Ko e Holoholoʻanga Talanoá

Naʻe punopuna atu ʻa Keiti ʻi he saitiuoká ki he fuʻu ʻoke honau tuliki halá. Naʻe ʻai ʻe he fuʻu ʻakau motuá ke ʻilongofua ʻa e fale ʻo Nená.

Hangē ko e angamahení, naʻe tangutu ʻa Nena ʻi hono loto falé ʻo fī mo tuitui fakalongolongo pē ha ngaahi konga tupenu lanu maama. Naʻe teuteu ʻaki e faliki papa ngingila ʻo e fale ʻo Nená ha ngaahi holoholoʻanga fakaʻofoʻofa naʻe ngaohi pē ʻe Nena.

Ne pehē atu ʻa Nena ʻi he hū mai ʻa Keití, “Mālō e lelei, ʻofaʻanga.” Naʻe ʻikai hano taimi kuó na talanoa kau ki he meʻa ne ui ʻe Nena ko e “ngaahi ʻaho fuoloá.” Naʻá na vakai fakataha ki he ngaahi tā taʻe-fakalanú. Naʻe saiʻia taha ʻa Keiti ke mamata ki he ngaahi vala mo e ngaahi ākenga ʻulu ne ʻai ʻe hono kāingá ʻi heʻenau kei talavoú.

Naʻe talaange ʻe Nena mo māpuhoi, “Naʻe mātuʻaki kehe ia ʻi he taimi ko iá.” “ʻOkú ke ʻilo, naʻe ʻikai ke ʻi ai haʻamau kā pe TV pe telefoni toʻotoʻo.”

Naʻe ʻikai mei lava ʻa Keiti ʻo fakakaukau atu ki haʻane luelue ki he feituʻu kotoa peé. “Nena, ko e hā naʻá ke fai ke ke fiefia aí?” Ko e fehuʻi ange ia ʻa Keití.

“Naʻa mau manako ke hiva fakataha. Naʻa mau takatakai ʻi he pianó he efiafí ʻo hivaʻi ʻemau ngaahi hiva manakoa tahá. Naʻa mau faʻa hiva he taimi ʻe niʻihi ʻo fā homau leʻó! Ko ha taimi fakafiefia ia.”

Ne sio ʻa Nena ki he loto ʻataʻataá ʻo hangē te ne lava ʻo toe fakafoki mai e ngaahi taʻú ʻo toe mamata ki aí.

Naʻe tangutu pē ʻa Keiti ʻofi ki he takainga holoholoʻanga ne tāupe hifo he funga ʻo Nená. Naʻá ne fakatotolo hifo e ngaahi matatuitui fakaʻofoʻofá ʻaki hono ʻuluʻulutuhú.

Pehē ange māmālie leva ʻa Nena, “Naʻá ku fakakaukau, te ke fie ngaahi haʻo holoholoʻanga lālanga pē ʻe koe?”

Puna ʻa Keiti ki ʻolunga ʻo pasipasi hono nimá.

“Te u saiʻia ai, Nena! Te ta lava ʻo kamata he ʻahó ni?”

Kata ʻa Nena. “ʻOku ʻi ai ha meʻa ʻoku fie maʻu ke ke ʻuluaki fai. Foki ki ʻapi ʻo tānaki e ngaahi vala motuʻa te ke lavá ʻo kosi fakalōloa ia.”

Kiʻi ʻāʻā ange hono matá pea punou atu kia Keiti, leʻo siʻi hono leʻó ʻo hangē ʻokú ne talaange ha meʻa fakapulipulí.

“Ko e meʻa ia ʻokú ne ʻai e kāpetí ke makehé. Pea koeʻuhí ʻoku ngaohi ia mei he tupenú, ʻe lava ʻe he kāpetí ke ne tala e talanoa hoʻo moʻuí. ʻOku tatau ʻa e foʻi feʻunu kotoa pē mo ha vahe ʻi ha tohi fekauʻaki mo koe. ʻE lava ʻete vakai ki he tupenu ʻo ha kofu motuʻa ʻo tokoni ke ke manatuʻi ʻa e ngaahi feituʻu naʻá ke tui aí pea mo e meʻa naʻá ke fai ʻi hoʻo tui iá.”

Naʻe ʻāʻā lelei hake ʻa e kiʻi mata ʻo Keití. Naʻe tuhu ki he holoholoʻanga naʻe lālanga ʻe Nená.

“ʻOkú ke manatuʻi e meʻa kotoa fekauʻaki mo e tupenu he holoholoʻanga ko ʻení?”

Malimali ʻa Nena. “ʻOku ou ʻilo! Ko e konga kulokulá mei he kofu naʻá ku tui ʻi hono fāʻeleʻi koé. ʻOku ou manatu ki he falala atu hoku ihú ki he matapā sioʻatá ke u sio lelei atu kia koé. Naʻá ke kei lanu pingikī mo mingimingi.”

Ne kata fakataha ʻa Keiti mo Nena ʻi he hoko atu ʻa Nena ke fakamatala kia Keiti ʻa e ngaahi talanoa mei he kāpetí. Ko ʻene aʻu atu pē ʻa Keiti ki ʻapi he pō ko iá, ne na tuku mavahe leva mo Mamā e ngaahi vala motuʻa ʻe lava ke fakaʻaongaʻi ʻe Keití.

ʻI he ʻaho hono hokó, ne ʻave leva ʻe Keiti ʻa e valá ki he fale ʻo Nená. Ne fakahinohino ange leva ʻe Nena kia Keiti e founga ke kosi ai e tupenú ki ha ngaahi konga lōloá, pea tuitui fakataha leva e ngaahi feʻunú.

Ne ngāue ʻa Keiti he kāpetí ʻi he ʻosi ʻa e akó he ʻaho kotoa pē ʻi he fale ʻo Nená.

Naʻe tupu māmālie ʻa e kāpetí. ʻI he fakalau atu e ngaahi ahó, ne ako maʻuloto ʻe Keiti ha ngaahi meʻa lahi mei he ngaahi talanoa ʻa Nená. ʻI he ngaahi ʻaho ʻe niʻihi ko ia ia naʻe lahi ʻene fai e ngaahi talanoá kia Nená.

Hili haʻane tānaki atu ha konga lanu pulú ʻi ha ʻaho ʻe taha ki he kāpetí, ʻa ia naʻe hoko ko hano talausese manako, ne oloʻi ʻe Keiti hono ʻaofinimá ʻi he feʻunu fakalanulanú.

“ʻOkú ke pehē kuo mei ʻosi ʻa e kāpetí?” Ko e fehuʻi ange ia ʻe Nena, mo sio hake mei heʻene ngāué.

Pehē ange ʻa Keiti mo malimali, “Teʻeki ai.” Naʻe ʻikai teitei loto ia ke ʻosi hono taimi mo Nená.