Ngaahi Fakakaukau Maʻá e Efiafi Fakafāmili ʻi ʻApí

“Foki mo e Lāngilangi,” peesi 50: Hili hoʻomou lau e talanoá, te ke lava mo homou fāmilí ke maʻu ia mei he ʻInitanetí pea mou mamata ʻi he vitiō ko e “Honesty: You Better Believe It!” ʻi he youth.lds.org (lava ke maʻu ʻi he lea Faka-Pilitāniá, Potukalí, mo e Faka-Sipeiní). ʻE lava ke fevahevaheʻaki ʻa e kau mēmipa ʻo e fāmilí e meʻa ne nau ako mei he talanoá pe vitioó. Te mou toe lava foki ke lau ʻa e Ki Hono Fakamālohia ʻo e Toʻu Tupú fekauʻaki mo e faitotonú mo e angatonú (peesi 19). ʻE lava ʻa e kau mēmipa ʻo e fāmilí ke laku tavale mai ha ngaahi tūkunga ʻe ala siviʻi ai ʻenau faitotonú, ke hoko ko ha ʻekitivitī. Hiki ʻa e ngaahi tūkungá ʻi ha kiʻi laʻipepa, tuku ia ki ha foʻi poulu, pea ʻai ke takitaha toho ha laʻipepa. ʻAi ke fetongitongi ʻa e taha kotoa ʻi hono lau ha tūkunga mo fakamatala e meʻa ʻoku totonu ke fai he tūkunga ko iá ke faitotonu aí.

“Ko e Holoholoʻanga Talanoá,” peesi 66: ʻI he talanoa ko ʻení, ʻoku ʻeke ai ʻe Keiti kia Nena pe ko e hā e meʻa naʻá ne manako ke fai mo hono fāmilí ʻi heʻene kei siʻí. Ko e hā e meʻa naʻe pehē ʻe Nena naʻa nau manako ke faí? Hili iá, naʻe akoʻi ʻe Nena ha poto foʻou kia Keiti, peá na faʻu fakataha leva ha manatu melie. Fakakaukau ke lau ʻa e palakalafi fitu ʻo e “Ko e Fāmilí: Ko ha Fanongonongo ki Māmani.” ʻOkú ne pehē ʻoku founga fēfē hono faʻu ʻo e nofomalí mo e fāmili leleí? Fili ha taha ʻo e ngaahi meʻa ko ʻení, hangē ko e manavaʻofá, pea aleaʻi fakafāmili ia. ʻI he tuʻunga ko ʻení, te ke lava ʻo fakaafeʻi ʻa e fāmilí ke nau lisi ha ngaahi founga te nau lava ai ʻo manavaʻofa ki he kau mēmipa ʻo e fāmilí mo e niʻihi kehé. Te mou lava ʻo fokotuʻu ha ngaahi taumuʻa ki he uiké ke fakahaaʻi ai ha manavaʻofa lahi ange pea aleaʻi e tuʻunga lelei hono fakahoko e ngaahi taumuʻa ko iá he lolotonga hoʻomou efiafi fakafāmili ka hokó. Te ke lava ʻo fakaʻosi hoʻo lēsoní ʻaki hano hivaʻi ʻa e “Ko e Fāmilí ke Taʻengata” (Ngaahi Himi, fika 192).