Ngaahi Fakakaukau Maʻá e Efiafi Fakafāmili ʻi ʻApí
ʻOku maʻu ʻi he makasini ko ʻení ha ngaahi fakamatala mo e ʻekitivitī ʻe malava ke ngāue ʻaki maʻá e efiafi fakafāmili ʻi ʻapí. Ko e niʻihi ʻeni ʻo e ngaahi sīpingá.
“Fakamālohia Fakalaumālie mo Fakatuʻasino Kitautolu ʻe he ʻAukaí,” peesi 10: Lau ʻa e fakamatalá, vahevahe ʻa e ngaahi meʻa ʻoku fakatātaaʻi ʻi he peesi hono uá. Fakamamafaʻi ange ko e ʻaukaí ʻoku ʻikai ko e taʻekai ʻataʻatā pē—ʻoku totonu ke ʻalu fakataha ia mo e lotú, fakamoʻoní, mo e foaki ʻaukaí. Te ke fie kole ki he kau mēmipa ho fāmilí ʻa e founga kuo tāpuekina ai kinautolu ʻe he ʻaukaí. Toe fakakaukau pē ke vahevahe ʻa e talanoa ʻi he Fuakava Motuʻá ʻoku maʻu ʻia ʻĒseta vahe 4.
“Ngāue ki he Ngaahi Ueʻi Fakalaumālié,” peesi 20: Lau pe fakamatalaʻi fakanounou ʻa e “Ngaahi Taumuʻa ʻe Valu ʻo e Fakahaá.” Toki lau tahataha leva ʻa e ngaahi talanoa ʻi he fakamatalá mo fealēleaʻaki ki he taumuʻa ʻo e fakahaá ʻi he talanoá. Fakalotolahiʻi ʻa e kau mēmipa ʻi he fāmilí ke nau tokanga ʻi he uiké ni ki he taimi mo e founga ʻoku nau ongoʻi ai ʻa e Laumālié. Te ke fie muimuiʻi ʻeni ʻi he uike kahaʻú ke aleaʻi ʻa e meʻa naʻa nau akó.
“ʻE Iku Nai Ki Fē ʻEku Ngaahi Filí?” peesi 56: Lau pe fakamatalaʻi fakanounou ʻa e talanoá; pea lau leva ʻa e lea ʻa Palesiteni Poiti K. Pēká. Fakamanatu ki he kau mēmipa ʻi he fāmilí kapau kuo nau fakahoko ha ngaahi fehalaaki, te nau lava ʻo fili ke liliu.
“Ko e Lēsoni ʻo e Kautaha Sipoti Īkí,” peesi 68: Te ke lava ʻo kamata ʻaki hono hivaʻi ʻa e “Ko e Fāmilí ke Taʻe Ngata” (Ngaahi Himí, 192). Lau fakafāmili ʻa e talanoá. Ko e hā ʻoku mahuʻinga ai kiate kitautolu ke tau fakahā ʻetau poupoú maʻá e kau mēmipa hotau fāmilí? ʻE lava fēfē ke toe lahi ange ʻa e fepoupouʻaki ʻa e tokotaha kotoa pē ʻi ho fāmilí?
Ko e ʻOfá mo e Māmá ʻi he Efiafi Fakafāmili ʻi ʻApí
ʻI he taimi naʻá ku toki papi ului aí mo nofo ʻi Kolomipiá, naʻe fakaafeʻi au ʻe ha fāmili makehe ʻi hoku uōtí ki ha efiafi fakafāmili ʻi ʻapi. Ko e fuofua taimi ʻeni ke u kau atu ki he efiafi fakafāmili, pea naʻe fakaʻohovale kiate au ʻa e laumālie ʻo e ʻofa mo e tui naʻá ku maʻu aí.
ʻI he hili pē ʻa e fakatahataha kotoa maí, naʻa mau lotu pea mau vahevahe leva ʻa e ngaahi meʻa naʻa mau fai ʻi he uike kuo ʻosí. Hili ʻemau talanoá, naʻe fakahoko ha ʻekitivitī.
Naʻa mau tohi ha ngaahi kupuʻi lea ʻi ha ngaahi pepa haati [hearts] fakalanulanu, lolotonga ia ʻoku tamateʻi ʻa e māmá. ʻI he taimi naʻa mau ʻosi aí, naʻe fakamoʻui ʻa e māmá pea fakaʻaliʻali ʻa e ngaahi meʻa naʻa mau tohí. Naʻe ʻi ai ha niʻihi naʻe ʻikai fuʻu lelei, ko e niʻihi naʻe kovi ʻaupito, pea mo e niʻihi hangē ko aú naʻe faingataʻa ʻemau feinga ke tohí; ʻoku ou tui ko ʻeku tohí naʻe kovi tahá. Kae kehe, naʻe mahino ʻaupito ʻa e lēsoní: ʻi he taimi ʻoku ʻikai ke tau maʻu ai ʻa e maama ʻo e ongoongoleleí ʻi heʻetau moʻuí, ʻoku hā fakapoʻuli ʻa e meʻa kotoa pē, ʻoku fakakeheʻi, mo faingataʻa.
Naʻe ongo moʻoni ʻa e lēsoni ko ʻení kiate au. Pea ʻi he ngaahi taʻu talu mei he ʻaho ko iá, kuó u feinga ke fakapapauʻi ʻoku fononga ʻeku moʻuí ʻi ha hala ʻoku fonu ʻi he maama ʻo e ongoongoleleí tautautefito ke u malava ʻo hoko ko ha faʻifaʻitakiʻanga ki heʻeku fānaú.
Tina tela Pila Maisitā, Kalefōnia, USA