Ko ha Malaʻe-vaʻinga moʻo Kali

ʻOku femoʻuekina ʻa Kali W. mei Lekisipeeki ʻi ʻAitahō, ʻi ʻAmeliká, ʻi hono fai ʻo e ngāue tokoní. ʻOku tokoni ʻa Kali ʻi ʻapi ʻi hono tokangaʻi ʻenau fanga pusí, kulií, mo e fanga moa ʻa e fāmilí. Koeʻuhí ʻoku hoko ʻa Kali ko ha tokotaha tuʻukimuʻa ʻi heʻene kalasí he akó, ʻokú ne tokoni ai ki he fanau kehé ʻi he fiká mo e laukongá. ʻI he Palaimelí, ʻoku tokoni ʻa e hiva ʻa Kalí ke ongoʻi ʻe he fānaú ʻa e Laumālié.

Koeʻuhí ko e ngāue lelei ko ʻeni ʻa Kali ʻi hono tokoniʻi ʻo e niʻihi kehé, ne fakakaukau leva hono ngaahi kaungāmeʻá ke nau tokoni foki ki ai.

Naʻe fāʻeleʻi ʻa Kali mo ha fokoutua ʻoku ui ko e spina bifida. ʻOku faingataʻa ai kia Kali ke ne fakaʻaongaʻi kotoa hono uouá. ʻOku faingataʻa ki ai ke lue ʻi ha kelekele toka kovi pe kaka ʻi ha sitepu. ʻI he akó, naʻe ʻikai lava ʻa Kali ʻo vaʻinga ʻi he malaʻevaʻingá he naʻe faingataʻa ke ne ngāue ʻaki e ngaahi meʻavaʻinga aí. Naʻe ʻi ai pē foki mo ha fānau kehe ne ʻikai ke nau lava ʻo vaʻinga ʻaki e meʻavaʻinga ʻi he malaʻe vaʻingá.

Naʻe pehē ʻe Kali, “Ko e taimi ʻe niʻihi ʻoku ou ongoʻi kovi mo puputuʻu ʻi he ʻikai ke u lava ʻo vaʻinga ʻi he malaʻevaʻingá he taimi malōloó.

Naʻe ʻi ai ha kaungāmeʻa ʻo Kali ko Holi Siō, pea naʻe fakakaukau e faʻē ʻa Holi Sioó ke tānaki ha paʻanga ke langa ʻaki ha malaʻevaʻinga ke lava ʻa Kali mo e toenga ʻo e fanau akó ʻo fakaʻaongaʻi.

Naʻe kamata ngāue leva ʻa Holi Siō, ʻene faʻeé, fakataha mo ha kakai tokolahi kehe ke maʻu ha paʻanga ki he malaʻevaʻinga foʻoú. Naʻe fai ha ngāue lahi, ka naʻa nau lava ʻo maʻu ha paʻanga feʻunga ke langa ha malaʻe vaʻinga foʻou ke lava ai e fānau akó kotoa ʻo vaʻinga.

Naʻe pehē ʻe Holi Siō, “Ko ha ngāue faingataʻa lahi, ka naʻe ʻikai te u mamahi ʻi hono fai e ngāué—naʻe hoko ia ko ha meʻa ke u ʻofa lahi ange ai ʻia Kali.

ʻOku fiefia ʻa Kali ʻi heʻene lava ʻo vaʻinga ʻi he malaʻevaʻingá mo hono ngaahi kaungāmeʻá. Naʻá ne pehē “ʻOku ou saiʻia ʻi he lue he tafungofungá mo fakapaheke ʻi he silaití. ʻOku ou fiefia fakataha mo hoku ngaahi kaungāmeʻá.