e taimi ʻokú te feinga ai ke fai ʻa e meʻa kotoa peé, ʻe lava ke ke ongoʻi mafasia. Kapau te ke feinga ke fai pē ho lelei tahá ʻi he ʻaho takitaha, te ke sai pē koe. Kapau te ke fakafanongo ki he Laumālie Māʻoniʻoní pea nofo ʻo ofi ki he ʻEikí ʻo fakafou ʻi he lotú mo hono ako ʻo e folofolá, ʻe lelei e meʻa kotoa pea vave hoʻo aʻusia e tokotaha ʻoku finangalo e ʻEikí ke ke aʻusiá. Naʻá ku feinga ke u meimei haohaoa peá u hohaʻa pe ʻoku ou lelei feʻunga nai, ka ʻoku ʻikai ko e meʻa ia ʻoku fie maʻu ʻe he ʻEikí. ʻOku ʻikai mei he ʻEiki ʻa e ongoʻi taʻe feʻungá mo tukuhifo pē kitá. Ko ia ai, foaki ki he ʻEikí ho lelei tahá pea te ke maʻu ha nonga mo e fiefia ʻi hoʻo moʻuí.

ʻOku ʻi heni e ongoongoleleí ke tokoniʻi kitautolu, kae ʻikai ke fakatupu hohaʻa kiate kitautolu. Kapau te tau falala ki he ʻEikí, ʻe lava ke tau falala ki Heʻene ongoongoleleí. ʻI he taimi ʻokú ke maʻu ai ʻa e falala ko iá, he ʻikai lava ke taulōfuʻu hoʻo moʻuí ʻi hono moʻui ʻaki ʻo e ongoongoleleí koeʻuhí he kuo mahino ʻa e ʻuhinga ʻokú ke moʻui ʻaki ai iá.

ʻOua naʻá ke fakakaukau ki he ngaahi meʻa kotoa ʻoku fie maʻu ke fakahoko ʻi hoʻo kei moʻuí; fakakaukau pē ki he meʻa ʻoku fie maʻu ke fai ʻi he taimi ní. Fai ho lelei tahá, pea ʻe faitokonia koe ʻe he Tamai Hēvaní ke fakahoko ia. Hangē ko ʻení, lolotonga ʻeku teuteu ke akoʻi ha lēsoni semineli fekauʻaki mo Tōmasi S. Monisoni, naʻá ku fifili pe te u lava fēfē ke ʻai ha fānau ʻe toko fitu (ne nau lalahi kotoa ʻiate au) ke nau fanongo, ako, pea tokanga. Naʻá ku pehē ke u feinga ke fakakau kinautolu ʻi he lahi taha ʻe ala lavá. Naʻe ola lelei! Ko ia, fai ho lelei tahá ʻi he ngāue ʻoku ʻi muʻa tonu ʻiate koé.

Kuo folofola ʻa e ʻEikí te Ne foaki mai ha tokāteline ʻi he “ʻotu lea ki he ʻotu lea, ʻa e akonaki ki he akonaki, ko e siʻi ʻi heni pea siʻi ʻi hena” (2 Nīfai 28:30). He ʻikai lava ke tau ʻamanaki atu ke maʻu ha mahino fakaʻangataha ki he ongoongoleleí, ka ʻi heʻetau kamata mei he ngaahi tefitoʻi meʻa īkí—ʻa e ʻofa faka-Kalaisí, tuí mo e ʻamanaki leleí—pea ʻi heʻetau ako ʻa e folofolá, fakaʻaongaʻi fakaʻaho ia, mo lotu maʻu ai peé, te tau fakalakalaka māmālie pea tau ʻunu atu ʻo toe ofi ange kia Kalaisi.