ʻOtu Lea ki he ʻOtu Lea
Tokāteline mo e Ngaahi Fuakava 135:3
Kimuʻa pea fakapoongi fakamāʻata ʻa e Palōfita ko Siosefa Sāmitá naʻá ne ʻomai ha ngaahi meʻa lahi ke faitāpuekina ai e faʻahinga kotoa ʻo e tangatá.
“Kuo fai ʻe Siosefa Sāmita, ko e Palōfita mo e Tangata Kikite ʻa e ʻEikí, kuó ne fakahoko ha meʻa lahi ange ki hono fakamoʻui ʻo e faʻahinga ʻo e tangatá ʻi he māmaní, tuku kehe ʻa Sīsū pē, ʻi ha toe tangata ʻe toko taha ʻa ia naʻe moʻui ʻi ai ʻi ha kuonga. ʻI ha vahaʻa fuonounou ʻo e taʻu ʻe uofulu, kuó ne ʻomai ʻa e Tohi ʻa Molomoná, ʻa ia naʻá ne liliu ʻi he meʻafoaki mo e mālohi ʻo e ʻOtuá, pea kuo fou ʻiate ia ʻa hono pulusi ia ʻi he ongo fuʻu fonua lalahi ʻe ua; kuó ne ʻoatu ʻa hono kakato ʻo e ongoongolelei taʻengatá, ʻa ia naʻe tuʻu ʻi aí ki he potu ʻe fā ʻo e māmaní; kuó ne ʻomai ʻa e ngaahi fakahā mo e ngaahi fekau ʻa ia ʻoku kau ʻi he tohí ni ʻo e Tokāteline mo e Ngaahi Fuakavá, pea mo ha ngaahi tohi lahi mo e ngaahi akonaki kehe ʻoku ngali potó koeʻuhi ke ʻaonga ki he fānau ʻa e tangatá; kuó ne tānaki ʻa e lau afe ʻo e Kau Māʻoniʻoni ʻi he Ngaahi ʻAho Kimuí Ni, mo fokotuʻu ha fuʻu kolo lahi, pea tuku ha ongoongo lelei mo e hingoa ʻa ia ʻoku ʻikai lava ke tāmateʻi. Naʻe fisifisimuʻa ʻa ʻene moʻuí, pea pekia ʻoku tuʻu-ki-muʻa ʻi he ʻao ʻo e ʻOtuá mo hono kakaí; pea hangē ko e tokolahi ʻo e kau pani ʻa e ʻEikí ʻi he ngaahi kuonga ʻi muʻá, kuó ne fakamaʻu hono tufakangá mo ʻene ngaahi ngāué ʻaki hono toto ʻoʻoná” (T&F 135:3).
Tangata kikite
Ko ha Tangata kikite
-
Kuo fakamafaiʻi ke sio ʻaki e mata fakalaumālié ki ha “ngaahi meʻa naʻe ʻikai ke faʻa hā mai ki he mata fakanatulá” (vakai, Mōsese 6:35–38).
-
Ko ha tokotaha maʻu fakahā mo ha palōfita (vakai, Mōsaia 8:13–16).
-
ʻIloʻi ʻa e kuohilí, lolotongá, mo e kahaʻú.
Fakahoko ha Meʻa Lahi Ange
Ko e ngāue naʻe fakakaungātāmaki ai ʻa Siosefa Sāmitá naʻe ʻikai fakangatangata ia ki he moʻuí ni pē, ka ʻoku toe fekauʻaki foki ia mo e moʻui ka hoko maí, pea mo e moʻui naʻe ʻi aí. Ko hono fakalea ʻe tahá, ʻoku fekauʻaki ia mo kinautolu kuo nau moʻui ʻi he māmaní, ʻa kinautolu ʻoku moʻuí pea mo kinautolu ʻe muimui mai ʻi hotau tuʻá. ʻOku fekauʻaki … ia mo e faʻahinga kotoa ʻo e tangatá mei ʻitāniti ki ʻitāniti.”
Palesiteni Siosefa F. Sāmita (1838–1918), Ngaahi Akonaki ʻa e Kau Palesiteni ʻo e Siasí: Siosefa F. Sāmita (1998), 16.
Meʻafoaki mo e Mālohi ʻo e ʻOtuá
Naʻe liliu ʻe Siosefa Sāmita ʻa e Tohi ʻa Molomoná “ʻi he ʻaloʻofa ʻa e ʻOtuá, ʻi he mālohi ʻo e ʻOtuá” (T&F 1:29) mo e “ʻngaahi founga naʻe teuteuʻi” (T&F 20:8), ʻo kau ai e ʻUlimí mo e Tumemí.
Ongoongo mo e Hingoa He ʻIkai Lava ke Tāmateʻi
“Neongo naʻe fakamamahi e ngaahi meʻa naʻe hoko ‘i he ‘aho 27 ‘o Sune 1844 [ hono fakapoongi fakamāʻata ‘o Siosefa mo Hailame Sāmitá], ka ʻoku tau maʻu ha loto fiemālie ʻi heʻetau ʻiloʻi naʻe ʻikai hoko e Fakapoongi ʻo Siosefa Sāmitá ko e fakaʻosinga ia ʻo e talanoá. Neongo naʻe ongoʻi ʻe he niʻihi ne nau fakapoongi iá, ʻe hōloa e Siasí heʻene pekiá, ka ʻoku kei moʻui ʻene fakamoʻoni mālohí, ʻa e ngaahi akonaki naʻá ne liliú pea mo ʻene talaki e pōpoaki ʻa e Fakamoʻuí, ʻi he loto ʻo e kau mēmipa [ʻo e Siasí] ʻi he funga ʻo e māmaní, ʻa ia ʻoku nau talaki ko ha palōfita ia ʻa e ʻOtuá.”
Palesiteni Thomas S. Monson, “Palōfita ko Siosefa Sāmitá: Ko ha Faiako ʻi he Faʻifaʻitakiʻanga,” Liahona, Nōvema 2005, 69.
Fakamaʻu Hono Misioná mo ʻEne Ngaahi Ngāué ʻaki Hono Totó
Lau ʻa e fakalea ko ia ʻo e himi “ʻOku mau Fakamālō” (Ngaahi Himí, fika 16) peá ke hiki ʻi hoʻo tohinoá ʻa ngaahi ongo ʻokú ke maʻu fekauʻaki mo Palōfita Siosefa Sāmitá.