Fakamālō ki Heʻeku Faiako Lautohi Faka-Sāpaté

ʻOku ʻikai ke ʻapasia maʻu pe ʻeku kalasi Lautohi Faka-Sāpaté. ʻOku ou manako ke fanongo ki he lēsoní ʻi he uike kotoa pē, ka ʻi he taimi ʻe niʻihi ʻoku hangē ʻoku ʻi ai ha niʻihi ia heʻeku kalasí ʻoku ʻikaí. ʻOku nau faʻa pōtalanoa pē ʻiate kinautolu pe vaʻinga keimi he ngaahi nāunau fakaʻilekitulōniká kae kei feinga pē ʻemau faiakó ke akoʻi kimautolu. Ko e fakamamahí, he ʻoku ou faʻa fakatokangaʻi he taimi ʻe niʻihi kuó u hoko au ko e konga ʻo e palopalemá.

ʻI ha uike ʻe taha ne mau fuʻu kovi ʻaupito, pea ʻi he ʻosi ʻa e kalasí, kuo aʻu ʻo tangi ʻemau faiakó he naʻe ʻikai ke fanongo ha taha ia ki heʻene lēsoní. Pea ʻi heʻemau hū ki tuʻa mei he kalasí, naʻá ku ongoʻi halaia koeʻuhí ko ia.

ʻI he Sāpate hono hokó ne fakamatala mai heʻemau faiakó naʻe lotu lahi he uike ko iá, ʻo kole ha fakahinohino, pea ongo ki ai ke ne huluʻi mai ha foʻi filimi ʻa e Siasí. Naʻá ne kamata leva ʻa e kiʻi foʻi heleʻuhilá, ʻa ia naʻe fekauʻaki mo e moʻui ʻa Sīsū Kalaisí pea mo e ngaahi mana naʻá Ne fakahokó.

ʻI heʻeku fakakaukau ki he kiʻi foʻi filimí ʻi he efiafi ko iá, naʻá ku ongoʻi ha faʻahinga meʻa naʻe kehe. Naʻe fakafokifā pē ʻeku fakatokangaʻi ko ʻeku ongoʻi ʻeni ʻa e Laumālié, ʻo laka ange ia ʻi ha toe taimi ki muʻa. Naʻá ku pehē leva he taimi pē ko iá te u fai ha ngaahi liliu ʻi heʻeku moʻuí ke u tatau lahi ange mo e Fakamoʻuí, pea naʻá ku fakatokangaʻi ko e meʻa ne hoko he Lautohi Faka-Sāpaté ʻi he ʻaho ko iá, kuó ne fakamālohia lahi fau ʻeku fakamoʻoní. ʻOku ou fakamālō lahi ki heʻeku faiako Lautohi Faka-Sāpaté mo e meʻa kotoa pē naʻá ne fai maʻa ʻemau kalasí he uiké takitaha.