ʻI he taʻu ʻe tolungofulu kuo ʻosí ʻi he kei hoko ʻa Palesiteni Tōmasi S. Monisoni—ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá—naʻá ne ʻaʻahi ki Haiti ʻo fakatāpui e fonuá ki hono malangaʻi ʻo e ongoongolelei kuo toe fakafoki maí.

Naʻe toki ʻaʻahi ʻa ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ki Haiti ke fakamanatu e ʻaho ne fokotuʻu ai e Siasí. Naʻe puleʻi ʻe ʻEletā ʻEnitaseni hono tatala e maka fakamanatu ʻa ia ʻe hoko ko ha fakamanatu tuʻuloa ʻo e kamataʻanga ʻo e Siasí ʻi Haití. Naʻe mamata ʻa e kāingalotu naʻa nau fakatahataha hake ki hono tatala ʻo e maka fakamanatú ki ha pōpoaki fakatelevīsone meia Palesiteni Monisoni ʻa ia naʻe hiki kimuʻa he kātoangá.

ʻOku foaki ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he taʻu kotoa pē ha tokoni fakavavevave ki he kakai kotoa he funga ʻo e māmaní ʻa ia ʻoku uesia ʻe he ngaahi fakatamaki fakanatulá, taú, mo e hongé. Lolotonga e taʻu 2012 naʻe foaki ʻe he Siasí kiate kinautolu ne uesia he ngaahi fakatamaki fakanatula ʻe 104 ʻi ha ngaahi fonua ʻe 52 ha pāuni ʻe laukilu ʻo e meʻakai, vai, vala, nāunau fakafaitoʻo, nāunau haisiní, mo e ngaahi nāunau tokoni kehe pē. ʻIkai ngata aí, naʻe foaki ʻe ha kāingalotu ngāue tokoni ʻe lauiafe ha ngaahi houa ngāue tokoni ʻe 1.3 miliona.

Ko e tokoni fakatamaki lahi taha ʻa e Siasí ʻi he 2012 naʻe fai ia kiate kinautolu naʻe uesia ʻi he Afā Senitií (Hurricane Sandy) ʻi he Matāfanga Fakahahake ʻo e ʻIunaiteti Siteití. Makehe meia Senitií, ko e ngaahi tokoni fakatamaki lahi taha ʻa e Siasí ʻi he 2012 naʻe hoko ia ʻi Siapani, ʻOtu Motu Filipainí, mo e ngaahi feituʻu kehe ʻi he ʻIunaiteti Siteití mo Sīlia.

Ne fakaʻatā e polokalama FamilyTree, ko ha fakalahi ia ki he saiti ʻInitaneti FamilySearch.org ʻa e Siasí kuo fuoloa e tatali ki aí, ki he kakaí ʻi Māʻasi 2013. ʻOku lava ʻo ngāue ʻaki taʻe totongi ʻi he FamilySearch.org.

Ko e FamilyTree ko e fetongi ia ʻo e New FamilySearch, ʻa ia ʻoku aʻu mai ki he taimí ni ne toki lava pē ʻo hū ki ai ʻaki ha login memipasipi ʻa e Siasí pea mo ha lea fufū.

Naʻe pehē ʻe Paula M. Nauta, ko e pule fakamāketi ʻo e FamilySearch, ʻi he taimi ní ʻoku ʻi ai e kau ʻaʻahi kehe ki he FamilySearch.org “te nau lava ke kamata faʻu haʻanau fuʻu ʻakau fakafāmili (family tree) kakato ʻi he ʻinitanetí, ʻo kamata pē ʻiate kinautolu pea toki hokohoko atu ki he ngaahi toʻu tangata he kuohilí.”