Ko Hono Akoʻi mo Hono Ako ʻo e Ongoongoleleí

Ako ʻi he faʻa lotu ʻa e fakamatala ko ʻení, pea aleaʻi ia mo e kau fafine ʻokú ke ʻaʻahi ki aí ʻo ka feʻunga ke fakahoko. Fakaʻaongaʻi ʻa e ngaahi fehuʻí ke tokoni atu ki hono fakamālohia ʻo e kau fafiné pea ʻai ke hoko ʻa e Fineʻofá ko ha konga longomoʻui ʻo hoʻo moʻuí. Ke maʻu ha fakamatala lahi ange, vakai ki he reliefsociety.lds.org.

ʻĪmisi

Sila ʻo e Fineʻofá

Tuí, Fāmilí, Fakafiemālié

Naʻe hoko ʻa Sīsū Kalaisi ko ha faiako mataotao. Naʻá Ne tā e sīpinga maʻatautolu ʻi Heʻene “akoʻi fakatokolahi mo fakatāutaha … ʻa e houʻeiki fafiné, ʻi he halá pea mo e matāfangá, ʻi he veʻe vaitupú pea ʻi honau ngaahi ʻapí. Naʻá Ne fakahaaʻi ha angaʻofa kiate kinautolu peá Ne fakamoʻui kinautolu mo honau fāmilí.”¹

Naʻá Ne akoʻi ʻa Maʻata mo Mele pea mo “fakaafeʻi kinaua ke na hoko ko ʻEne ongo ākonga pea ke na kau ʻi he fakamoʻuí, ‘ʻa e meʻa leleí’, [Luke 10:42] he ʻikai toe toʻo meiate kinaua.”²

ʻOku fekauʻi kitautolu ʻe he ʻEikí ʻi heʻetau ngaahi folofola he ngaahi ʻaho kimui ní ke tau “feakoʻiʻaki … ʻa e tokāteline ʻo e puleʻangá” (T&F 88:77). Naʻe pehē ʻe Siulolo A. ʻEsipilini, ko e tokoni ua ʻi he kau palesitenisī lahi ʻo e Palaimelí fekauʻaki mo hono akoʻi mo e ako ʻo e tokāteliné, “Ko e ako ko ia ke mahino kakato ʻa e tokāteline ʻo e ongoongoleleí, ko ha ngāue ia ʻi he moʻuí kotoa pea ʻoku haʻu ia ʻi he ‘ʻotu lea ki he ʻotu lea, ʻa e akonaki ki he akonaki, ko e siʻi ʻi heni pea siʻi ʻi hena’ (2 Nīfai 28:30).”³

ʻI heʻetau ako, fakatotoloʻi, mo lotú, te tau faiako ʻaki ai e mālohi ʻo e Laumālie Māʻoniʻoní, ʻa ia te ne fakahū ʻetau pōpoakí “ki he loto ʻo e fānau ʻa e tangatá [mo e kakai fefiné]” (2 Nīfai 33:1).

Mei he Folofolá

ʻAlamā 17:2–3; 31:5; Tokāteline mo e Ngaahi Fuakava 42:12–13; 84:85

Mei Hotau Hisitōliá

Ne fakamanatu mai ʻe hotau kau palōfita kuo mamaʻó kiate kitautolu kakai fefiné, ʻoku ʻi ai hatau fatongia mahuʻinga ko e kau faiako ʻi he ʻapí mo e Siasí. Naʻe kole mai ʻe Palesiteni Sipenisā W. Kimipolo ʻi Sepitema 1979 (1895–1985) ke tau hoko ko e “kau fafine taukei ʻo e folofolá.” Naʻá ne pehē: “Mou mataotao ʻi he folofolá—ʻo ʻoua ʻe tuku hifo ʻa e niʻihi kehé, ka ke hiki hake ʻa kinautolu! He ko hai ʻe fie maʻu lahi ange ke ne ‘mataʻikoloa ʻaki’ ʻa e ngaahi moʻoni ʻo e ongoongoleleí (ʻa ia te nau maʻu tokoni mei ai ʻi honau taimi faingataʻaʻiá), ka ko e kau fafine mo e ngaahi faʻē ʻoku nau fakahoko ʻa e konga lahi ʻo hono ʻohake mo akoʻi ʻo e fānaú?”⁴

Ko e kau faiako mo e kau ako kotoa pē kitautolu. Ko e taimi ʻoku tau faiako ai mei he folofolá mo e ngaahi lea ʻa e kau palōfita moʻuí, te tau lava leva ke tokoniʻi ʻa e niʻihi kehé ke nau omi kia Kalaisi. Ko e taimi ʻoku tau kau ai ʻi he akó ʻo fai ha ngaahi fehuʻi ʻuhinga pea fakafanongó, te tau lava leva ke maʻu e tali ʻokú ne feau ʻetau ngaahi fie maʻu fakafoʻituituí.