Pekia ʻa Frances J. Monson

“ʻI he ʻuluaki ʻaho ne u mamata ai kia Falanisesí, ne u ʻiloʻi kuó u maʻu e tokotaha totonu ke ma malí,” ko e lea ia ʻa Palesiteni Tōmasi S. Monisoni fekauʻaki mo ʻena kaumeʻá.¹ Naʻe tā tuʻo lahi hono toutou fakapapauʻi mai ʻo e ʻilo ko iá ʻi he moʻui faifatongia pea mo e poupou ʻa Falanisesi Pivalei Sonisoni Monisoni ki hono husepānití.

Naʻe siʻi pekia fiemālie pē ʻa Sisitā Monisoni ʻi he ʻaho 17 ʻo Mē 2013 ʻi hono taʻu 85, tupu mei hono taʻu motuʻá.

Neongo naʻe ʻikai pē ke tohoakiʻi ʻe Sisitā Monisoni kiate ia e tokangá, ka naʻá ne faʻa kau fakataha mo Palesiteni Monisoni he ʻaʻahi ki he kau toulekeleká pea mo kinautolu ne siʻi mahamahakí. Naʻá ne hoko ko ha maʻuʻanga ivi ki hono husepānití ʻi hono ui kei talavou ke hoko ko ha pīsopé pea naʻá ne ngāue fakataha mo ia ʻi heʻene tokangaʻi e Misiona Kānatá mei he 1959 ki he 1962. Naʻe hoko atu ʻene poupou ki hono ʻofaʻanga ko “Tomí” ʻi hono ui ia ko ha Taki māʻolungá peá ne ngāue ʻi he Kōlomu ʻo e Kau ʻAposetolo ʻe Toko Hongofulu Mā Uá, ʻi he Kau Palesitenisī ʻUluakí pea mo ʻene hoko ko e Palesiteni ʻo e Siasí.

Naʻe pehē ʻe hona ʻofefine ko Ane Monisoni Tipí, “Naʻá ne ʻofa lahi heʻeku tamaí peá ne ʻiloʻi hono ngaahi talēnití mo e meʻafoakí pea naʻá ne fiefia lahi ke poupou mo tokoni kiate ia ke fakatupulaki hono ngaahi talēnití.”²

Naʻe fāʻeleʻi ʻa Falanisesi he ʻaho 27 ʻo ʻOkatopa 1927, pea ko e ʻofefine ia ʻo Falanisi E. Sonisoni mo Hilitā Puti Sonisoni. Naʻá ne mali mo Tōmasi S. Monisoni ʻi he Temipale Sōlekí ʻi he ʻaho 7 ʻo ʻOkatopa 1948. Naʻá ne ngāue ʻi he Fineʻofá mo e Palaimelí pea naʻá ne talēniti hiva, poto he tukuhuá, kae meʻa tēpuú, naʻá ne manako he hoko ko ha uaifi, faʻē, kuifefine mo ha kuifefine ua.

Naʻe fakamatalaʻi ʻe Sisitā Tipi ʻene faʻeé ko ha taha naʻe “fakafanongo maʻu pē mo fai pē ha kiʻi lea ki he meʻa naʻá ne mei fai kapau naʻá ne ʻi he tuʻunga tatau. … Naʻe hoko maʻu pē ʻene tā sīpingá … ko e tākiekina maʻongoʻonga taha ʻi heʻeku moʻuí. Naʻe ʻikai pē ke toe fehuʻia e meʻa naʻá ne tui ki aí, meʻa te ne faí pea mo e meʻa naʻá ne ʻamanaki ʻe fai ʻe he niʻihi kehé. Naʻá ne hoko ko e faʻifaʻitakiʻanga ʻo e tuʻunga ʻoku totonu ke aʻusia ʻe ha mēmipa ʻo e Siasí heʻene hoko ko ha Kalisitiané.”³

Naʻe pehē ʻe Palesiteni Monisoni, “Kuo teʻeki ai ke u ʻiloʻi ha lāunga tuʻo taha ʻa Falanisesi koeʻuhí ko hoku ngaahi fatongia faka-Siasí.” Naʻá ne fakamatalaʻi hono hoá ko ha “fefine naʻe tui mālohi mo fakalongolongo.”⁴